ព្យុងយ៉ាង៖ នៅក្នុងកិច្ចប្រជុំមួយរបស់គណៈកម្មាការយោធាកណ្តាល នៅថ្ងៃពុធសប្តាហ៍នេះ មេដឹកនាំកូរ៉េខាងជើង លោក គីម ជុងអ៊ុន បានបណ្តេញប្រធានអគ្គសេនាធិការ លោក Pak Su Il ហើយជំនួសដោយអនុសេនាធិការ លោក Ri Yong Gil នេះបើតាមការចុះផ្សាយរបស់ទីភ្នាក់ងារសារព័ត៌មាន KCNA នៅថ្ងៃទី១០ ខែសីហា ឆ្នាំ២០២៣។

មេដឹកនាំកូរ៉េខាងជើង លោក គីម ជុងអ៊ុន បានបណ្តេញឧត្តមសេនីយកំពូលរបស់គាត់ ហើយបានអំពាវនាវឱ្យបង្កើនការត្រៀមខ្លួនធ្វើសង្រ្គាម រួមទាំងការជំរុញការផលិតអាវុធ និងធ្វើសមយុទ្ធបន្ថែមទៀត។ ការវិវត្តន៍នេះបានកើតឡើងនៅក្នុងកិច្ចប្រជុំមួយរបស់គណៈកម្មាការយោធាកណ្តាល នៅថ្ងៃពុធសប្តាហ៍នេះ ពោលគឺប៉ុន្មានថ្ងៃបន្ទាប់ពីលោក គីម បានចុះធ្វើអធិការកិច្ចរោងចក្រផលិតអាវុធសំខាន់ៗមួយចំនួន។

ការគំរាមរបស់មេដឹកនាំកូរ៉េខាងជើងនេះដែរ បានកើតមានឡើងចំពេលដែលកូរ៉េខាងត្បូង និងសហរដ្ឋអាមេរិកត្រៀមរៀបចំធ្វើសមយុទ្ធរួមគ្នាដ៏សំខាន់មួយនៅចុងខែសីហានេះ។

បើតាមទីភ្នាក់ងារសារព័ត៌មាន KCNA របៀបវារៈនៃកិច្ចប្រជុំនៅថ្ងៃពុធនេះ គឺពិភាក្សាពីការត្រៀមខ្លួនក្នុងករណីផ្ទុះសង្រ្គាមពេញលេញ រួមទាំងការធានានូវមធ្យោបាយវាយប្រហារដ៏មានឥទ្ធិពល ដើម្បីធានាថា មានការត្រៀមខ្លួនខាងយោធាដ៏ល្អឥតខ្ចោះសម្រាប់សង្គ្រាម។

នាឱកាសនោះដែរ លោក គីម ក៏បានអំពាវនាវឱ្យគ្រឹះស្ថានឧស្សាហកម្មអាវុធទាំងអស់ ជំរុញការផលិតសព្វាវុធ និងឧបករណ៍យោធាជាច្រើនទៀត ក៏ដូចជាអំពាវនាវឱ្យធ្វើសមយុទ្ធសង្រ្គាមជាក់ស្តែង ដើម្បីដំណើរការប្រកបដោយប្រសិទ្ធភាពនូវសព្វាវុធ និងឧបករណ៍យោធាចុងក្រោយបង្អស់ដែលទើបដាក់ពង្រាយ៕ ប្រភព៖ AFP ប្រែសម្រួលដោយ៖ ឈឹម ទីណា