សហរដ្ឋអាមេរិកប្រកាសរឹបអូសគេហទំព័រចំនួន១៧ដែលប្រើប្រាស់ដោយអ្នកបច្ចេកព័ត៌មានវិទ្យារបស់កូរ៉េខាងជើង
វ៉ាស៊ីនតោន៖ សហរដ្ឋអាមេរិក បាននិយាយកាលពីថ្ងៃពុធថា ខ្លួនបានរឹបអូសគេហទំព័រចំនួន ១៧ ដែលប្រើប្រាស់ដោយបុគ្គលិកផ្នែកបច្ចេកវិទ្យាព័ត៌មាន (IT) របស់កូរ៉េខាងជើង ក្នុងការបោកប្រាស់ និងបន្លំដើម្បីរកចំណូលទៅគាំទ្រកម្មវិធីសព្វាវុធរបស់កូរ៉េខាងជើង។
ក្រសួងយុត្តិធម៌អាមេរិក បាននិយាយនៅក្នុងសេចក្តីថ្លែងការណ៍មួយថា ការរឹបអូសវេបសាយទាំងនេះធ្វើឡើងកាលពីថ្ងៃអង្គារ ស្របតាមដីការបស់តុលាការនៃរដ្ឋ Missouri ។
ការរឹបអូសនៃគេហទំព័រចំនួន ១៧នេះដែរ ជាការអនុវត្តតាមដីការរបស់តុលាការដែលបានសម្រេចតាំងពីខែមករា ឆ្នាំ ២០២៣ មកម្ល៉េះ ដោយសហរដ្ឋអាមេរិកបានរកឃើញថា គេហទំព័រទាំងនេះបានបោកប្រាស់ និងបន្លំយកបានទឹកប្រាក់ប្រមាណ ១.៥ លានដុល្លារអាមេរិក។ នេះបើតាមក្រសួងយុត្តិធម៌កាលពីថ្ងៃពុធ។
តាមរយៈករណីនេះសហរដ្ឋអាមេរិក បានចោទប្រកាន់ប្រទេសកូរ៉េខាងជើងថា មានបណ្ដាញជាអ្នក ព័ត៌មានវិទ្យារាប់ពាន់នាក់នៅជុំវិញពិភពលោក ហើយដែលមានទីតាំងនៅជាចម្បងនៅក្នុងប្រទេសចិន និងរុស្ស៊ី។ ការដាក់ពង្រាយអ្នកព័ត៌មានវិទ្យាបែបនេះ គឺធ្វើឡើងក្នុងគោលបំណងបន្លំភ្នែកសហរដ្ឋអាមេរិក និងអាជីវកម្មផ្សេងទៀតនៅទូទាំងពិភពលោកឱ្យជួលពួកគេធ្វើជាបុគ្គលិកផ្នែក IT ដើម្បីបង្កើតប្រាក់ចំណូលសម្រាប់កម្មវិធីផលិតអាវុធប្រល័យលោករបស់ខ្លួន។
ក្រសួងយុត្តិធម៌បាននិយាយកាលពីថ្ងៃពុធថា៖ «អ្នកព័ត៌មានវិទ្យារបស់ប្រទេសកូរ៉េខាងជើង កំពុងតែជោរជន់នៅលើទីផ្សារការងារព័ត៌មានវិទ្យារបស់ពិភពលោក ដើម្បីរកចំណូលទៅផ្គត់ផ្គង់កម្មវិធីសព្វាវុធ របស់គេ ដូច្នេះហើយនិយោជកគួរមានការប្រុងប្រយ័ត្នជាងមុនក្នុងការរើសបុគ្គលិក។»
ស្រដៀងគ្នានេះ លោក Matthew G. Olsen ជំនួយការមេធាវីផ្នែកសន្តិសុខជាតិនៃនាយកដ្ឋានយុត្តិធម៌បាននិយាយថា៖ «ការរឹបអូសដែលបានប្រកាសនៅថ្ងៃអង្គារកន្លងទៅ ជាការការពារក្រុមហ៊ុនអាមេរិកពីការជ្រៀតចូលជាមួយកូដកុំព្យូទ័ររបស់កូរ៉េខាងជើង និងជួយធានាថាអាជីវកម្មអាមេរិកមិនត្រូវបានប្រើប្រាស់ដើម្បីផ្តល់ហិរញ្ញប្បទានដល់កម្មវិធីអាវុធរបស់របបផ្ដាច់ការមួយនោះ។»
ដើម្បីដោះស្រាយនូវបញ្ហានេះ ក្រសួងយុត្តិធម៌ប្តេជ្ញាធ្វើការជាមួយដៃគូវិស័យឯកជនដើម្បីការពារអាជីវកម្មរបស់សហរដ្ឋអាមេរិកពីការក្លែងបន្លំប្រភេទនេះ ដើម្បីបង្កើនសុវត្ថិភាពតាមប្រព័ន្ធអ៊ីនធឺណិតជារួម ជាពិសេសដើម្បីរារាំងដល់កម្មវិធីផលិតសព្វាវុធប្រល័យលោករបស់កូរ៉េខាងជើង។
យ៉ាងណាមិញ សហរដ្ឋអាមេរិក និងកូរ៉េខាងត្បូងកាលពីខែឧសភាបានប្រកាសដាក់ទណ្ឌកម្មថ្មីទៅលើកូរ៉េខាងជើងទាក់ទងនឹងបញ្ហាដែលបុគ្គលិកព័ត៌មានវិទ្យាជាច្រើននាក់កំពុងលាក់អត្តសញ្ញាណ ទីតាំង និងសញ្ជាតិរបស់ពួកគេ និងប្រើប្រាស់ឯកសារក្លែងបន្លំដើម្បីដាក់ពាក្យសុំការងារ។
កាលពីពេលកន្លងទៅ ក្រសួងការបរទេសសហរដ្ឋអាមេរិកក៏ធ្លាប់បានព្រមានដែរថា ការជួលបុគ្គលិកផ្នែកព័ត៌មានវិទ្យារបស់កូរ៉េខាងជើងក៏អាចជាមូលហេតុនៃការលួចកម្មសិទ្ធិបញ្ញាអាជីវកម្មផងដែរ៕
ប្រែសម្រួល៖ កែវ បុស្បា
