សហព័ន្ធកីឡាទូកកានូនិងរ៉ូអ៊ីងកម្ពុជា បានបើកវគ្គបណ្តុះបណ្តាលមន្រ្តីបច្ចេកទេសថ្នាក់ជាតិលើកទី១ រយៈពេល៦ថ្ងៃ ដល់មន្រ្តីរបស់មន្ទីរអប់រំយុវជន និងកីឡាខេត្ត កំពត នៅមន្ទីរអប់រំយុវជន និងកីឡា ក្រុង កំពត ខេត្ត កំពត ។
កញ្ញា មាសតឿ អគ្គហរញ្ញឹក សហព័ន្ធកីឡាទូកកានូ និងរ៉ូអ៊ីងកម្ពុជា បានបញ្ជាក់ឲ្យដឹងថា វគ្គបណ្តុះនេះ មានសិក្ខាកាមចូលរួមចំនួន៣៥នាក់ ជាមន្រ្តីរបស់មន្ទីរអប់រំយុវជននិងកីឡាខេត្ត កំពត ។
វគ្គបណ្តុះនេះ រៀបចំឡើង ដើម្បីពង្រឹងអភិវឌ្ឍសមត្ថភាពមន្រ្តីបច្ចេកទេស ក្នុងការចូលរួមការប្រកួតកីឡាជើងឯកថ្នាក់ជាតិ ពានរង្វាន់សម្តេចក្រឡាហោម ស ខេង លើកទី៩ ឆ្នាំ២០២២ និងឆ្ពោះទៅស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។
កញ្ញា អគ្គហិញ្ញឹក បានគូសបញ្ជាក់ទៀតថា វគ្គនេះ សិក្ខាកាមសិក្សារយៈពេល៦ថ្ងៃចាប់ពីថ្ងៃទី២៩ ខែ សីហា ដល់ថ្ងៃទី០៣ ខែ កញ្ញា ឆ្នាំ២០២២ បង្ហាត់បង្រៀន ដោយគ្រូឧទ្ទេស៣រូបដែលជាគ្រូជំនាញនៅក្នុងស្រុក គឺ ឯកឧត្តម បណ្ឌិត មាស សារិន អនុប្រធាន លោក ស្រ៊ុន លាង អគ្គលេខាធិការរង និង លោក សាំង សុភ័ក្ក្រ ។
កញ្ញា មាសតឿ អះអាងថា វគ្គបណ្តុះបណ្តាលនេះ សិក្ខាកាមទាំង៣៥រូបត្រូវសិក្សាទ្រឹះស្តី និងការអនុវត្តផ្ទាល់នៅកន្លែងរៀបចំការប្រកួតផ្ទាល់ ហើយ ក្រោយបញ្ចប់វគ្គបណ្តុះបណ្តាលនេះ សិក្ខាកាមទាំងអស់ នឹងទទួលបានការអនុញ្ញាតិឲ្យចូលរួមជាមន្រ្តីបច្ចេកទេសក្នុងការចូលរួមការប្រកួតកីឡាជើងឯកថ្នាក់ជាតិ ពានរង្វាន់សម្តេចក្រឡាហោម ស ខេង លើកទី៩ ឆ្នាំ២០២២ ដែលចាប់ដំណើរការប្រកួតពីថ្ងៃទី២ ដល់ថ្ងៃទី៤ ខែ កញ្ញា នៅមជ្ឈមណ្ឌលកីឡាលើទឹក ក្រុង កំពត់ ខេត្ត កំពត។
សូមបញ្ជាក់ថា វគ្គបណ្តុះបណ្តាលមន្រ្តីបច្ចេកទេសថ្នាក់ជាតិលើកទី១ រយៈពេល៦ថ្ងៃ មានសិក្ខាកាមចូលរួមចំនួន៣៥នាក់ សុទ្ធសឹងជាមន្រ្តីរបស់មន្ទីរអប់រំយុវជន និងកីឡា៕

ជាវ ចន្ធូ