អ៊ីស្លាម៉ាបាត៖ អតីតនាយករដ្ឋមន្ត្រីប៉ាគីស្ថាន លោក Imran Khan បានចោទប្រកាន់នាយករដ្ឋមន្ត្រីបច្ចុប្បន្ន ថា ជាប់ពាក់ព័ន្ធក្នុងផែនការសម្លាប់លោក កាលពីថ្ងៃសុក្រ ទី៤ ខែវិច្ឆិកា ខណៈដែលគាត់បានជាសះស្បើយពីរបួសដោយគ្រាប់កាំភ្លើង បន្ទាប់ពីការប៉ុនប៉ងធ្វើឃាត។

លោក Khan បានប្រាប់អ្នកសារព័ត៌មានថាលោក Shehbaz Sharif ដែលជំនួសគាត់ជានាយករដ្ឋមន្ត្រី បន្ទាប់ពីការបោះឆ្នោតមិនទុកចិត្ត កាលពីខែមេសា បានជាប់ពាក់ព័ន្ធក្នុងផែនការដែល រួមមានរដ្ឋមន្ត្រីក្រសួងមហាផ្ទៃ Rana Sanaullah និងមេបញ្ជាការកងទ័ពជាន់ខ្ពស់ទៀតផង។

លោក Khan បាននិយាយនៅក្នុងការបង្ហាញខ្លួន ជាសាធារណៈលើកដំបូងរបស់គាត់ ចាប់តាំងពីការវាយប្រហារកាលពីថ្ងៃព្រហស្បតិ៍ថា “អ្នកទាំងបីបានសម្រេចចិត្តប៉ុនប៉ងសម្លាប់ខ្ញុំ” ដោយបន្ថែមថា ខ្មាន់កាំភ្លើងពីរនាក់មានជាប់ពាក់ព័ន្ធ។ យ៉ាងណាក៏ដោយ រដ្ឋាភិបាលបានបដិសេធចំពោះផ្នែកណាមួយ ហើយបានស្តីបន្ទោសការប៉ុនប៉ងធ្វើឃាតលើខ្មាន់កាំភ្លើងដែលជំរុញដោយសាសនាជ្រុលនិយម។

ការវាយប្រហារលើក្បួនរថយន្តរបស់លោក Khan បានសម្លាប់បុរសម្នាក់ និងរបួសយ៉ាងហោចណាស់ ១០ នាក់ ដែលបង្កើនវិបត្តិនយោបាយ ដែលបានគ្រប់គ្រងប្រទេសអាស៊ីខាងត្បូងមួយនេះ ចាប់តាំងពីការបណ្តេញលោក Khan ក្នុងខែមេសា។ អតីតតារាកីឡាករ វ័យ៧០ ឆ្នាំរូបនេះបានដឹកនាំក្បួនយុទ្ធនាការមនុស្សរាប់ពាន់នាក់ ចាប់តាំងពីសប្តាហ៍មុនពី Lahore ទៅកាន់រដ្ឋធានី Islamabad ៕ ប្រភពពី CNA, ដោយ៖ សារ៉ាត