ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា ការប្រើពាក្យញុះញង់ ឬក៏បង្កើតជាផ្ទាំងទស្សនីយភាពដែលមានន័យរារាំងមិនឱ្យប្រជាពលរដ្ឋចេញទៅបោះឆ្នោត បំបាក់ទឹកចិត្តប្រជាពលរដ្ឋទៅបោះឆ្នោត គឺជាអំពើល្មើសច្បាប់។ សូមប្រជាពលរដ្ឋកុំជឿទៅលើអ្វីដែលជាការឃោសនាញុះញង់ធ្វើឱ្យមានភាពច្របូលច្របល់។ សូមអំពាវនាវឱ្យអាជ្ញាធរមានសមត្ថកិច្ចចាត់វិធានការដើម្បីទប់ស្កាត់នូវរាល់អំពើល្មើស និងការញុះញង់ទាំងឡាយដែលធ្វើឱ្យបាត់បង់ដល់សណ្តាប់ធ្នាប់សាធារណៈ ធ្វើឱ្យខូច ឬប៉ះពាល់ដល់ទឹកចិត្តបោះឆ្នោតរបស់ប្រជាពលរដ្ឋ។

ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានមានប្រសាសន៍ប្រាប់ AMS នៅល្ងាចថ្ងៃទី៥ ខែមិថុនា នេះថា កម្ពុជាបានឆ្ពោះទៅរកការកសាងលទ្ធិប្រជាធិបតេយ្យតាមរយៈការបោះឆ្នោត ហើយពីការបោះឆ្នោតមួយទៅការបោះឆ្នោតមួយប្រជាពលរដ្ឋបង្ហាញមតិ បញ្ចេញមតិតាមរយៈសន្លឹកឆ្នោតរបស់ខ្លួនដើម្បីជ្រើសរើសក្រុមដឹកនាំ មេដឹកនាំ ឬក៏ជ្រើសរើសរដ្ឋាភិបាល។ ការប្រើពាក្យញុះញង់ ឬក៏បង្កើតជាផ្ទាំងទស្សនីយភាពដែលមានន័យរារាំងមិនឱ្យប្រជាពលរដ្ឋចេញទៅបោះឆ្នោត បំបាក់ទឹកចិត្តប្រជាពលរដ្ឋទៅបោះឆ្នោត គឺជាអំពើល្មើសច្បាប់ ដែលបញ្ជាក់ថា ក្រុមអ្នកផ្តួចផ្តើមគំនិត ព្រមទាំងអ្នកសម្តែង គឺជាអ្នកដែលយកពាក្យប្រជាធិបតេយ្យធ្វើជាខែល ប៉ុន្តែផ្ទុយទៅវិញពួកខ្លួន គឺជាអ្នកបំផ្លាញលទ្ធិប្រជាធិបតេយ្យ ជាអ្នកបំផ្លាញ និងរារាំងការបោះឆ្នោតនៅក្នុងប្រទេសកម្ពុជា។

អ្នកនាំពាក្យ គ.ជ.ប បានបញ្ជាក់ថា “កម្ពុជាមានការប្តេជ្ញាចិត្តដើម្បីពង្រឹងលទ្ធិប្រជាធិបតេយ្យតាមរយៈ៥ឆ្នាំ មានការបោះឆ្នោតសកលម្តង ហើយការបោះឆ្នោតជ្រើសតាំងតំណាងរាស្ត្រ គឺជាការបោះឆ្នោតដែលប្រជាពលរដ្ឋនៅទូទាំងប្រទេសជាង៩លាន៧សែននាក់ ដែលមានឈ្មោះក្នុងបញ្ជីត្រៀមចេញទៅបោះឆ្នោត ហើយសូមប្រជាពលរដ្ឋកុំជឿទៅលើអ្វីដែលជាការឃោសនាអកុសល អ្វីដែលរារាំងដល់សមានចិត្តបងប្អូន ត្រូវចេញទៅបោះឆ្នោតដើម្បីធានាថា ប្រជាពលរដ្ឋរួមចំណែកក្នុងការកសាងប្រទេសតាមរយៈការបញញចេញសម្លេងក្នុងសន្លឹកឆ្នោត។ អ្នកដែលរារាំងញុះញង់ប្រជាពលរដ្ឋមិនឱ្យចេញទៅបោះឆ្នោត អ្នកនោះកំពុងតែធ្វើឱ្យមានភាពច្របូលច្របល់ដែលនឹងត្រូវទទួលខុសត្រូវចំពោះមុខច្បាប់”។

ជាមួយគ្នានេះ អ្នកនាំពាក្យ គ.ជ.ប បានអំពាវនាវឱ្យអាជ្ញាធរមានសមត្ថកិច្ចចាត់វិធានការដើម្បីទប់ស្កាត់នូវរាល់អំពើល្មើស និងការញុះញង់ទាំងឡាយដែលធ្វើឱ្យបាត់បង់ដល់សណ្តាប់ធ្នាប់សាធារណៈ ធ្វើឱ្យខូច ឬប៉ះពាល់ដល់ទឹកចិត្តបោះឆ្នោតរបស់ប្រជាពលរដ្ឋ។ ហើយប្រជាពលរដ្ឋដែលមានឈ្មោះបោះឆ្នោតជាង ៩លាន ៧សែននាក់ សូមកុំបោះបង់សិទ្ធិបោះឆ្នោតរបស់ខ្លួន។ គ.ជ.ប បានបង្កលក្ខណៈងាយស្រួល រាជរដ្ឋាភិបាលនិងសមត្ថកិច្ចបានបង្កលក្ខណៈឱ្យស្រួលឱ្យចេញទៅបោះឆ្នោត ហើយធានារក្សាសន្តិសុខ សុវត្ថិភាព និងសណ្តាប់ធ្នាប់នោះថ្ងៃបោះឆ្នោងផងដែរ ហើយការដែលបោះបង់សិទ្ធិផ្ទាល់ខ្លួនមិនទៅបោះឆ្នោតនោះមានន័យថា ធ្វើឱ្យមានការយឺតយ៉ាវក្នុងជំហានរីកចម្រើនលទ្ធិប្រជាធិបតេយ្យនៅក្នុងប្រទេសកម្ពុជា ហើយសូមកុំជឿតាមពាក្យញុះញង់ណាមួយ ត្រូវចេញទៅបោះឆ្នោតឲ្យបានគ្រប់ៗគ្នា៕
ដោយ៖ពលជ័យ