មូស្គូ៖ មេដឹកនាំរុស្ស៊ីបាននិយាយនៅថ្ងៃសុក្រសប្តាហ៍នេះថា ភាពផ្តាច់មុខរបស់ប្រទេសលោកលើបញ្ញាសិប្បនិមិត្ត (AI) គឺពិតជា “គ្រោះថ្នាក់” និងថា រុស្ស៊ីត្រូវប្រើបច្ចេកវិទ្យាផ្ទាល់ខ្លួន ដើម្បីប្រកួតប្រជែងនឹង chatbots ដ៏លំអៀងរបស់លោកខាងលិច។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅក្នុងសន្និសីទបញ្ញាសិប្បនិម្មិត (AI) នៅទីក្រុងមូស្គូ ថា ខ្ញុំគិតថា អ្នកដឹងច្បាស់ហើយថា ម៉ាស៊ីនស្វែងរកលោកខាងលិចមួយចំនួន និងគំរូទូទៅមួយចំនួន តែងតែធ្វើការក្នុងរបៀបជ្រើសរើស និងលំអៀង។

លោក ពូទីន បន្តថា ពួកគេមិនគិតពីវប្បធម៌រុស្ស៊ីទេ ហើយពេលខ្លះពួកគេព្រងើយកន្តើយ និងលុបចោលវាតែម្តង…ប្រព័ន្ធទំនើបជាច្រើនត្រូវបានបណ្តុះបណ្តាល លើទិន្នន័យប្រទេសលោកខាងលិច សម្រាប់ទីផ្សាររបស់ពួកគេ។ លោក ពូទីន បន្ថែមថា ការត្រួតត្រាផ្តាច់មុខនៃការច្នៃប្រឌិតបរទេសបែបនេះ នៅក្នុងប្រទេសរុស្ស៊ី គឺ “គ្រោះថ្នាក់” និងមិនអាចទទួលយកបានទេ។

ទន្ទឹមគ្នា ប្រធានាធិបតីរុស្ស៊ីរូបនេះ បានអំពាវនាវម្តងហើយម្តងទៀតឱ្យទីក្រុងមូស្គូ ឈប់ពឹងផ្អែកលើបច្ចេកវិទ្យារបស់លោកខាងលិច ហើយកាលពីខែកញ្ញា ក៏បានបញ្ជាឱ្យរដ្ឋាភិបាលបោះទុនវិនិយោគ ក្នុងការអភិវឌ្ឍកុំព្យូទ័រទំនើប និងស្រាវជ្រាវបញ្ញាសិប្បនិម្មិត (AI) ផងដែរ។

គួរបញ្ជាក់ថា ឧស្សាហកម្មបច្ចេកវិទ្យារបស់រុស្ស៊ីជួបការលំបាកខ្លាំង បន្ទាប់ពីទីក្រុងមូស្គូបានលុកលុយទឹកដីអ៊ុយក្រែន។ បុគ្គលិក IT រាប់ពាន់នាក់បានភៀសខ្លួន ដើម្បីគេចចេញពីកែនធ្វើកងទ័ព ចំពេលដែលការដាក់ទណ្ឌកម្មរបស់លោកខាងលិច បានរារាំងការនាំចូលវត្ថុធាតុដើមសំខាន់ៗមួយចំនួនផងដែរ៕ ប្រភព៖ AFP ប្រែសម្រួលដោយ៖ ឈឹម ទីណា