អឺរ៉ុប៖ យ៉ាងហោចណាស់ ជនភៀសខ្លួនចំនួន ៧៩នាក់ បានលង់ទឹកស្លាប់ កាលពីព្រឹកថ្ងៃពុធ ខណៈមនុស្ស​រាប់រយនាក់ទៀតអាច​នឹងបន្ត​បាត់បង់ជីវិត ឬបាត់ខ្លួន បន្ទាប់ពីទូកដឹក​លើសចំណុះបាន​ក្រឡាប់ ហើយ​លិច​នៅកណ្តាលសមុទ្រ​ ប្រទេសក្រិក ដែលនេះគឺជាគ្រោះមហន្តរាយការ​ដឹកជញ្ជូនដ៏អាក្រក់បំផុតមួយ​របស់​​​អឺរ៉ុប។

ខណៈ កិច្ចខិតខំប្រឹងប្រែងស្វែងរកអ្នកនៅរស់រានមានជីវិតកំពុងបន្ត អង្គការ​សប្បុរសធម៌​ជួយសង្រ្គោះរបស់អឺរ៉ុបបានឱ្យដឹងថា ខ្លួនជឿថាទូកនេសាទនោះមានប្រវែង ២០-៣០ ម៉ែត្រ ហើយផ្ទុកមនុស្សប្រហែល ៧៥០ នាក់នៅពេលវាបានលិចនោះ។  ចំណែកអាជ្ញាធរក្រិកបាននិយាយថា វាហាក់ដូចជាឆាប់ពេកក្នុងការប៉ាន់ស្មានចំនួន​នៅពេល​នេះ។
បើតាម Alarm Phone ជាគម្រោងដែលដំណើរការតាំងពីឆ្នាំ ២០១៤ ដោយអ្នកស្ម័គ្រចិត្តមកពីអឺរ៉ុប
ទុយនេស៊ី និងម៉ារ៉ុក ដែលប្តេជ្ញាចិត្តក្នុងការជួយសង្គ្រោះជនភៀសខ្លួនតាមសមុទ្រ បាននិយាយថា ខ្លួនទទួលបានការជូន​ដំណឹងពីមនុស្ស​នៅលើកប៉ាល់ដែល​មានការភ័យខ្លាច ពី​ប្រទេស​ក្រិក​កាលពី​ល្ងាចថ្ងៃអង្គារ ក៏ប៉ុន្តែស្រាប់តែបាត់​ទំនាក់ទំនងភ្លាមៗ។

Alarm Phone បានបញ្ជាក់នៅលើ Twitter ថា៖ «បើយោងតាមការជូនដំណឹងនោះ មានមនុស្សចំនួន ៧៥០ នាក់នៅលើទូក ឥឡូវនេះយើងឮរបាយការណ៍អំពីការលិចកប៉ាល់ ហើយការភ័យខ្លាចរបស់ពួក​គេនោះគឺជាការពិត»។

អាជ្ញាធរក្រិកបានបញ្ជាក់ថា វាមិនទាន់ច្បាស់ទេថា តើកប៉ាល់នេះផ្ទុកមនុស្សចំនួនប៉ុន្មាននៅពេល​វាលិច តែមកទល់ពេលនេះមានមនុស្សចំនួន ១០៤ នាក់ហើយដែល​ត្រូវបានជួយ​សង្គ្រោះ។

អ្នកនាំពាក្យឆ្មាំសមុទ្រ លោក Nikos Alexiou បានប្រាប់ទូរទស្សន៍ MEGA របស់ប្រទេសក្រិកថា «វាមិនមានសុវត្ថិភាពទេក្នុងការផ្តល់ជាតួលេខជាក់លាក់ យើងមិនដឹងថា​តើមានមនុស្សប៉ុន្មាន​នាក់ត្រូវបានផ្ទុកនោះទេ ព្រោះនៅលើទូកពោរពេញដោយមនុស្សពេញតែម្តង»។

ឆ្មាំសមុទ្របានបន្ថែមថា ជាងនេះទៅទៀតនោះ អ្នកកាន់កាប់ទូកនោះបានបដិសេធទទួកយកជំនួយកាលពីល្ងាចថ្ងៃអង្គារ។

ប្រទេសក្រិកគឺជាច្រកដ៏សំខាន់មួយសម្រាប់ការធ្វើដំណើរចូលទៅក្នុងសហភាពអឺរ៉ុបសម្រាប់ជនភៀសខ្លួន និងជនចំណាកស្រុកមកពីមជ្ឈិមបូព៌ា អាស៊ី និងអាហ្វ្រិក ដោយភាគច្រើនឆ្លងចូលកោះ​របស់ប្រទេស​ក្រិក ពីតំបន់របស់​ទួរគីដែលនៅក្បែរនោះ។

ក៏ប៉ុន្តែចាប់តាំងពី រដ្ឋបាលអភិរក្សនិយមនៃប្រទេសក្រិក របស់លោក Kyriakos Mitsotakis បានណែនាំឱ្យមាន​ការឃ្លាំមើល​​តឹងរ៉ឹងជាងមុននៅជំរុំជនភៀសខ្លួន។ ការ​ជ្រើសរើស​ធ្វើដំណើរដ៏វែងឆ្ងាយមានការ​កើនឡើង ហើយវាមានគ្រោះថ្នាក់ជាងមុន ពោលគឺជាការធ្វើដំណើរពីប្រទេសទួរគីទៅកាន់ប្រទេសអ៊ីតាលី តាមរយៈ​ប្រទេសក្រិកនេះ។

ទូរទស្សន៍រដ្ឋ ERT បាននិយាយថា ទូកដែលបានលិចគឺកំពុងធ្វើដំណើរទៅកាន់ប្រទេសអ៊ីតាលី ដោយបានចេញដំណើរពីទីក្រុង Tobruk នៃប្រទេសលីប៊ី ដែលស្ថិតនៅភាគខាងត្បូងនៃកោះ Crete របស់ប្រទេសក្រិក។ បើទោះបីជា​យ៉ាងណាអាជ្ញាធរក្រិកមិនបានបញ្ជាក់ពីច្រកចេញដំណើររបស់ទូក​មួយនោះទេ។

ការលិចកប៉ាល់ គឺជាគ្រោះមហន្តរាយអាក្រក់បំផុតនៅក្រិចក្នុងឆ្នាំនេះ និងជាគ្រោះមហន្តរាយអាក្រក់បំផុតមួយ​នៅអឺរ៉ុប។ កាលពីខែកុម្ភៈ មនុស្សចំនួន ៩៦ នាក់បានស្លាប់​នៅពេលដែលទូក​ឈើរបស់ពួកគេ​បានបុកថ្ម​នៅលើឆ្នេរ Calabrian របស់ប្រទេសអ៊ីតាលី អំឡុងពេលមានព្យុះ៕

ប្រែសម្រួល៖ ស្រ៊ុន សិរីវឌ្ឍនៈ

ប្រភព៖ At least 79 drown, hundreds missing in migrant shipwreck off Greece