កៀវ៖ អតីតទីប្រឹក្សាមេដឹកនាំអ៊ុយក្រែន បាននិយាយថា ការប្រឈមមុខដាក់គ្នារវាងទីក្រុងមូស្គូ និងទីក្រុងកៀវ អាចវិវត្តទៅជាសង្រ្គាមកូនកាត់ ហើយបន្តអូសបន្លាយជាច្រើនឆ្នាំ។

លោក អាឡិចស៊ី អារេសតូវីច ដែលជាអតីតទីប្រឹក្សាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានគូសបញ្ជាក់ថា ជម្លោះរវាងរុស្ស៊ី និងអ៊ុយក្រែន អាចនឹងបន្តរហូតដល់ជាងមួយទសវត្សរ៍ទៀត ព្រោះអ្នកជិតខាងទាំងពីរទំនងជាមិនអាចដោះស្រាយការខ្វែងគំនិតគ្នា ក្នុងពេលដ៏ខ្លីខាងមុខនេះបានទេ។

លោក អារេសតូវីច បាននិយាយក្នុងបទសម្ភាសដែលបង្ហោះលើ YouTube របស់ខ្លួននាពេលថ្មីៗនេះថា ប្រាកដណាស់ វានឹងអូសបន្លាយពេលរហូតដល់ឆ្នាំ២០៣៥។ រុស្ស៊ីកំពុងព្យាយាមបង្កើតចក្រភពថ្មី ដែលនឹងមិនកើតឡើងដោយគ្មានអ៊ុយក្រែនបានទេ។

កាលពីសប្តាហ៍មុន ទីភ្នាក់ងារព័ត៌មាន Bloomberg ក៏បានរាយការណ៍ដែរថា ប្រទេសមានសេដ្ឋកិច្ចអភិវឌ្ឍន៍ឈានមុខទាំង ៧ របស់ពិភពលោក (G7) ក៏បានជឿជាក់ដែរថា ជម្លោះរវាងរុស្ស៊ី និងអ៊ុយក្រែន អាចនឹងអូសបន្លាយពេលពី៦ ទៅ ៧ឆ្នាំទៅមុខទៀត៕ ប្រភព៖ RT ប្រែសម្រួលដោយ៖ ឈឹម ទីណា