ភ្នំពេញ៖ ក្នុងពិធីបិទសន្និបាតបូក សរុប ការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងកសិកម្ម រុក្ខាប្រមាញ់ និងនេសាទ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសស្វាគមន៍អ្នកជំនាញកសិកម្មខ្មែរ២រូប ដែលរកឃើញពូជស្រូវ ២ប្រភេទ គឺពូជចំប៉ីស (៧០) និងពូជកងរី ខណៈបច្ចុប្បន្ន កម្ពុជា មានពូជស្រូវប្រមាណ ១០ប្រភេទ ។

សម្ដេច បានបញ្ជាក់ថា ពូជចំប៉ីស (៧០) និងកងរី ត្រូវបានស្រាវជ្រាវរកឃើញដោយលោកបណ្ឌិត អ៊ុក ម៉ាការ៉ា និងលោកបណ្ឌិត ឃុន លាងហាក់។

ជាមួយគ្នានេះ សម្ដេចតេជោ បានសាទរចំពោះការស្រាវជ្រាវបច្ចេកទេសជាបន្តបន្ទាប់ ដែលផ្សារភ្ជាប់នឹងការដាំដុះ ហើយសម្ដេច នឹងបំពាក់មេដាយ ផ្នែកស្រាវជ្រាវ ជូនលោកបណ្ឌិតទាំងពីរ ផងដែរ ។

សូមបញ្ជាក់ថា កម្ពុជា មានពូជស្រូវប្រមាណ ១០ប្រភេទ។ ពូជស្រូវទាំង១០នេះ ត្រូវបានចែកចេញជា ៣ប្រភេទ គឺ ១-ប្រភេទស្រូវមិនប្រកាន់រដូវមានចំនួន៣ពូជ, ២- ប្រភេទស្រូវកណ្តាល មានចំនួន៤ពូជ និង ៣-ប្រភេទ ស្រូវធ្ងន់មានចំនួន ៣ពូជ។ ចំពោះប្រភេទស្រូវកណ្តាល និងស្រូវធ្ងន់ គឺសុទ្ធតែជាពូជ ដែលបានបង្កើតឡើងតាមបច្ចេកទេស ពីពូជស្រូវក្នុងស្រុកទាំងអស់ ។

ដោយឡែក ប្រភេទស្រូវស្រាល ចំនួន៣ពូជ គឺបង្កាត់នៅអ៊ីរី ហើយធ្វើការជ្រើសរើស និងបញ្ចេញជាពូជ តាមបច្ចេកទេសដោយអង្គភាពជំនាញរបស់ក្រសួងកសិកម្ម រុក្ខាប្រមាញ់ និងនេសាទ គឺ វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា – Cambodian Agricultural Research and Development Institute (CARDI) ៕ អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ