(ភ្នំពេញ)៖ នៅវិមាន៧មករា ព្រឹកថ្ងៃទី៧ធ្នូ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ ព្រះមហាក្សត្រ នៃ កម្ពុជា បានអនុញ្ញាតឱ្យឯកឧត្តម Georege Yeo អតីតរដ្ឋមន្ត្រីការបរទេសសិង្ហបុរី ចូលជួបសម្ដែងការគួរសម និងពិភាក្សាការងារ។

សម្ដេចតេជោ ហ៊ុន សែន បានសម្ដែងក្ដីរីករាយដែលបានជួបជាមួយឯកឧត្តម Georege Yeo នៅកម្ពុជា។ សម្ដេចតេជោបានចូលរួមអបអរសាទរ ចំពោះការផ្សព្វផ្សាយសៀវភៅ របស់ឯកឧត្តម ហើយសម្ដេចបានចាត់ទុកការរៀបចំសៀវភៅសម្រាប់អ្នកជំនាន់ក្រោយនេះ ជាការល្អប្រសើរណាស់។ សម្ដេចតេជោ ក៏បានរៀបរាប់អំពីការរៀបចំគ្រប់បែបយ៉ាងសម្រាប់អ្នកជំនាន់ក្រោយ ជាពិសេសសម្ដេចបានជម្រាបថា នៅពេលដែល ឯកឧត្តមបានអញ្ជើញមកដល់ទីស្នាក់ការកណ្ដាលគណបក្សប្រជាជនកម្ពុជា ឯកឧត្តមបានឃើញពីការរៀបចំទីស្នាក់ការកណ្ដាល ហើយក៏មានការរៀបចំសាខាគណបក្ស នៅតាមបណ្ដារាជធានី-ខេត្ត ក្រុង ស្រុក ខណ្ឌ ឃុំ-សង្កាត់ ដែលនេះជាការរៀបចំទុកយូរអង្វែង។

ឯកឧត្តម Georege Yeo មានប្រសាសន៍ដោយសេចក្ដីរីករាយ ដែលបានជួបសម្ដេចតេជោម្ដងទៀត ដោយសម្ដេច បានផ្ដល់ឱកាស ផ្ដល់ពេលវេលាឱ្យឯកឧត្តម បានជួបសំណេះសំណាលដោយផ្ទាល់នៅពេលនេះ។ ឯកឧត្តម Georege Yeo បន្តថា ឯកឧត្តមបានចូលនិវត្តន៍ពីការងារហើយ ហើយបានមកកម្ពុជាម្ដងទៀតនេះ បន្ទាប់ពីបានធ្លាប់មកកាន់ព្រះរាជាណាចក្រកម្ពុជាម្ដង កាលពីឆ្នាំ១៩៩៩ ដែលកាលនោះ ឯកឧត្តម ចម ប្រសិទ្ធ ជាអ្នកជូនដំណើរឯកឧត្តមទៅលេងខេត្តសៀមរាប ហើយការមកទស្សនកិច្ចនៅកម្ពុជាលើកនេះ ឯកឧត្តមក៏បានទៅកំសាន្តនៅខេត្តសៀមរាបផងដែរ ដោយបានឃើញព្រះអាទិត្យរៀបលិច មានពណ៌មាស ស្រស់ស្អាតណាស់លើប្រាសាទអង្គរវត្ត ។

ឯកឧត្តមបានលើកឡើងទៀតថា រាជធានីភ្នំពេញ ក៏រៀបចំបានល្អ មានប្រជាជនធ្វើចរាចរច្រើន មានអាគារថ្មីៗ ខ្ពស់ៗ ហើយប្រជាជនរស់នៅប្រកបដោយស្មារតីរីករាយ ក្រោមការអភិវឌ្ឍន៍ប្រកបដោយសុខសន្តិភាព។

ទាក់ទងនឹងបញ្ហាសេដ្ឋកិច្ច សម្ដេចតេជោមានប្រសាសន៍ថា មានបញ្ហាពីរដែលកម្ពុជាកំពុងបន្តយកចិត្តទុកដាក់ ទី១ គឺបញ្ហាសន្តិសុខស្បៀង និងទី២ គឺបញ្ហាសន្តិសុខថាមពល ។ ពាក់ព័ន្ធបញ្ហាសន្តិសុខស្បៀង គឺយើងបានប្រែក្លាយជាប្រទេសផលិតស្បៀងសម្រាប់ផ្គត់ផ្គង់ខ្លួនឯង សម្រាប់បរិភោគ និងទៅជាប្រទេសដែលនៅសល់ស្បៀងសម្រាប់ការនាំចេញមួយចំនួន។ ពាក់ព័ន្ធនឹងសន្តិសុខថាមពល ទោះបីជាយើងមិនមែនជាប្រទេសផលិតប្រេង ប៉ុន្តែយើងនៅគ្រប់ គ្រងបាន ដោយគិតមកដល់ពេលនេះ យើងបានប្រើប្រាស់ថាមពលកកើតឡើងវិញប្រមាណ ៦២% ហើយយើងបានឈប់ផលិតថាមពលពីធ្យូងថ្ម ៕

អត្ថបទ៖ វណ្ណលុក, រូបភាព៖ វ៉េង លីមហួត, សួង ពិសិដ្ឋ