លីឡុងវ៉េ៖ ប្រធានាធិបតីនៃប្រទេសម៉ាឡាវីបានប្រាប់សភា កាលពីថ្ងៃសុក្រថា ដើម្បីជំរុញវិស័យទេសចរណ៍ ប្រទេសម៉ាឡាវីបានសម្រេចដកតម្រូវការទិដ្ឋាការ សម្រាប់ភ្ញៀវទេសចរ មកពីបណ្តាប្រទេសចំនួន ៧៩។

លោកប្រធានាធិបតី ឡាហ្សារុស ឆាកវើ រ៉ា (Lazarus Chakwera) បាននិយាយថា វិស័យទេសចរណ៍គឺជាប្រភពរូបិយប័ណ្ណបរទេសធំជាងគេទីបី នៅក្នុងប្រទេសម៉ាឡាវី។ ម៉ាឡាវីគឺជាប្រទេសស្ថិតក្នុងតំបន់អាហ្វ្រិកខាងត្បូង ហើយអ្វីដែលជាប្រភពចំណូលដ៏សំខាន់ទី១ គឺថ្នាក់ជក់ និងទី២ គឺតែ ប៉ុន្តែ វិស័យទេសចរណ៍ គឺមិនដំណើរការល្អនោះទេ។

លោកប្រធានាធិបតីនិយាយប្រាប់សភាថា «កត្តាសំខាន់ក្នុងចំណោមកត្តាដែលរួមចំណែកក្នុងកិច្ចការនេះ គឺភាពងាយស្រួលក្នុងប្រទេសរបស់យើង ដូច្នេះ នេះជាមូលហេតុដែលយើងបានអនុវត្តកម្មវិធីលើកលែងទិដ្ឋាការ»។

សហរដ្ឋអាមេរិក អង់គ្លេស បារាំង ចិន រុស្សី និងសមាជិកនៃសហគមន៍អភិវឌ្ឍន៍អាហ្វ្រិកខាងត្បូង (SADC) ដែលមានប្លុកប្រទេសជាច្រើន សុទ្ធតែទទួលការលើកលែងវីស្សានេះ។

រដ្ឋមន្ត្រីក្រសួងទេសចរណ៍បានប្រាប់ AFP ថា យុទ្ធសាស្ត្រនេះគឺទាក់ទាញការវិនិយោគក្នុងវិស័យកសិកម្ម ទេសចរណ៍ និងការរុករករ៉ែ។ តាមរយៈការលុបបំបាត់តម្រូវការទិដ្ឋាការសម្រាប់ទីផ្សារប្រភពសំខាន់ៗនៅទូទាំងពិភពលោក ម៉ាឡាវីកំពុងផ្តល់សញ្ញាថាបើកចំហសម្រាប់អាជីវកម្ម។

ប្រទេសម៉ាឡាវី គឺជាដឹងថាជា ជម្រុកសត្វព្រៃដ៏ច្រើនសន្ធឹកសន្ធាប់ រួមទាំងដំរី និងក្រពើ។ បឹង «ម៉ាឡាវី» ដែលជាបឹងទឹកសាបធំជាងគេទីបីរបស់ទ្វីបអាហ្រ្វិក មានកេរ្តិ៍ឈ្មោះល្បី ដោយសារទឹកថ្លាខ្លាំង ឆ្នេរខ្សាច់ និងជីវិតសមុទ្រចម្រុះ ហើយបឹងនេះត្រូវបានចុះក្នុងបញ្ជីបេតិកភណ្ឌពិភពលោក ដោយទីភ្នាក់ងារវប្បធម៌របស់អង្គការសហប្រជាជាតិ យូណេស្កូ (UNESCO) ផងដែរ៕ ប្រភពពី AFP ប្រែសម្រួល៖ សារ៉ាត