លីប្រេវីល៖ លោកប្រធានាធិបតីបារាំង ម៉ាក្រុង (Macron) និងប្រធានាធិបតីប្រទេសហ្គាបុង លោក បនហ្គោ (Bongo) បានចូលរួមក្នុងកិច្ចប្រជុំកំពូលមួយ ស្តីពីការការពារព្រៃឈើ ក្នុងពេលពេលដែលមេដឹកនាំបារាំង បំពេញទស្សនកិច្ចនៅប្រទេសស្ថិតក្នុងតំបន់អាហ្វ្រិក។

ប្រធានាធិបតីបារាំង លោក មែនូអែល ម៉ាក្រុង (Emmanuel Macron) បានមានវត្តមានស្ថិតនៅក្នុងទីក្រុង លីប្រេវីល ប្រទេសហ្គាបុង ជាមួយសមភាគី ហ្គាបុង គឺលោកប្រធានាធិបតី អាលី បនហ្គោ អនឌីមបា (Ali Bongo Ondimba) និងប្រមុខរដ្ឋបណ្តាប្រទេសនៃតំបន់អាហ្វ្រិកកណ្តាលមួយចំនួន នៅក្នុងកិច្ចប្រជុំកំពូលស្តីពីការការពារព្រៃត្រូពិច កាលពីថ្ងៃព្រហស្បតិ៍ សប្តាហ៍នេះ ពោលគឺនៅពេលដែលលោក ម៉ាក្រុង ចាប់ផ្តើមដំណើរទស្សនកិច្ចរយៈពេលបួនថ្ងៃ នៅក្នុងតំបន់អាហ្វ្រិកកណ្តាល។

លោក ប្រធានាធិបតីហ្គាបុង បនហ្គោ (Bongo) បាននិយាយ នៅឯកិច្ចប្រជុំកំពូលស្តីពី «ព្រៃឈើតែមួយ» ដែលសហការរៀបចំ ដោយប្រទេសបារាំង និងហ្គាបុងថា “គ្មានការវិនិយោគណាប្រសើរជាងថ្ងៃនេះទេ ជាងការវិនិយោគ នៅក្នុងព្រៃឈើរបស់យើង”។

នៅក្នុងកិច្ចប្រជុំនាពេលនោះដែរ លោកប្រធានាធិបតីបារាំងបានដាក់ចេញនូវផែនការសកម្មភាព រួមទាំងថវិកាចំនួន ១០០ លានអឺរ៉ូសម្រាប់ប្រទេសនានា “ដើម្បីពន្លឿនយុទ្ធសាស្រ្តរបស់ពួកគេក្នុងការការពារកាបូន និងទុនបម្រុងជីវចម្រុះសំខាន់ៗ” ។ លោក Macron បាននិយាយថា លោកនឹងស្វែងរក “ការដាក់ទុនធម្មជាតិត្រឡប់មកវិញ ជាបេះដូងនៃសេដ្ឋកិច្ចរបស់យើង” ។

មេដឹកនាំបារាំងរូបនេះបានមានប្រសាសន៍ថា “យើងតែងតែនិយាយអំពីរាប់ពាន់លាន នៅក្នុងកិច្ចប្រជុំកំពូលរបស់យើង ប៉ុន្តែមនុស្សមើលឃើញតិចតួច នៅលើដី ពីព្រោះប្រព័ន្ធមិនល្អឥតខ្ចោះ” លោកបាននិយាយបន្ថែម ការអំពាវនាវឱ្យប្រទេសដែលរក្សាព្រៃឈើ ត្រូវមានលក្ខណៈល្អិតល្អន់ ដើម្បីទទួលបានសំណង៕ ប្រភពពី AFP ប្រែសម្រួលដោយ៖ សារ៉ាត