ភ្នំពេញ៖ ស្ថានទូតចិនប្រចាំកម្ពុជាប្រកាសរៀបចំ​ការប្រកួ​តផលិតវីដេអូខ្លីដើម្បីអបអរសាទរ និងរំឭកខួបលើកទី៦៥ នៃទំ​នាក់ទំនងការទូត​ និងជាឆ្នាំមិត្តភាពកម្ពុជា-ចិន ក្នុងឆ្នាំ២០២៣​ និងដើម្បីបង្ហាញការវិវឌ្ឍ​នៃទំនាក់ទំ​នងប្រទេសទាំងពីរ ការផ្លាស់ប្តូររវាងប្រជាជន និងប្រជាជន ​ពិសេសគំនិតបង្កើតសហគម​ន៍កម្ពុជា-ចិន ដែ​ល​មានអនាគតរួមគ្នា។​

តាមរយៈការប្រកាសរបស់ស្ថានទូតចិនប្រចាំកម្ពុជា កាល​ពី​សប្តាហ៍មុន​ បានបញ្ជាក់ពីការប្រកួតជ្រើសរើសស្នាដៃផលិតវីដេអូខ្លីពាក់ព័ន្ធប្រធានបទជុំវិញទំនាក់ទំនងកម្ពុជា និងចិន ដែលជាប្រកួតមិត្តភាព ក្នុងន័យប​ង្ហា​ញពីទំនាក់ទំនងមាសរវាងប្រទេសទាំង២។​

ស្ថានទូតចិនប្រចាំកម្ពុជាបានបន្ត​ថា បេក្ខជនដែលមានចំណាប់អារម្មណ៍អាចផ្ញើស្នាដៃរបស់ខ្លួនដោយភ្ជា​ប់​ជាមួយឈ្មោះខ្លួន ឬឈ្មោះស្ថាប័ន​ តាមរយៈបណ្តាញសង្គមនានាដូចជា៖ Kuaishou, Douyin, Bilibili, Facebook, Twitter, YouTube, Kwai និង​TikTok ដល់ថ្ងៃទី២៣ ខែសីហា ហើយការវាយតម្លៃនឹងត្រូវធ្វើ​ឡើងនៅថ្ងៃទី ២៤ និង២៤​ សីហា។ អ្នកឈ្នះនឹងត្រូវប្រកាសលទ្ធផលនៅតាមក្រោយ។​

ស្ថានទូតចិនបាន​សង្កត់ធ្ងន់ថា  វីដេអូខ្លីៗដែលគ្របដណ្តប់លើទំនាក់ទំនងការទូតចិន-កម្ពុជា ការផ្លាស់ប្តូរប្រជាជន និងប្រជាជន និងសហគមន៍នៃជោគវាសនារួមគ្នាកម្ពុជា-ចិន ក្រោមគំនិតផ្តួចផ្តើមខ្សែក្រវាត់ និងផ្លូវ (BRI) ត្រូវបានកំណត់ជាអាទិភាពបំផុត។

លក្ខខណ្ឌនៅក្នុងការចូលរួ​ម គឺបេក្ខជនអាចបង្ហោះវីដេអូខ្លីរបស់ខ្លួនទៅតាមបណ្តាញសង្គមនានា​ ហើយប្រើ​កំណត់សម្គាល់ ឬ​hashtag ​ដើម្បីបង្ហោះ​ស្នាដៃខ្លួននៅលើបណ្តាញសង្គម Kuaishou, Douyin និង Bilibili ចំណែកការបង្ហោះនៅលើបណ្តាញសង្គម Facebook, Twitter, YouTube, Kwai និងTikTok​ វិញត្រូវប្រើ hashtag #GoldenIllumination​។​​

សម្រាប់ការចុះឈ្មោះចូលរួ​មប្រកួត បេក្ខជនត្រូវទាញយកទម្រង់បែបបទ និងចុះឈ្មោះតាមរយៈតំណភ្ជាប់​https://drive.google.com/drive/folders/1UQnvjIqPWMjVb5eDUExKxeywuEY4LboL?usp=share_link ឱ្យ​បាននៅមុនថ្ងៃទី​២៣ ខែសីហា រួច​ផ្ញើអ៊ីម៉ែលដោយភ្ជាប់ជាមួយវីដេអូទៅកាន់អ៊ីម៉ែល shortvideo@huanqiu.com។​

ជុំវិញបញ្ហានេះ លោក ឈត ប៊ុនថង ប្រធានវិទ្យាស្ថាន​ទំនាក់ទំនង​​វប្បធម៌ អប់រំ និងទេសចរណ៍​ នៃរាជ​បណ្ឌិ​ត្យសភាកម្ពុជា បាន​ប្រាប់​ឱ្យដឹងថា ​នៅក្នុងទំនាក់ទំនងការទូតរួមមានវិស័យនានាទាំង សង្គម នយោ​បា​យ សេដ្ឋកិច្ច វប្បធម៌ ជាដើម។

លោកថា ក្នុងការពង្រឹងទំនាក់ទំនងប្រទេស មិនត្រឹមតែពង្រឹងកម្រិតថ្នាក់ដឹកនាំនោះទេ គឺត្រូវពង្រឹងទាំងក​ម្រិ​តប្រជាជន និងប្រជាជន ដែលត្រូវមានសកម្មភាព ឬវេទិកានានាដើម្បីបង្កើតបរិយាសកាសលើកស្ទួយទំ​នាក់ទំនងទូតបាន តួយ៉ាងដូចជាការប្រកួតវីដេអូខ្លីនេះផង។​

លោក​ ឈត ប៊ុនថង ថ្លែងថា ៖ «ការប្រកួតប្រជែងស្នាដៃសិល្បៈវប្បធម៌ បើតាមខ្ញុំដឹង​ ខាងស្ថានទូត​ចិននៅ​​កម្ពុជាធ្លាប់បានធ្វើជាបន្តបន្ទាប់រួ​ចហើយ ដែលឆ្នាំនេះយើងបានធ្វើទៀត។ ការប្រជែងស្នាដៃនេះជុំវិញទំ​នាក់ទំនងកម្ពុជា-ចិន នេះជាចំណែកមួយជួយពូនជ្រុំទំនាក់ទំនងប្រទេសទាំង២ ឱ្យ​នៅស្ថិតស្ថេរ និងជិតស្និ​ទ្ធជាមួយគ្នាជានិច្ច ជាសកម្មភាពបង្ហាញពីទំនាក់ទំនងទ្វេភាគី ល្អប្រសើរ»​។​

លោកក៏​​បានថ្លែងកោតសរសើរដល់ស្ថានទូតចិនប្រចាំកម្ពុជាដែលរកនឹកបង្កើតកម្មវិធីបែបនេះ សម្រាប់ផ្តល់​លទ្ធភាពឱ្យ​សាធារណជនបានចូលរួម ដែលជាយុទ្ធវិធីមួយក្នុងការជំរុញទំនាក់ទំនងប្រទេសទាំង២ ផង ហើយដោយឡែកស្ថានទូតកម្ពុជានៅចិនក៏អាចបង្កើតកម្មវិធីសិល្បៈ វប្បធម៌ ក្នុងន័យនេះដូចគ្នា។​

សូមជម្រាប​ថា សម្រាប់អ្នកធ្លាប់បានចូលរួមប្រកួតស្នាដៃវីដេអូនៅក្នុងកម្មវិធីប្រកួតគម្រោងខ្សែក្រវ៉ាត់ និងផ្លូវ​ ​នឹងមិនត្រូវបានអនុញ្ញាតឱ្យ​ចូលរួមប្រកួតលើកនេះ​ម្តងទៀតបានឡើយ ហើយក្រោយការប្រកួត ស្នាដៃដែលត្រូវបានជ្រើសរើសនឹងត្រូវបានប្រើប្រាស់ផ្សព្វផ្សាយជាសាធារណៈ៕ ដោយ៖សំបាន ច័ន្ទដារ៉ា