កូឡុំបូ៖ ប្រទេសស្រីលង្កាបានរៀបចំក្បួនដង្ហែចម្រុះពណ៌ ដើម្បីអបអរពិធីបុណ្យព្រះពុទ្ធសាសនា ប្រចាំឆ្នាំ ដ៏ធំ មានឈ្មោះថា Navam Perahera។

កាលពីថ្ងៃសុក្រ គេឃើញមានប្រជាជនស្រីលង្កា រាប់ពាន់នាក់បានដើរដង្ហែតាមដងផ្លូវ ក្នុងរដ្ឋធានី កូឡុំបូ (Colombo) អំឡុងពិធីបុណ្យ Navam Perahera ប្រចាំឆ្នាំ ដើម្បីរំលឹកដល់ការតែងតាំង សាវ័ករបស់ព្រះពុទ្ធ ពីរអង្គ គឺ Arahats Sariputta និង Moggallana ។ ព្រះសង្ឃជាច្រើនអង្គ ត្រូវបានគេឃើញនិមន្តចូលរួម នៅក្នុងពិធីបុណ្យសាសនានេះ។

ដោយមានការស្លៀកពាក់ចម្រុះពណ៌ អ្នករាំរបាំប្រពៃណី អ្នកសម្តែងកាយសម្ព័ន្ធ អ្នកកាន់ភ្លើង និងដំរីត្រូវបានតុបតែង បានដើរតាមដងផ្លូវ មានទាំងច្រៀង និងរាំ ក្នុងពិធីបុណ្យដ៏អស្ចារ្យបំផុតមួយ នៅប្រទេសស្រីលង្កា។

បុណ្យ Navam Perahera ត្រូវបានគេដឹងថា ជាពិធីបុណ្យព្រះពុទ្ធសាសនាប្រចាំឆ្នាំ ដែលធ្វើឡើង នៅក្នុងខែកុម្ភៈ។ ព្រឹត្តិការណ៍នេះ ទាក់ទាញប្រជាជនក្នុងស្រុក និងភ្ញៀវទេសចររាប់លាននាក់បានប្រមូលផ្តុំគ្នា ដើម្បីទស្សនាការបង្ហាញដ៏អស្ចារ្យ នៃវប្បធម៌របស់ប្រទេសស្រីលង្កា៕ ប្រភពពី AFP ប្រែសម្រួល៖ សារ៉ាត