ប៉េកាំង៖ សារព័ត៌មាន Bloomberg បានចេញផ្សាយនៅថ្ងៃពុធនេះថា ប្រាក់ចំណូលរបស់ ByteDance ដែលជាក្រុមហ៊ុនមេធំរបស់ TikTok បានកើនឡើងប្រហែល ៦០ភាគរយកាលពីឆ្នាំ២០២៣ បើធៀបនឹងឆ្នាំ២០២២។

ប្រាក់ចំណូលរបស់ក្រុមហ៊ុន ByteDance បានកើនឡើងពី ២៥ពាន់លានដុល្លារក្នុងឆ្នាំ២០២២ ដល់ ៤០ពាន់លានដុល្លារក្នុងឆ្នាំ២០២២ ដោយបានផ្តួលគូប្រជែងក្រុមហ៊ុនអនឡាញធំៗរបស់ខ្លួន មានដូចជា Tencent និង Alibaba។ ការកើនឡើងប្រាក់ចំណូលជិតទ្វេដងនេះ ក៏ដោយសារតែ “TikTok Shop” ដែលបានជួយ ByteDance វាយលុកចូលទៅក្នុងទីផ្សារពាណិជ្ជកម្មអេឡិចត្រូនិកអន្តរជាតិ ទាំងនៅសហរដ្ឋអាមេរិក និងអាស៊ីអាគ្នេយ៍។

ព័ត៌មានកំណើនប្រាក់ចំណូលរបស់ ByteDance កើតឡើងបន្ទាប់ពីមានការលេចលឺថា ក្រុមហ៊ុនបច្ចេកវិទ្យាកំពូលរបស់ចិនមួយនេះ កំពុងប្រើប្រាស់បច្ចេកវិទ្យារបស់ក្រុមហ៊ុន OpenAI ដើម្បីជួយបង្កើត AI chatbot ផ្ទាល់ខ្លួន។ ទោះបីជាយ៉ាងណា ក្រុមហ៊ុន ByteDance មិនបានឆ្លើយតបភ្លាមៗនូវសំណើសុំការអត្ថាធិប្បាយពីសារព័ត៌មាន Business Insider ទេ កាលពីថ្ងៃពុធ។

គួរបញ្ជាក់ថា ក្រុមហ៊ុន ByteDance បានវាយលុកក្នុងពេលប៉ុន្មានឆ្នាំថ្មីៗនេះ ដើម្បីក្លាយជាក្រុមហ៊ុនបច្ចេកវិទ្យាកំពូល ដែលមានតម្លៃខ្លួនថ្លៃបំផុតមួយនៅលើពិភពលោក រហូតដល់ ២២៥ពាន់លានដុល្លារ នេះបើយោងតាមក្រុមហ៊ុនឃ្លាំមើលទីផ្សារ CP Insights។ គិតមកទល់ពេលនេះ ក្រុមហ៊ុន ByteDance មានបុគ្គលិកច្រើនជាង ១៥០,០០០នាក់នៅក្នុងទីក្រុងជិត ១២០ នៅជុំវិញពិភពលោក៕

ប្រភព៖ AFP ប្រែសម្រួលដោយ៖ ឈឹម ទីណា