ហ្សាការតា៖ ប្រធានាធិបតីចិនលោក ស៊ី ជិនពីង និងសមភាគីរុស្ស៉ីលោក វ្ល៉ាឌីមៀ ពូទីន នឹងចូលរួមក្នុងកិច្ចប្រជុំកំពូល G20 នៅឯកោះបាលី ប្រទេសឥណ្ឌូណេស៊ី ដែលនឹងប្រព្រឹត្តទៅនៅខែវិច្ឆិកា ឆ្នាំ២០២២ខាងមុខនេះ។

ប្រធានាធិបតីឥណ្ឌូណេស៊ី លោក ចូកូ វីដូដូ បានថ្លែងក្នុងបទសម្ភាសន៍ជាមួយសារព័ត៌មាន Bloomberg នៅថ្ងៃព្រហស្បតិ៍សប្ដាហ៍នេះថា លោក ស៊ី ជិនពីង នឹងមកចូលរួម ហើយលោក ពូទីន ក៏បានប្រាប់ខ្ញុំដែរថា គាត់នឹងមកចូលរួមផងដែរ ។

ដោយឡែកមេដឹកនាំប្រទេសធំៗ រួមទាំងប្រធានាធិបតីអាមេរិកលោក ចូ បៃដិន នឹងជួបប្រជុំគ្នានៅប្រទេសឥណ្ឌូណេស៊ី ក្នុងខែវិច្ឆិកាខាងមុខនេះ ខណៈដែលឥណ្ឌូណេស៊ីក៏បានអញ្ជើញប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី ផងដែរ។

ប្រធានាធិបតីឥណ្ឌូណេស៊ីលោក ចូកូ វីដូដូ ត្រូវបានគេមើលឃើញថា បានស្វែងរកតួនាទីជាអ្នកសម្រុះសម្រួលរវាងប្រទេសដែលមានសង្រ្គាម ហើយបានធ្វើដំណើរទៅជួបប្រធានាធិបតីអ៊ុយក្រែន និងរុស្ស៊ី។ ក្នុងសប្តាហ៍នេះ លោក វីដូដូ បាននិយាយថា ប្រទេសទាំងពីរបានទទួលយកឥណ្ឌូណេស៊ី ជា “ស្ពាននៃសន្តិភាព”៕ ប្រភព៖ CNA ប្រែសម្រួល៖ ទីណា និងបុត្រា