ប៊ុយដាប៉ែស៖ ប្រមុខការទូតហុងគ្រីបាននិយាយថា ជម្លោះរវាងរុស្ស៊ី និងអ៊ុយក្រែនមិនអាចដោះស្រាយបាន តាមរយៈការបង្ហូរឈាមគ្នានៅលើសមរភូមិនោះទេ។

សារព័ត៌មាន RT បានរាយការណ៍ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាក់ថា បច្ចុប្បន្ន ទីក្រុងមូស្គូបានត្រៀមខ្លួនរួចរាល់ហើយ ក្នុងការស្វែងរកដំណោះស្រាយការទូត ដើម្បីបញ្ចប់ជម្លោះនៅអ៊ុយក្រែន។ ប៉ុន្តែស្របពេលជាមួយគ្នានេះ អ៊ុយក្រែន និងអ្នកគាំទ្ររបស់ខ្លួន រួមទាំងសហរដ្ឋអាមេរិក និងអង្គការណាតូ នៅតែបដិសេធមិនចូលរួមក្នុងកិច្ចចរចាបែបនេះទេ។

ជុំវិញបញ្ហានេះដែរ រដ្ឋមន្រ្តីការបរទេសហុងគ្រី លោក ភីធើ ស៊ីចាតូ បានថ្លែងថា លក្ខខណ្ឌសម្រាប់ការចរចាដើម្បីបញ្ចប់ជម្លោះនៅអ៊ុយក្រែន នឹងកាន់តែអាក្រក់ទៅៗ ហើយលោកជឿជាក់ថា ភាគីទាំងពីរនឹងមិនមានជំហរល្អសម្រាប់ការចរចាជាងពេលនេះទេ។

ទាំងនាយករដ្ឋមន្រ្តីហុងគ្រី និងមន្រ្តីជាន់ខ្ពស់ហុងគ្រីបានអំពាវនាវម្តងហើយម្តងទៀត ឱ្យមានបទឈប់បាញ់ និងកិច្ចព្រមព្រៀងសន្តិភាពនៅអ៊ុយក្រែន ហើយបានរិះគន់សហភាពអឺរ៉ុបចំពោះការបញ្ជូនអាវុធទៅឱ្យអ៊ុយក្រែន។ កាលពីខែមិថុនា នាយករដ្ឋមន្រ្តីហុងគ្រីក៏បានប្រាប់កាសែតអាល្លឺម៉ង់ Blid ដែរថា ជ័យជម្នះរបស់អ៊ុយក្រែននៅលើសមរភូមិ គឺជារឿងមិនអាចទៅរួចទេ៕ ប្រភព៖ RT ប្រែសម្រួលដោយ៖ ឈឹម ទីណា