ខេត្តកំពង់ស្ពឺ នឹងត្រូវប្រកាសជាខេត្តអស់មីនទី ១៣ ក្រោម «គម្រោងសម្តេចតេជោសម្រាប់សកម្មភាពមីន»
ភ្នំពេញ៖ ខេត្តកំពង់ស្ពឺនឹងត្រូវបានប្រកាសជាខេត្តអស់មីនទី១៣នៅថ្ងៃទី ៣០ ខែតុលា ឆ្នាំ២០២៣ក្នុងឱកាសសម្ពោធអគាររដ្ឋបាលថ្មីនិងសមិទ្ធផលនានាក្នុងខេត្តកំពង់ស្ពឺក្រោមអធិបតីភាពដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា។
អភិបាលខេត្តកំពង់ស្ពឺឯកឧត្តម វ៉ី សំណាង បានឱ្យដឹងនៅថ្ងៃទី២៩ ខែតុលាថា ក្នុងនាមក្រុមប្រឹក្សា និងគណៈអភិបាលខេត្ត កងកម្លាំងប្រដាប់អាវុធ ប្រជាពលរដ្ឋទាំងមូលក្នុងខេត្ត ពិតជាមានមោទនភាពជាមួយនឹងអ្វីដែលកើតឡើងក្នុងខេត្តនេះ ពោលគឺជាខេត្តអស់មីនក្នុងឆ្នាំ ២០២៣ ។សមិទ្ធផលនេះសម្រេចបាន ក្រោមនយោបាយប្រកបដោយភាពឈ្លាសវៃ គតិបណ្ឌិតរបស់សម្តេចតេជោ ហ៊ុន សែន ដែលបានខិតខំរំដោះប្រទេសជាតិចេញពីសម័យកាលដ៏លំបាកដៃម្ខាងការពារ និងដៃម្ខាងកសាង ហើយបានប្រែក្លាយខេត្តជាច្រើនអស់មីន ក្នុងនោះក៏មានខេត្តកំពង់ស្ពឺ ដែលធ្លាប់តែសម្បូរទៅដោយចម្ការមីន»។
ឯកឧត្តមបានឱ្យដឹងទៀតថា ក្នុងខេត្តកំពង់ស្ពឺមានចម្ការមីនរហូតដល់ទៅ ៦៤០ ចម្ការមីន និងមានផ្ទៃដីរហូតទៅដល់ ៧៨គីឡូម៉ែត្រការ៉េ ។
សូមជម្រាបថា រាជធានី ខេត្ត ដែលប្រកាសអស់មីនចំនួន១២រួមមាន៖ រាជធានីភ្នំពេញ ខេត្តស្ទឹងត្រែង កែប ព្រៃវែង ព្រះសីហនុ ត្បូងឃ្មុំ កំពង់ចាម ស្វាយរៀង កំពង់ឆ្នាំង កណ្តាល តាកែវ និងខេត្តកំពត។
បើតាមអាជ្ញាធរមីន សកម្មភាពរំដោះមីនរយៈពេល ៣០ ឆ្នាំចុងក្រោយនេះ បានចូលរួមចំណែកដល់កិច្ចគាំពារសន្តិភាព និងសន្តិសុខ ហើយបានចូលរួមកាត់បន្ថយភាពក្រីក្រ និងបង្កើនការអភិវឌ្ឍនៅកម្ពុជាតាមរយៈការប្រើប្រាស់ដីប្រកបដោយសុវត្ថិភាពក្នុងទំហំផ្ទៃដីបោសសម្អាតរួចចំនួន ២ ៥៧៩ គីឡូម៉ែត្រការ៉េ ក្នុងនោះផ្ទៃដីប្រមាណ ៧៦ ភាគរយ ត្រូវបានប្រើប្រាស់សម្រាប់សកម្មភាពកសិកម្ម។
សូមបញ្ជាក់ដែរថា ថ្មីៗកន្លងទៅនេះ កម្ពុជាទទួលជោគជ័យក្នុងការធ្វើជាម្ចាស់ផ្ទះរៀបចំសន្និសីទសកលលើកទី៣ ស្តីពីកិច្ចសង្រ្គោះជនរងគ្រោះថ្នាក់ដោយសារមីន នៅទីក្រុងភ្នំពេញ និងមានអ្នកចូលរួមមកពី ៤៥ ប្រទេស។ នៅឆ្នាំ២០២៤ខាងមុខនេះដែរ កម្ពុជា បាននិងកំពុងត្រៀមរៀបចំធ្វើជាប្រធាន និងម្ចាស់ផ្ទះនៃសន្និសីទត្រួតពិនិត្យឡើងវិញលើកទី៥ ឬកិច្ចប្រជុំកំពូលសៀមរាប-អង្គរ ស្តីពីពិភពលោកដែលគ្មានមីននៃអនុសញ្ញាហាមប្រាមការប្រើប្រាស់គ្រាប់មីនប្រឆាំងមនុស្ស ដែលមានប្រទេសប្រមាណ ២០០ ចូលរួមផងដែរ៕
ដោយ៖សុខ រក្សា
