ក្រុមប្រតិភូសហព័ន្ធកីឡាតេក្វាន់ដូ ITF អាស៊ីអាគ្នេយ៍បានធ្វើទស្សនកិច្ចនៅកម្ពុជា ដើម្បីជួយជ្រោមជ្រែងដល់ការពង្រឹងបច្ចេកទេសរបស់ក្រុមកីឡាករ កីឡាការិនី ក៏ដូចជាចែករម្លែកបទពិសោធថ្មីៗអន្តរជាតិមកជួយដល់សហព័ន្ធកីឡាតេក្វាន់ដូ ITF កម្ពុជា ក្នុងខណៈដែលកម្ពុជាកំពុងសម្រេចគោលដៅដ៏ធំចម្បងរបស់ខ្លួន ត្រៀមឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
ឯកឧត្តម បួនហ៊ីង សុធីយ៉ា អគ្គលេខាធិការ សហព័ន្ធកីឡាតេក្វាន់ដូ ITF កម្ពុជាមានប្រសាសន៍ថា ដំណើរទស្សនកិច្ចរបស់ប្រតិភូសហព័ន្ធកីឡាតេក្វាន់ដូ ITF អាស៊ីអាគ្នេយ៍នៅប្រទេសកម្ពុជា នាពេលនេះ ក្នុងគោលបំណង ជួយផ្នែកបណ្តុះបណ្តាលកីឡាករ-កីឡាការិនីកីឡាតេក្វាន់ដូ ITF កម្ពុជា ក៏ដូចជាចែករម្លែកបទពិសោធដល់សហព័ន្ធផងដែរ។
ជាទូទៅសហព័ន្ធអាស៊ីអាគ្នេយ៍តែងតែយកចិត្តទុកដាក់ខ្ពស់ដល់សមាជិករបស់ខ្លួនទាំងអស់ នៅតាមប្រទេសនីមួយៗក្នុងតំបន់។ ចំពោះដំណើរទស្សនកិច្ចនៅប្រទេសកម្ពុជានេះ ដើម្បីពង្រឹងផ្នែកបច្ចេកទេស រវាងសហព័ន្ធកីឡាតេក្វាន់ដូ ITF កម្ពុជា និងសហព័ន្ធកីឡាតេក្វាន់ដូ ITF អាស៊ីអាគ្នេយ៍ ព្រមទំាងជួយផ្នែកបច្ចេកទេសថ្មីៗ ដែលពិភពលោកបានធ្វើបច្ចុប្បន្នភាព។
ប្រតិភូអាស៊ីអាគ្នេយ៍ក៏បានធ្វើទស្សនកិច្ចនៅពហុកីឡដ្ឋានជាតិមរតកតេជោ និងអញ្ជើញមើលក្រុមកីឡាករ កីឡាការិនីកម្ពុជា នៅមជ្ឈមណ្ឌលជាតិហ្វឹកហ្វឺនកីឡានៃពហុកីឡដ្ឋានជាតិអូឡាំពិក ព្រមទាំងបានចូលជួបសម្តែងការគួរសមជាមួយថ្នាក់ដឹកនាំកីឡា។ ពួកគាត់ក៏បានថ្លែងអរគុណ ដែលកម្ពុជាបានជួយគាំទ្រឲ្យប្រភេទកីឡាតេក្វាន់ដូ ITF ឲ្យមានមុខមាត់លើឆាកអន្តរជាតិ។ គណៈប្រតិភូចំនួន៤នាក់ មកប្រទេសចំនួន ៣ ដើម្បីជួយផ្តល់នូវបច្ចេកទេសថ្មីៗ ដើម្បីដើរឲ្យទាន់កម្រិតអន្តរជាតិ។
គួរបញ្ជាក់ថា ប្រភេទកីឡាតេក្វាន់ដូ ITF ត្រូវបានដាក់បញ្ជូលនៅក្នុងការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលជាប្រវត្តិសាស្ត្រដំបូងរបស់កម្ពុជា ហើយក៏ជាប្រវត្តិសាស្ត្រដំបូងរបស់ប្រភេទកីឡាតេក្វាន់ដូ ITF នៅក្នុងព្រឹត្តិការណ៍កីឡាថ្នាក់តំបន់ដ៏ធំរៀងរាល់២ឆ្នាំម្តង ក្នុងរយៈពេល៦៤ឆ្នាំនៃស៊ីហ្គេម ៣២លើក រួមទាំងស៊ីហ្គេម លើកទី៣២ ឆ្នាំ២០២៣នៅកម្ពុជា។ ជាមួយគ្នានោះ ប្រភេទកីឡាតេក្វាន់ដូ ITF កម្ពុជា (ស្ថិតក្នុងចង្កោមប្រភេទកីឡាយុទ្ធគុនចម្រុះ) កំពុងសម្រួចគោលដៅឲ្យដណ្តើមមេដាយមាស ១៥គ្រឿង តាមសន្ទស្សន៍មេដាយមាសរបស់គណៈកម្មាធិការជាតិ CAMSOC ដែលចំនួនមេដាយមាសនេះ គឺជាចំនួនច្រើនជាងគេ ឈរនៅលំដាប់ទី១នៃប្រភេទកីឡាកម្ពុជាទាំងអស់ ដែលត្រៀមស៊ីហ្គេម ២០២៣៕ ចាន់ វិចិត្រ