ភ្នំពេញ៖ បេឡាជាតិរបបសន្តិសុខសង្គម (ប.ស.ស) បានសម្រេចដាក់ឱ្យអនុវត្តគម្រោងសាកល្បងផ្នែកថែទាំសុខភាព សម្រាប់បុគ្គលស្វ័យនិយោជន៍ដែលបានចុះបញ្ជីជាមួយ ប.ស.ស ដើម្បីទទួលបានអត្ថប្រយោជន៍ដូចកម្មករនិយោជិតទូទៅដែលធ្វើការ នៅក្នុងក្រុមហ៊ុន រោងចក្រ សហគ្រាសផងដែរ។

យោងតាមសេចក្ដីសម្រេចរបស់បេឡាជាតិរបបសន្តិសង្គមស្ដីពីការដាក់ឱ្យអនុវត្តគម្រោងសាកល្បងរបបសន្តិសុខសង្គមតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ ដែលចុះថ្ងៃទី២០ ខែមិថុនា ឆ្នាំ២០២៣បានឱ្យដឹងថា បុគ្គលស្វ័យនិយោជន៍ (សំដៅដល់ជនដែលប្រកបការងារ ឬ មុខរបររកចំណូលផ្ទាល់ខ្លួន និងមិនមានប្រើប្រាស់កម្មករនិយោជិតនៅក្នុងសកម្មភាពការងារ ឬមុខរបរ របស់ខ្លួន) ដែលមានអាយុមិនលើសពី៦០ឆ្នាំ។ ពួកគាត់មានសិទ្ធិក្នុងការស្នើសុំចុះបញ្ជី ក្នុងគម្រោងសាកល្បងរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តនៅប.ស.សបាន។
ក្នុ​ងនោះ​​​​​បុគ្គល​​ស្វ័យនិយោជន៍ ក៏ត្រូវតម្រូវឱ្យភាគទានគម្រោងសាកល្បងរបបសន្តិសុខសង្គមផ្នែកថែទាំសុខភាព ត្រូវកំណត់ស្មើនឹង ២,៦ភាគរយ នៃប្រាក់ចំណូលរបស់ខ្លួន។

បេឡាជាតិរបបសន្តិសង្គម បានលើកឡើងថា នៅពេលដែលបុគ្គលស្វ័យនិយោជន៍ បានក្លាយជាសមាជិក ប.ស.ស ពួកគាត់នឹងទទួលបានរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត រួមមាន សេវាព្យាបាល និងថែទាំវេជ្ជសាស្ត្រ ហើយនិងប្រាក់បំណាច់មាតុភាព ដោយឥតគិតថ្លៃនៅតាមមូលដ្ឋានសុខាភិបាលដែលជាដៃគូប.ស.ស។
ប.ស.ស. ​បន្តថា៖«សម្រាប់សេវាព្យាបាល និងថែទាំវេជ្ជសាស្ត្រ សមាជិកអាចប្រើប្រាស់សេវានេះបាន លុះត្រាបុគ្គលស្វ័យនិយោជន៍បានបង់ភាគទានឱ្យ ប.ស.ស បានពីរខែជាប់គ្នា។ ចំណែកការទទួលបានប្រាក់បំណាច់មាតុភាព សមាជិកដែលជាស្ដ្រីមានសិទ្ធិទទួលបានប្រាក់នេះ លុះត្រាតែបានបង់ភាគទានឱ្យ ប.ស.ស ចាប់ពី ៩ខែឡើង»។

ជុំវិញរឿងនេះ លោក អាត់ ធន់ ប្រធានសហភាពការងារកម្ពុជា (CLC) បានឱ្យដឹងថា នេះជាការសម្រេចថ្មីមួយទៀតរបស់ ប.ស.ស ដែលផ្ដល់របបសន្តិសុខសង្គមផ្នែកថែទាំសុខភាព សម្រាប់បុគ្គលស្វ័យនិយោជន៍ ហើយវាជារឿងល្អសម្រាប់អ្នកដែលប្រកបមុខរបរដែលរកចំណូលខ្លួនឯង ខណៈដែលកម្មវិធីនេះនឹងត្រូវអនុវត្តសាកល្បងជាងមួយឆ្នាំ ដើម្បីធ្វើការវាយតម្លៃចំពោះការចំណាយថវិការដ្ឋតិច ឫក៏ច្រើន។ ក្រៅពីនេះចំពោះកម្មវិធីពីរផ្សេងទៀតដូចជា ហានិភ័យការងារ និងប្រាក់សោធន៍ លោកថា
ប.ស.ស មិនទាន់ដាក់ឱ្យអនុវត្តនោះទេ ប៉ុន្តែ ប.ស.ស នឹងគ្រោងពង្រីកដាក់ឱ្យអនុវត្តកម្មវិធីទាំងពីរនេះដូចគ្នាបន្ទាប់ពីបញ្ចប់ការអនុវត្តសាកល្បងផ្នែកថែទាំសុខភាពសម្រាប់បុគ្គលស្វ័យនិយោជន៍។

លោក អាត់ ធន់ បញ្ជាក់ថា៖ «អ៊ីចឹង! នេះជាព័ត៌មានដែលយើងបានធ្វើជុំវិញរឿងហ្នឹង ហើយក្នុងនាមខ្ញុំជាសមាជិកក្រុមប្រឹក្សាភិបាលមួយរូប ខ្ញុំនឹងតាមដាន និងធ្វើយ៉ាងណាឱ្យកម្មករនិយោជិតទាំងក្នុង និងក្រៅប្រព័ន្ធ មានសិទ្ធិប្រើប្រាស់សេវា ប.ស.ស ឫរបបសន្តិសុខសង្គមទាំងអស់គ្នា»។

ដោយឡែក លោក ម៉ាន់ សេងហាក់ ប្រធានសហព័ន្ធសហជីពឥទ្ធិពលការងារ ក៏បានថ្លែងថា ការសម្រេចដាក់ឱ្យអនុវត្តគម្រោងសាកល្បងរបបសន្តិសុខសង្គមផ្នែកថែទាំសុខភាពសម្រាប់បុគ្គលស្វ័យនិយោជន៍នេះ វាគឺជារឿងល្អសម្រាប់ដែលប្រកបមុខរបរការងារ ឫមុខរបរដែលរកចំណូលផ្ទាល់ខ្លួន​។
ប៉ុន្តែ​​លោកថា ចំពោះការអនុវត្តសាកល្បង វាមានន័យថាជាការប្រើប្រាស់បណ្ដោះអាសន្ន ហេតុនេះការផ្ដល់សេវាសុខភាពផ្សេង វាមិនអាចគ្របដណ្ដប់បានទាំងស្រុងឡើយ៕

ដោយ៖ ជា សុខនី