ណៃពិដោ៖កាលពីថ្ងៃព្រហស្បតិ៍ទី១៦ ខែវិច្ឆិកា ឆ្នាំ២០២៣កន្លងទៅនេះ មេដឹកនាំយោធារបស់​ប្រទេស​មីយ៉ាន់ម៉ា​បានបញ្ជា​ឱ្យ​បុគ្គលិករដ្ឋាភិបាលទាំងអស់ និងអ្នកដែលមានបទពិសោធន៍យោធា ត្រៀម​លក្ខណៈដើម្បី​បម្រើកងទ័ពក្នុង​ករណី​មានអាសន្ន បន្ទាប់ពីរបបយោធារងការវាយ​ប្រហារយ៉ាងធ្ងន់ធ្ងរ ពីក្រុម​បះបោរ​ជាច្រើន​កន្លែង។

​ថ្ងៃព្រហស្បតិ៍ដដែលនេះ បើតាមមន្ត្រីប៉ូលិសឥណ្ឌាម្នាក់បានឱ្យដឹងថា យ៉ាងហោច​ណាស់​មាន​ទាហា​ន​មីយ៉ាន់ម៉ាចំនួន ២៩ នាក់ទៀតបាន​រត់ចូលទៅក្នុងប្រទេសឥណ្ឌា ក្រោយរង​ការវាយប្រហារពី​ក្រុម​បះបោរនៅលើ​មូលដ្ឋានយោធារបស់ពួកគេនៅជិតព្រំដែនឥណ្ឌា ចំពេលដែលក្រុមឧទ្ទាម​បង្កើន​ការវាយប្រហាររបស់​ពួក​គេ​ប្រឆាំងនឹងរបបយោធាដែលកំពុងកាន់អំណាច។

លោក Tin Maung Swe លេខាក្រុមប្រឹក្សារដ្ឋបាលក្នុងរដ្ឋធានី​ណៃពិដោបានបញ្ជាក់ថា របប​យោធា​បានបញ្ជាឱ្យបុគ្គលិករដ្ឋាភិបាលនិងអតីតបុគ្គលិកយោធាបង្កើតអង្គភាព​ដើម្បីឆ្លើយ​តបទៅ​នឹង​ស្ថានភាព​អាសន្ន​។​ លោក Tin Maung បន្តថា​ អង្គភាពនេះ​ក៏អាចនឹង​ត្រូវ​បាន​តម្រូវ​ឱ្យ​ចេញទៅក្រៅ ពេលមានបញ្ហា​គ្រោះមហន្តរាយធម្មជាតិ និងសន្តិសុខជាដើម​។

ស្របពេលជាមួយគ្នានេះ រដ្ឋាភិបាលមួយដែលបង្កើតឡើងដោយអ្នកនយោបាយគាំទ្រលទ្ធិប្រជាធិបតេយ្យ ដើម្បីប្រឆាំងនឹងក្រុមយោធា និងជាសម្ព័ន្ធមិត្តជាមួយក្រុមបះបោរមួយចំនួន បានចាប់ផ្តើម​យុទ្ធនាកា​រ​របស់ខ្លួន​មានឈ្មោះថា «Road to Naypyitaw» ក្រោមគោលបំណងដណ្តើមកាន់កាប់រដ្ឋធានីប្រទេស។

អ្នកនាំពាក្យរបបយោធាលោក Zaw Min Tun បានឱ្យដឹងកាលពីល្ងាចថ្ងៃពុធថា យោធា​កំពុង​ប្រឈម​មុខនឹង ​ការវាយប្រហារយ៉ាងធ្ងន់ធ្ងរពីទាហានឧទ្ទាមប្រដាប់អាវុធមួយចំនួនធំ​នៅក្នុងរដ្ឋ Shan ភាគឦសាន រដ្ឋ Kayah នៅភាគខាងកើត និងរដ្ឋ Rakhine នៅភាគខាងលិច។

លោក Zaw Min Tun បន្តថា ទីតាំងយោធាមួយចំនួនត្រូវបានជម្លៀសចេញ ហើយក្រុមបះបោរបាន​នឹងកំពុងប្រើប្រាស់យន្តហោះគ្មានមនុស្សបើក ដើម្បីទម្លាក់គ្រាប់បែករាប់រយគ្រាប់លើទីតាំងយោធា។

គួរបញ្ជាក់ថា ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីរដ្ឋប្រហារឆ្នាំ ២០២១មកម្ល៉េះ ពោលគឺនៅពេលដែលយោធាបានបណ្តេញរដ្ឋាភិបាលដែលដឹកនាំដោយលោកស្រី Aung San Suu Kyi និងបញ្ចប់ការខិតខំរយៈពេលមួយទសវត្សរ៍នៃ​កំណែទម្រង់​លទ្ធិ​ប្រជាធិបតេយ្យ​ដោយឥតន័យ។

រដ្ឋប្រហារឆ្នាំ ២០២១ នេះក៏បានបំផ្លាញក្តីសង្ឃឹមនៃកំណែទម្រង់​ប្រជាធិបតេយ្យឱ្យធ្លាក់ដល់សូន្យជាថ្មី និងបង្ក​ឱ្យមាន​​ការប្រមូលផ្តុំនៃក្រុមប្រឆាំង ដែលបានបង្រួបបង្រួម​គ្នា​គាំទ្រលទ្ធិ​ប្រជាធិបតេយ្យ​នៅតាម​ទីក្រុង និងការរួបរួមគ្នាជាមួយនឹងកង​កម្លាំងជនជាតិ​ភាគតិច​ដែល​កំពុង​ប្រយុទ្ធ​ដើម្បី​ការពារខ្លួននៅតាម​តំបន់​ព្រំដែន៕

ប្រែសម្រួល៖ ស្រ៊ុន សិរីវឌ្ឍនៈ

ប្រភព៖ https://www.straitstimes.com/asia/se-asia/myanmar-junta-says-facing-heavy-assault-from-insurgents-in-three-states