អ្នកនាំពាក្យ៖ ប្រទេសដៃគូនានា ឬមហាអំណាចនឹងមិនយកកិច្ចប្រជុំរដ្ឋមន្ត្រីការបរទេសអាស៊ានជាការបន្ទច់បង្អាប់នោះទេ
ភ្នំពេញ៖ គោលជំហររបស់អាស៊ានមិនប្រែប្រួលឡើយ គឺមិនយកប្រទេសដៃគូ និងមហាអំណាចណាដៃគូតែមួយឡើយ។ អាស៊ានមានមជ្ឈភាព និងឯករាជ្យរបស់ខ្លួន ក្នុងការដាក់ចេញគោលជំហរ និងបទដ្ឋានដើម្បីស្របតាមអាទិភាពរបស់អាស៊ាន។ ប្រទេសដៃនានាឬមហាអំណាចនឹងមិនយកវេទិកាឬកិច្ចប្រជុំនាពេលខាងមុខជាការបន្ទច់បង្អាប់នោះទេ។ នេះជាការបញ្ជាក់របស់ឯកឧត្តម គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនិងជាអ្នកនាំពាក្យសម្រាប់កិច្ចប្រជុំរដ្ឋមន្ត្រីការបរទេសអាស៊ាន បានបញ្ជាក់ក្នុងសន្និសីទសារព័ត៌មាននៅរសៀលថ្ងៃទី០១ ខែសីហា ឆ្នាំ២០២២នេះ នៅសណ្ឋាគារសុខា។
ឯកឧត្តមបានបន្តថា កិច្ចប្រជុំរដ្ឋមន្ត្រីការបរទេសអាស៊ាន ដែលនឹងប្រព្រឹត្តទៅនៅថ្ងៃទី០៣ ខែសីហា ខាងមុខនេះ នឹងផ្តោតលើមូលបទធំរបស់កម្ពុជា។ ក្នុងនាមកម្ពុជាជាប្រធានអាស៊ាន គឺការដោះស្រាយបញ្ហាប្រឈមរួមគ្នា រួមមាន៖ នយោបាយសេដ្ឋកិច្ច ការអភិវឌ្ឍសង្គម។ ជាពិសេសការកសាងអាស៊ានក្លាជាសហគមន៍មួយផ្តល់ផលប្រយោជន៍ដល់ប្រជាជនអាស៊ាន។
អ្នកនាំពាក្យសម្រាប់កិច្ចប្រជុំរដ្ឋមន្ត្រីការបរទេសអាស៊ាន បានបញ្ជាក់ថា ក្នុងឋានៈកម្ពុជាជាប្រធានអាស៊ាន មានចំណុចអាទិភាពដែលបណ្តាប្រទេសសមាជិកអាស៊ានត្រូវលើមកពិភាក្សាពាក់ព័ន្ធការអនុវត្តរបស់កម្ពុជា ដូចជា កាលានុវត្តន៍ភាព និងការត្រៀមកិច្ចប្រជុំកំពូលសម្រាប់ចុងឆ្នាំទាំងផ្នែកសន្តិសុខ ការធានាសន្តិភាពក្នុងតំបន់ និងការងើបឡើងពីវិបត្តិកូវីដ-១៩ ដើម្បីឱ្យអាស៊ានអនុវត្តទទួលបានប្រសិទ្ធភាពខ្ពស់។
អ្នកនាំពាក្យដដែលបានអះអាងថា គោលជំហររបស់អាស៊ានមិនប្រែប្រួលឡើយ គឺមិនយកប្រទេសដៃគូ និងមហាអំណាចណាដៃគូតែមួយឡើយ។ អាស៊ានមានមជ្ឈភាព និងឯករាជ្យរបស់ខ្លួន ក្នុងការដាក់ចេញគោលជំហរ និងបទដ្ឋាន ដើម្បីស្របតាមអាទិភាពរបស់អាស៊ាន។ ប្រទេសដៃនានា ឬមហាអំណាច នឹងមិនយកវេទិកា ឬកិច្ចប្រជុំនាពេលខាងមុខជាការបន្ទុចបង្អាប់នោះទេហើយសង្ឃឹមថា ប្រទេសដៃគូនឹងប្រើប្រាស់កិច្ចប្រជុំជាទម្រង់ផ្តល់លទ្ធភាពឱ្យទាំងអស់គ្នា រួមគ្នាដោះស្រាយស្រាយបញ្ហា ដាក់ចេញគោលនយោបាយ ឬជំហានដើម្បីបន្ថយភាពតានតឹង ដើម្បីប្រជាជាតិរីកចម្រើន។
សូមជម្រាបថា កម្ពុជាក្នុងនាមជាប្រធានអាស៊ាន នឹងធ្វើជាម្ចាស់ផ្ទះរៀបចំកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធក្នុងក្របខ័ណ្ឌអាស៊ានពីថ្ងៃទី២៩ ខែកក្កដា ដល់ថ្ងៃទី០៥ ខែសីហា នៅរាជធានីភ្នំពេញ។
តាមកម្មវិធីដែលបានគ្រោងទុក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីក្នុងពិធីបើកជាផ្លូវការនៃកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធក្នុងក្របខ័ណ្ឌអាស៊ាន ហើយនឹងទទួលការចូលជួបសម្តែងការគួរសមរួមគ្នា ដោយរដ្ឋមន្ត្រីការបរទេស និងអគ្គលេខាធិការអាស៊ាន។
កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ រួមមាន៖
- កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ
- ជំនួបរវាងរដ្ឋមន្ត្រីការបរទេស អាស៊ានជាមួយតំណាងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស
- កិច្ចប្រជុំរដ្ឋមន្ត្រីការបរទេស អាស៊ានលើកទី៥៥
- សន្និសីទក្រោយកិច្ចប្រជុំរដ្ឋមន្ត្រីការបរទេស អាស៊ាន ជាមួយដៃគូសន្ទនារបស់អាស៊ាន
- កិច្ចប្រជុំរដ្ឋមន្ត្រីការបរទេស អាស៊ានបូកបី លើកទី២៣
- កិច្ចប្រជុំរដ្ឋមន្ត្រីការបរទេស នៃកិច្ចប្រជុំកំពូលអាស៊ី-បូព៌ា លើកទី១២
- កិច្ចប្រជុំវេទិកាតំបន់អាស៊ានលើកទី២៩
ស្របពេលជាមួយកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ រដ្ឋមន្ត្រីការបរទេស និងអគ្គលេខាធិការអាស៊ាន នឹងអញ្ជើញធ្វើជាសាក្សីការចុះហត្ថលេខាលើលិខិតុបករណ៍នៃការចូលជាសមាជិកនៃសន្ធិសញ្ញា មិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដោយព្រះរាជាណាចក្រដាណឺម៉ាក, សាធារណរដ្ឋក្រិក, ព្រះរាជាណាចក្រហូឡង់, ប្រទេសអូម៉ង់, រដ្ឋកាតា និងអារ៉ាប់រួមអេមីរ៉ាត់។ រដ្ឋមន្ត្រីការបរទេសនិងអគ្គលេខាធិការអាស៊ានក៏នឹងអញ្ជើញចូលរួមក្នុងកម្មវិធីប្រគល់ពានរង្វាន់អាស៊ានឆ្នាំ២០២១ ផងដែរ។
ក្នុងឱកាសនៃកិច្ចប្រជុំរដ្ឋមន្ត្រីការបរទេស អាស៊ានលើកទី៥៥ នឹងមានកិច្ចប្រជុំត្រីភាគីចំនួនបីដាច់ដោយឡែកពីគ្នា រវាងកម្ពុជានិងលេខាធិការដ្ឋានអាស៊ាន ជាមួយនឹងប្រទេសដៃគូសន្ទនារបស់អាស៊ានចំនួនបី រួមមាន ប្រទេសន័រវេស ប្រទេសតួកគី និងប្រទេសស្វីស។ ក្រៅពីប្រទេសដៃគូសន្ទនាតាមវិស័យរបស់អាស៊ាន និងប្រទេសទាំងប្រាំមួយ ដែលចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ខាងលើ ប្រទេសចំនួនបួនផ្សេងទៀត នឹងត្រូវបានអញ្ជើញជាភ្ញៀវនៃប្រធានអាស៊ានឆ្នាំ២០២២ រួមមានប្រទេសប៉ាពួញូវហ្គីណេ ម៉ារ៉ុក ទីម័រខាងកើត និងអាស៊ែបៃហ្សង់។ ក្នុងអំឡុងពេលនៃកិច្ចប្រជុំ AMM លើកទី៥៥ និងកិច្ចប្រជុំពាក់ព័ន្ធ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា រំពឹងថានឹងមានជំនួបទ្វេភាគីមួយចំនួនជាមួយនឹងសមភាគីបរទេសរបស់ឯកឧត្ដម៕
ដោយ៖ពលជ័យ
