អូស្ត្រាលីបញ្ជូនគណៈប្រតិភូទៅកាន់ប្រទេសចិនដើម្បី ធ្វើឱ្យទំនាក់ទំនងមានស្ថិរភាព
កង់បេរ៉ា៖ក្រសួងការបរទេសអូស្រ្តាលី បាននិយាយកាលពីថ្ងៃសៅរ៍ថា អូស្ត្រាលីនឹងបញ្ជូនគណៈប្រតិភូពីវិស័យឧស្សាហកម្ម រដ្ឋាភិបាល អប់រំ ប្រព័ន្ធផ្សព្វផ្សាយ និងសិល្បៈ ទៅកាន់ទីក្រុងប៉េកាំង ដើម្បីពិភាក្សាជាមួយសមភាគីចិននៅសប្តាហ៍ក្រោយ ដើម្បីធ្វើឱ្យទំនាក់ទំនងរវាងប្រទេសទាំងពីរមានស្ថិរភាព។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
ការិយាល័យរបស់លោកស្រីរដ្ឋមន្ត្រីការបរទេស ផេននី វ៉ុង បាននិយាយថា ពាណិជ្ជកម្ម ការវិនិយោគ ទំនាក់ទំនងរវាងប្រជាជន និងប្រជាជន ក៏ដូចជាសន្តិសុខក្នុងតំបន់ និងអន្តរជាតិ ស្ថិតក្នុងចំណោមបញ្ហាដែលត្រូវពិភាក្សានៅក្នុងកិច្ចពិភាក្សានៅថ្ងៃព្រហស្បតិ៍ខាងមុខនេះ។
ក្នុងសេចក្តីថ្លែងការណ៍ដដែល លោកស្រី វ៉ុង បានបន្ថែមថា កិច្ចពិភាក្សាតំណាងឱ្យ «ជំហានមួយទៀតឆ្ពោះទៅរកការបង្កើនការចូលរួមទ្វេភាគី និងស្ថេរភាពទំនាក់ទំនងរបស់យើង ជាមួយប្រទេសចិន»។
គួរបញ្ជាក់ថា កិច្ចសន្ទនាជាន់ខ្ពស់រវាងចិន និងអូស្រ្តាលី ត្រូវបានធ្វើឡើងជារៀងរាល់ឆ្នាំចាប់ពីឆ្នាំ ២០១៤ រហូតផ្អាកទៅវិញនៅឆ្នាំ ២០២០។
អតីតរដ្ឋមន្ត្រីពាណិជ្ជកម្មអូស្រ្តាលី លោក Craig Emerson នឹងដឹកនាំគណៈប្រតិភូអូស្ត្រាលីលើកនេះ ដែលចូលរួមដោយអតីតរដ្ឋមន្ត្រីការបរទេស លោកស្រី Julie Bishop។
ជុំវិញបញ្ហានេះ លោក Emerson បាននិយាយក្នុងសេចក្តីថ្លែងការណ៍ថា ចាប់តាំងពីកិច្ចសន្ទនាជាមួយចិនត្រូវបានបង្កើតឡើង វាគឺជាឱកាសមួយដើម្បីធ្វើឱ្យប្រទេសទាំង២ មានការយល់ដឹងគ្នាទៅវិញទៅមកកាន់តែស៊ីជម្រៅ។
ភាគីចិនឯនោះវិញ អតីតរដ្ឋមន្រ្តីការបរទេសចិន លោក លី ហ្សាវជីង(Li Zhaoxing) នឹងដឹកនាំគណៈប្រតិភូរបស់ទីក្រុងប៉េកាំង។
គួរកត់សម្គាល់ថា ការបន្តកិច្ចសន្ទនានាពេលនេះ បង្ហាញពីភាពប្រសើរឡើងវិញនៃទំនាក់ទំនងរវាងទីក្រុងប៉េកាំង និងទីក្រុងកង់បេរ៉ា បន្ទាប់ពីមានភាពតានតឹងអស់រយៈពេលជាច្រើនឆ្នាំ។
កន្លងមកចិនមានការសម្បារចំពោះអូស្រ្តាលីលើការចេញច្បាប់ ដែលប្រឆាំងនឹងប្រតិបត្តិការបន្សាយឥទ្ធិពលនៅបរទេស ដោយរារាំងក្រុមហ៊ុនចិន Huawei ពីកិច្ចសន្យា 5G ហើយអំពាវនាវឱ្យមានការស៊ើបអង្កេតឯករាជ្យលើប្រភពដើមនៃជំងឺរាតត្បាតកូវីដ១៩ជាដើម។
ជាមួយគ្នានេះដែរ ទំនាក់ទំនងរវាងប្រទេសទាំងបីរ ហាក់ដូចជាមានការល្អប្រសើរឡើងវិញ ចាប់តាំងពីរដ្ឋាភិបាលថ្មីរបស់អូស្រ្តាលី បានអនុម័តលើយុទ្ធសាស្រ្តយោគយល់ជាមួយចិន បន្ទាប់ពីការបោះឆ្នោតកាលពីឆ្នាំមុន៕
ប្រែសម្រួល៖ហួន ឌីណា
