របាយការណ៍ អ.ស.ប ៖ សាលារៀនគួរតែហាមឃាត់ស្មានហ្វូន ដើម្បីធ្វើឱ្យគុណភាពអប់រំប្រសើរឡើង
អ.ស.ប៖ របាយការណ៍នៃអង្គការយូណេស្កូ បានណែនាំថា សាលារៀនគួរតែហាមឃាត់ការប្រើប្រាស់ទូរស័ព្ទស្មាតហ្វូនរបស់សិស្សក្នុងសាលា ដើម្បីជួយបញ្ឈប់ការរំខានក្នុងថ្នាក់រៀន ធ្វើឱ្យការសិក្សាកាន់តែប្រសើរឡើង និងជួយការពារសិស្សពីការគំរាមកំហែងតាមអ៊ីនធឺណិត។
កាសែត Guardian បានរាយការណ៍កាលពីថ្ងៃពុធ ដោយដកស្រង់របាយការណ៍របស់អង្គការយូណេស្កូ ដែលគូសបញ្ជាក់ថា ការប្រើប្រាស់ទូរស័ព្ទស្មាតហ្វូនច្រើនពេក គឺជាកត្តាមួយធ្វើឱ្យដំណើរការអប់រំមិនល្អ និងធ្វើឱ្យប៉ះពាល់ដល់ផ្លូវអារម្មណ៍របស់សិស្សកាន់តែអាក្រក់ទៅៗ។
របាយការណ៍របស់ភ្នាក់ងារអង្គការសហប្រជាជាតិដដែល បានបន្ថែមថា បច្ចេកវិទ្យាឌីជីថល រួមទាំងបញ្ញាសិប្បនិម្មិត មិនគួរមានអាទិភាពលើចក្ខុវិស័យរបស់មនុស្សជាធំ ចំពោះការអប់រំ ឬជំនួសការបង្រៀនដោយផ្ទាល់មុខគ្នា នោះទេ។
របាយការណ៍បន្ថែមថា៖ «មិនមែនការផ្លាស់ប្តូរទាំងអស់ សុទ្ធតែមានការរីកចម្រើននោះទេ។ គ្រប់ការដែលអាចធ្វើទៅបាន មិនមែនមានន័យថាគួរតែធ្វើនោះទេ»។
អគ្គនាយិការអង្គការយូណេស្កូ លោកស្រី Audrey Aloza បានប្រាប់កាសែត Guardian ថា៖ «បដិវត្តន៍ឌីជីថលមានសក្តានុពលដែលមិនអាចវាស់វែងបាន។ ប៉ុន្តែដូចការព្រមានស្ដីពីរបៀបដែលគេគួរគ្រប់គ្រងវាក្នុងសង្គមដែរ ការយកចិត្តទុកដាក់ស្រដៀងគ្នា ក៏ត្រូវធ្វើឡើងក្នុងវិស័យអប់រំផងដែរ»។
លោកស្រី Aloza លើកឡើងថា ការប្រើប្រាស់ឌីជីថល ត្រូវតែសម្រាប់ការពង្រឹងបទពិសោធន៍សិក្សា និងសម្រាប់សុខុមាលភាពរបស់សិស្ស និងគ្រូ មិនមែនធ្វើឱ្យប៉ះពាល់ដល់ពួកគេនោះទេ។ លោកស្រីបន្តថា៖ «រក្សាអ្វី ជាតម្រូវការរបស់សិស្សជាមុនសិន រួចហើយគាំទ្រគ្រូ។ ការតភ្ជាប់អ៊ិនធឺណិត មិនអាចជំនួសការឆ្លើយឆ្លងគ្នាដោយផ្ទាល់បានទេ»។
អង្គការយូណេស្កូនិយាយក្នុងរបាយការណ៍ថា បណ្តាប្រទេសចាំបាច់ត្រូវធានាថា ពួកគេមានគោលបំណង និងគោលការណ៍ច្បាស់លាស់ ដើម្បីធានាថា បច្ចេកវិទ្យាឌីជីថលក្នុងការអប់រំមានអត្ថប្រយោជន៍ និងជៀសវាងគ្រោះថ្នាក់ ទាំងចំពោះសុខុមាលភាពសិស្សម្នាក់ៗ និងចំពោះលទ្ធិប្រជាធិបតេយ្យ និងសិទ្ធិមនុស្ស ដូចជាការរំលោភលើឯកជនភាព និងការបង្កការស្អប់ខ្ពើមលើអ៊ិនធឺណិតជាដើម។
ផ្អែកលើការវិភាគលើប្រព័ន្ធអប់រំចំនួន ២០០ ជុំវិញពិភពលោក អង្គការយូណេស្កូបានប៉ាន់ប្រមាណថា ប្រទេសមួយក្នុងចំណោមប្រទេសចំនួន ៦ បានហាមឃាត់ការប្រើប្រាស់ស្មាតហ្វូននៅក្នុងសាលារៀន ទាំងតាមរយៈច្បាប់ ឬការណែនាំ។ ទាំងនេះ រួមមានប្រទេសហ្វាំងឡង់ និងបារាំងដែលបានណែនាំគោលនយោបាយរបស់ខ្លួនក្នុងឆ្នាំ ២០១៨ និងហូឡង់ ដែលនឹងចាប់ផ្ដើមការរឹតបណ្ដឹងចាប់ពីឆ្នាំ ២០២៤ ទៅ៕
ប្រែសម្រួល៖ហួន ឌីណា ប្រភព៖ ‘Put learners first’: Unesco calls for global ban on smartphones in schools
