ចិន បាញ់បង្ហោះគ្រាប់រ៉ុក្កែតមួយគ្រឿង ដើម្បីនាំយកផ្កាយរណប៣គ្រឿងឡើងទៅកាន់ ទីអវកាស
អត្ថបទដោយ៖
Kien Sereyvuth
ចិន៖ គ្រាប់រ៉ុក្កែតសម្រាប់ដឹកជញ្ជូន ស្មាត ដ្រាហ្គិន វ័ន ត្រូវបានបាញ់បង្ហោះលើកដំបូងនៅឯមជ្ឈមណ្ឌលបង្ហោះផ្កាយរណប ជូហ្គាន នៅភាគពាយ័ព្យប្រទេសចិន កាលពីថ្ងៃសៅរសប្តាហ៍មុននេះ (ម៉ោងក្នុងតំបន់) ស្ថិតក្នុងគោលបំណងនាំយកផ្កាយរណបចំនួន០៣គ្រឿងឡើងទៅកាន់ទីអវកាស។
គ្រាប់រ៉ុក្កែត ស្មាត ដ្រាហ្គិន វ័ន នេះ មានប្រវែងសរុប១៩,៥ម៉ែត្រ និងអង្កត់ផ្ចិត១,២ម៉ែត្រ ដែលវាត្រូវបានរចនាឡើងដោយផ្តោតលើការបម្រើវិស័យពាណិជ្ជកម្ម គឺសម្រាប់ទទួលនាំយកផ្កាយរណបឡើងទីអវកាស។
គ្រាប់រ៉ុក្កែតស៊េរីថ្មីរបស់ចិនខាងលើនេះដែរ ត្រូវបានផលិតឡើងដោយក្រុមហ៊ុន ឆៃណា រ៉ុក្កែត ខូអិលធីឌី ដែលជាបុត្រសម្ព័ន្ធរបស់ក្រុមហ៊ុនផលិតរ៉ុក្កែត និងយានអវកាសចិន ឆៃណា អាខាដេមី អហ្វ ឡាន់ វីហ៊ីខល តិចណូឡូជី ហៅកាត់ CALVT។ រីឯផ្កាយរណបទាំង០៣គ្រឿង ដែលវានាំយកទៅ គឺជារបស់ក្រុមហ៊ុនចំនួន០៣ មានមូលដ្ឋាននៅទីក្រុងប៉េកាំង៕ធ.ដ
