(កំពត)៖ ក្នុងកិច្ចប្រជុំ សាមញ្ញ លើកទី៥៥ អាណត្តិទី៣របស់ក្រុមប្រឹក្សារខេត្ត នាព្រឹកថ្ងៃទី ១២ខែធ្នូ ឆ្នាំ២០២៣ ក្រោមអធិបតីភាព ឯក ឧត្តម ញ៉ូវ សាឯម ប្រធានក្រុមព្រឹក្សារខេត្ត ឯកឧត្តម ម៉ៅ ធនិន អភិបាលខេត្តកំពត បានលើកឡើងថា ក្រោយពីកម្ពុជាបានគ្រប់គ្រងស្ថានភាពនៃការឆ្លងរីករាលដាលនៃជំងឺកូវីដ-១៩ បានល្អប្រសើ កំណើននៃភ្ញៀវទេសចរជាតិ និងអន្តរជាតិក៏មានការកើនឡើងជាបន្តបន្ទាប់ក្នុងក្របខ័ណ្ឌទូទាំងប្រទេស ដោយឡែកខេត្តកំពតក៏មានកំណើនភ្ញៀវទេសចរគួរឱ្យកត់សម្គាល់ផងដែរ ហើយយើងបានពង្រីកបន្ថែមនូវតំបន់ទេចរណ៍ កន្លែងផ្តល់សេវាកម្មផ្នែកទេសចរណ៍ដែលមានភាពទាក់ទាញជាច្រើនកន្លែង ដែលនេះក៏ជាកត្តាមួយរួមចំណែកក្នុងការទាក់ទាញភ្ញៀវទេសចរឱ្យមកសម្រាកកម្សាន្តក្នុងខេត្ត។

ឯកឧត្តម ម៉ៅ ធនិន បន្តថា ទន្ទឹមនឹងការរីកចម្រើនក្នុងវិស័យទេសចរណ៍នេះ រដ្ឋបាលខេត្តកំពតគ្រោងនឹងកែលម្អ និងអភិវឌ្ឍន៍បន្ថែមនៅទីតាំងចំនួន៤ សំខាន់ៗក្នុងក្រុងកំពតបន្ថែមទៀត ដើម្បទាក់ទាញភ្ញៀវទេសចរក្នុងឆ្នាំ២០២៤ខាមុខ ដែលទីតាំងទី១ គឺវ៉េរ៉ង់ដានៅខាងមុខសាលាខេត្តចាស់ នឹងត្រូវតុបតែងលម្អដោយមានរូបសេះសមុទ្រដែលបំពាក់ទៅដោយភ្លើងពណ៌ និងមានការបាញ់ទឹកផងដែរ ទីតាំងទី២ ចន្លោះពីស្ពានថ្មថ្មី ទៅដលើស្ពានដែក(ស្ពានរថភ្លើង) គឺនឹងអភិវឌ្ឍន៍ទៅជាសួនកម្សាន្តមួយនៅចំកណ្តាលក្រុងកំពត ទីតាំងទី៣ រដ្ឋបាលខេត្តនឹងរៀបចំផែទូកទេសចណ៍ឱ្យបានស្អាត និងមានភាពទាក់ទាញ និងទីតាំងទី៤ នឹងមានការក្រាលការ៉ូម៉ាបភ្ជាប់ពីរូបសំណាក់ព្រះបាទអង្គដួងរហូតមកដល់សួនមុខរង្វង់មូលត្រីផ្សោត។ មិនតែប៉ុណ្ណោះរដ្ឋបាលខេត្តនឹងរៀបចំឆ្នេរកោះស្មៅឱ្យមានសោភ័ណ្ឌភាពស្អាតបន្ថែមទៀត ការស្តារឃ្លងផែទេសចរណ៍ឱ្យបានធំ ព្រមទាំងមានគម្រោងក្នុងការបង្កើតឆ្នេរសមុទ្រថ្មីមួយផងដែរ។

ក្នុងឱកាសនោះដែរ ឯកឧត្តមក៏បានស្នើដល់ឯកឧត្តមប្រធានក្រុមប្រឹក្សាខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត រួមជាមួយអ្នកពាក់ព័ន្ធទាំងអស់ចូលរួមគិតគូរ ផ្តល់មតិយោបល់ ក៏ដូចជាគាំទ្ររាល់គម្រោងអភិវឌ្ឍន៍នានារបស់រដ្ឋបាលខេត្ត ក្នុងន័យដើម្បីទាញយកផលប្រយោជន៍ពីវិស័យទេសចរណ៍ ៕

ដោយ ៖ សិលា សារិន