លោក ណយ ផាណា អគ្គលេខាធិការ សសហព័ន្ធកីឡាកាយសម្ព័ន្ធកម្ពុជា នាព្រឹកថ្ងៃទី៣១ ខែ សីហា នេះ បានដឹកនាំប្រតិភូ និងអត្តពលិកកីឡាកាយសម្ព័ន្ធកម្ពុជា ចំនួន១៨នាក់ចូលរួមការប្រកួតកីឡាកាយសម្ព័ន្ធអេរ៉ូប៊ិកជើងឯកអាស៊ី លើកទី៧ ឆ្នាំ ២០២២ (7thAerobic Gymnastic ASIAN Championships 2022) ដែលនឹងត្រូវធ្វើនៅប្រទេសថៃ ពីថ្ងៃទី ១ ដល់ទី ៦ ខែកញ្ញា ឆ្នាំ២០២២។
អគ្គលេខាធិការ បានគូសបញ្ជាក់ថា ការចេញទៅចូលរួមក្នុងការប្រកួតលើកនេះ គោលដៅ និងមហិច្ឆតារបស់យើង គឺការឆ្ពោះទៅរកការដណ្តើមយកមេដាយមាស ដើម្បីបង្កើតបាននូវកំណត់ត្រាថ្មីក្នុងការប្រកួតជើងឯកអាស៊ី។ លោកថា វាមិនមែនជាលើកទី១ នោះទេ ដែលក្រុមកីឡាកាយសម្ព័ន្ធកម្ពុជា បានចូលរួមប្រកួតកីឡាកាយសម្ព័ន្ធអេរ៉ូប៊ិកជើងឯកអាស៊ី គឺពួកគេធ្លាប់បានចូលរួម៣លើកមកហើយ និងឈ្នះបានមេដាយជាហូរហែ ដោយក្នុងនោះ ការចូលរួមលើកទី១ ឆ្នាំ ២០០៩ នៅថៃ ឈ្នះបានមេដាយសំរឹទ្ធ១ រីឯលើកទី២ ឆ្នាំ ២០១០ នៅវៀតណាម ឈ្នះបានមេដាយប្រាក់ ១ សំរឹទ្ធ ១ ហើយលើកទី៣ ឆ្នាំ ២០១៥ នៅវៀតណាមដដែល ក្រុមកម្ពុជាបានឈ្នះមេដាយសំរឹទ្ធ ១។ ទៀតសោធ សម្រាប់ការចូលរួមលើកទី៤ក្នុងការប្រកួតកម្រិតអាស៊ីនៅថៃនេះ បានផ្តល់សារៈសំខាន់ខ្លាំងណាស់សម្រាប់កីឡាករកីឡាការិនី គ្រូបង្វឹក និងចៅក្រម អាជ្ញាកណ្តាលរបស់សហព័ន្ធ ទី១ កីឡាករកីឡាការិនីបានស្គាល់អំពីលក្ខណៈបច្ចេកទេសកាន់តែច្រើនសម្រាប់ការប្រកួតកម្រិតអន្តរជាតិឆ្ពោះទៅរកការអភិវឌ្ឍបច្ចេកទេសកាន់តែប្រសើរ ពិសេស គឺជាការវាស់ស្ទង់កម្រិតបច្ចេកទេសរបស់ពួកគេត្រៀមស៊ីហ្គេម លើកទី៣២ ឆ្នាំ២០២៣។
អគ្គលេខាធិការរូបនេះ បានបញ្ជាក់ទៀតថា ការចូលរួមលើកនេះ សម្រាប់កម្ពុជាក្នុងការប្រជែងដណ្តើមមេដាយក៏ជួបឧបសគ្គជាច្រើនជាមួយប្រទេសចូលរួម ដូចជា ជប៉ុន អឺរ៉ង់ កូរ៉េខាងត្បូង ឥណ្តូនេស៊ី ថៃ និងវៀតណាមជាដើម។បើទោះជាឧបសគ្គមានច្រើនបែបណាក្តី យើងនៅតែមានក្តីរំពឹងដណ្តើមឲ្យបានលទ្ធផលល្អជូនជាតិមាតុភូមិ។

សូមបញ្ជាក់ថា ប្រតិភូ និងអត្តពលិកទាំង១៨នាក់ដែលទៅចូលរួមការប្រកួតកីឡាកាយសម្ព័ន្ធអេរ៉ូប៊ិកជើងឯកអាស៊ី លើកទី៧ ឆ្នាំ ២០២២ (7thAerobic Gymnastic ASIAN Championships 2022) ដែលនឹងត្រូវធ្វើនៅប្រទេសថៃ ពីថ្ងៃទី ១ ដល់ទី ៦ ខែកញ្ញា ឆ្នាំ២០២២នៅប្រទេសថៃនេះ មានចៅក្រមអន្តរជាតិ ២ នាក់ គ្រូបង្វឹក និងគ្រូជំនួយ៣នាក់ ព្រមទាំងកីឡាការិនី ៨ នាក់ និងកីឡាករ៥នាក់៕ អត្ថបទ៖ ជាវ ចន្ធូ