មេដឹកនាំក្រុមប្រទេស G7 នឹងកំណត់គោលដៅវិស័យថាមពល ពាណិជ្ជកម្មរបស់រុស្ស៊ី ក្នុងជំហានទណ្ឌកម្ម
តូក្យូ៖មេដឹកនាំនៃក្រុមប្រទេសអ្នកមានទាំង៧ (G7) គ្រោងនឹងរឹតបន្តឹងទណ្ឌកម្មលើប្រទេសរុស្ស៊ីនៅក្នុងកិច្ចប្រជុំកំពូលនៅប្រទេសជប៉ុនក្នុងសប្តាហ៍នេះ ដោយកំណត់គោលដៅលើវិស័យថាមពល និងពាណិជ្ជកម្ម ដែលជួយឱ្យរុស្ស៊ីមានហិរញ្ញវត្ថុធ្វើសង្រ្គាមនៅអ៊ុយក្រែន។ នេះបើតាមការរាយការណ៍ផ្ដាច់មុខរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីប្រភពមន្រ្តីដឹងពីកិច្ចការនេះ។
ប្រភពឱ្យដឹងថា វិធានការថ្មីដែលនឹងប្រកាសឡើងដោយក្រុមមេដឹកនាំក្នុងអំឡុងកិច្ចប្រជុំថ្ងៃទី ១៩-២១ ឧសភា នឹងកំណត់គោលដៅលើការគេចវេសពីទណ្ឌកម្មដែលពាក់ព័ន្ធនឹងប្រទេសទី៣របស់រុស្ស៊ី ហើយធ្វើឱ្យប៉ះពាល់ដល់ការផលិតថាមពលនាពេលអនាគតរបស់រុស្ស៊ី និងទប់ស្កាត់ពាណិជ្ជកម្មដែលជាប្រភពចំណូលគាំទ្រផ្នែកយោធារបស់រុស្ស៊ី។
ដោយឡែកមន្ត្រីអាមេរិកក៏រំពឹងថា សមាជិក G7 នឹងយល់ព្រមកែសម្រួលវិធីសាស្រ្តរបស់ខ្លួនចំពោះការដាក់ទណ្ឌកម្ម។ដូច្នេះការនាំចេញទាំងអស់ត្រូវបានហាមឃាត់ដោយស្វ័យប្រវត្តិ លុះត្រាតែពួកគេស្ថិតនៅក្នុងបញ្ជីទំនិញដែលត្រូវបានអនុម័ត ដែលវិធានការនេះធ្វើឡើងយ៉ាងហោចណាស់លើប្រភេទទំនិញមួយចំនួន។
កន្លងមករដ្ឋបាលរបស់លោក កន្លងមកបានជំរុញសម្ព័ន្ធមិត្ត G7 ដែលមានអាមេរិក ជប៉ុន អាល្លឺម៉ង់ កាណាដា បារាំង អង់គ្លេស និងអ៊ីតាលី ឱ្យផ្លាស់ប្ដូរទណ្ឌកម្មរបស់ប្លុកលើរុស្ស៊ីបច្ចុប្បន្ន ដែលអនុញ្ញាតឱ្យទំនិញទាំងអស់អាចលក់ទៅឱ្យប្រទេសរុស្ស៊ី ប្រសិនបើវាមិនស្ថិតនៅក្នុងបញ្ជីខ្មៅ។
ជុំវិញបញ្ហានេះ បើតាមការអះអាងរបស់ប្រភពមន្រ្តីអាមេរិកប្រាប់រ៉យទ័រ វិស័យសំខាន់ៗដែលជាចំណុចរសើបសម្រាប់យោធារុស្ស៊ី ដឹងតែជាអ្វីដែលត្រូវតែមានការផ្លាស់ប្ដូរហើយ ប៉ុន្តែវាកំពុងស្ថិតនៅក្រោមការពិភាក្សាក្នុងប្លុកនៅឡើយ។
គួរបញ្ជាក់ថា ចំណាត់ការរបស់មេដឹកនាំ G7 លើរុស្ស៊ី នឹងធ្វើឡើងខណៈសម្ព័ន្ធមិត្តលោកខាងលិចរបស់អ៊ុយក្រែន ស្វែងរកវិធីថ្មីដើម្បីរឹតបន្តឹងការដាក់ទណ្ឌកម្មលើរុស្ស៊ី រាប់ចាប់តាំងពីការគ្រប់គ្រងការនាំចេញ រហូតដល់ការរឹតបន្តឹងទិដ្ឋាការ និងតម្លៃប្រេង។
កន្លងមកសម្ព័ន្ធមិត្តមួយចំនួនរបស់សហរដ្ឋអាមេរិក បានប្រឆាំងនឹងគំនិតហាមឃាត់ពាណិជ្ជកម្មទ្រង់ទ្រាយធំជាមុន ហើយចាំចេញការលើកលែងតាមប្រភេទតាមក្រោយ។
ជាឧទាហរណ៍ សហភាពអឺរ៉ុបមានវិធីសាស្រ្តផ្ទាល់ខ្លួន ហើយបច្ចុប្បន្នក៏កំពុងចរចាគ្នាលើកញ្ចប់ទណ្ឌកម្មទី ១១ របស់ប្លុកលើរុស្ស៊ី ដោយភាគច្រើនផ្តោតលើបុគ្គល និងប្រទេសដែលគេចចេញពីការរឹតបន្តឹងពាណិជ្ជកម្មដែលមានស្រាប់។
ត្រង់ចំណុចនេះផងដែរមន្រ្តីកំពូលរបស់រដ្ឋាភិបាលអាល្លឺម៉ង់ម្នាក់ បានលើកឡើងប្រាប់រ៉យទ័រថា៖ «វិធីសាស្រ្តដែលត្រូវបានពិភាក្សា«យើងហាមឃាត់អ្វីគ្រប់យ៉ាងជាមុន ហើយចាំអនុញ្ញាតឱ្យមានការលើកលែងជាក្រោយ» នឹងមិនដំណើរការតាមការយល់ឃើញរបស់យើងនោះទេ។ យើងចង់ឱ្យវាបានច្បាស់លាស់ខ្លាំង ដើម្បីជៀសវាងផលប៉ះពាល់ដោយអចេតនា»៕
ប្រែសម្រួល៖ហួន ឌីណា
