សម្តេចតេជោ ហ៊ុន សែន បានដាក់បញ្ជាដល់អភិបាលរាជធានីភ្នំពេញ ត្រូវបញ្ចេញរថយន្តក្រុង ដឹកជញ្ជូនពលរដ្ឋ ដែលត្រូវធ្វើដំណើរពីរាជធានីទៅបោះឆ្នោតតាមបណ្តាខេត្ត ដែលជាផ្នែកមួយជួយសម្រួលការធ្វើដំណើររបស់កម្មករ និងកម្មការីនីតាមរោងចក្រ។

ប្រសាសន៍ដាក់បញ្ជា បានធ្វើតាមសារសម្លេងមួយនៅថ្ងៃទី១១កក្កដានេះ ខណៈដែលការបោះឆ្នោតជ្រើសតាំងតំណាង រាស្ត្រនីតិកាលទី៧ នឹងមកដល់ប្រមាណជាង១០ថ្ងៃខាងមុខនេះ។

រាជធានីភ្នំពេញ គឺជាកន្លែងដែលមានការស្នាក់នៅរបស់កម្មករ និងកម្មការីនីច្រើនសិបម៉ឺននាក់ ដែលមានទីលំនៅក្នុងខេត្តផ្សេងៗ។ សម្តេចតេជោបានបញ្ជាការរៀបចំដឹកជញ្ជូននេះ ក្នុងលក្ខណៈត្រឹមត្រូវ និងមានកិច្ចសហការគ្នារវាងអភិបាលរាជធានី ជាមួយនឹងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។