ភ្នំពេញ ៖ កាកបាទក្រហមកម្ពុជា ដែលមាន សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់អំណោយមនុស្សធម៌ជាលើកទី៤ រួមមានគ្រឿងឧបភោគបរិភោគ សម្ភារប្រើប្រាស់ និងថវិកាចំនួន ១០លានរៀល ជូនដល់ អង្គការផ្ទះបាយកុមារ ដែលមានបន្ទុកជួយផ្គត់ផ្គង់ការហូបចុក និងការសិក្សារៀនសូត្រដល់កុមារកំព្រា កុមារក្នុងគ្រួសារក្រីក្រ កុមារផ្ទុកមេរោគអេដស៍ កុមាររើសអេតចាយចំនួន ៦៣៦នាក់ ស្ថិតនៅបរិវេណសាលាបឋមសិក្សាជ័យជំនះ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ នាថ្ងៃទី២៣ ខែមេសា ឆ្នាំ២០២៤ ។

លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅចំពោះ អង្គការផ្ទះបាយកុមារ ដែលបានជួយមើលថែទាំ ផ្តល់ការសិក្សាអប់រំ និងផ្តល់ការហូបចុកដល់កុមារ ដែលនេះជាការជួយសម្រាលបន្ទុកដល់ក្រុមគ្រួសាររបស់កុមារទាំងនេះ។ ជាមួយគ្នានេះ លោកជំទាវ ក៏បានផ្តាំផ្ញើដល់ក្មួយៗចៅៗទាំងអស់ ត្រូវចេះរក្សាអនាម័យក្នុងការរស់នៅ ចេះស្រឡាញ់គ្នា ជួយយកអាសាគ្នាទៅវិញទៅមក ជាពិសេសត្រូវខិតខំសិក្សារៀនសូត្រ ធ្វើជាកូនល្អ សិស្សល្អ ជាពលរដ្ឋល្អ និងជាធនធានមនុស្សសម្រាប់បម្រើសង្គមជាតិ។

លោកជំទាវ បានថ្លែងអំណរគុណយ៉ាងជ្រាលជ្រៅចំពោះសប្បុរសជនគ្រប់មជ្ឈដ្ឋាន ដែលបានបរិច្ចាគថវិកាដោយសទ្ធាជ្រះថ្លាដល់កាកបាទក្រហមកម្ពុជា ជាពិសេសក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីកាកបាទក្រហមកម្ពុជា មានលទ្ធភាពគ្រប់គ្រាន់ក្នុងការជួយសម្រាលការលំបាកដល់ប្រជាជនរងគ្រោះនិងងាយរងគ្រោះបំផុត ជាក់ស្តែងដូចជាការចុះសួរសុខទុក្ខ និងផ្តល់អំណោយដល់អង្គការផ្ទះបាយកុមារនេះជាដើម ក៏ដូចជាបណ្តាសមាគម អង្គការ មជ្ឈមណ្ឌល បុរី នានា ដែលកាកបាទក្រហមកម្ពុជា បានចុះកាលពីអំឡុងពេលមុនពិធីបុណ្យចូលឆ្នាំថ្មីប្រពៃណីជាតិខ្មែរកន្លងទៅ។

លោក សែម ស៊ីណាត អគ្គលេខាធិការ នៃអង្គការផ្ទះបាយ បានថ្លែងអំណរគុណ កាកបាទក្រហមកម្ពុជា ជាពិសេស មាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរពីសុខទុក្ខ ព្រមទាំងបានឧបត្ថម្ភនូវថវិកា និងគ្រឿងឧបភោគបរិភោគជាបន្តបន្ទាប់។ លោក សែម ស៊ីណាត បានបញ្ជាក់ថា “ព្រឹកនេះមានកុមារប្រមាណជាង ៣០០នាក់ ដែលបានមកចូលរួមផ្ទាល់ ហើយកុមារជាង ៣០០នាក់ទៀតអង្គការនឹងរៀបចំប្រគល់ជូនបន្តទៀត។ លោកបានបន្តថា គោលបំណងរបស់អង្គការ គឺជួយដល់កុមារទុរគតទាំងឡាយឱ្យទទួលបានការហូបចុកគ្រប់គ្រាន់ ជៀសផុតពីជំងឺនានា ហើយទទួលបានការសិក្សារៀនសូត្រ និងជៀសផុតពីគ្រឿងញៀន។

សូមបញ្ជាក់ថា៖ នេះជាលើកទី៤ហើយដែលកាកបាទក្រហមកម្ពុជា បានផ្តល់អំណោយជូនអង្គការផ្ទះបាយកុមារ ដែលអំណោយនាពេលនេះរួមមាន ៖ អង្ករ ៣តោន, មី ៥០កេស, ត្រីខ ៤កេស, ទឹកក្រូច ២៧កេស, ទឹកបរិសុទ្ធ ២៧កេស, ប្រេងឆា ៥ធុង, ប្រេងខ្យងដប ៥កេស,ស្កសរ ១០០គីឡូក្រាម,ទឹកដោះគោខាប់ ៥កេស សាច់ក្រក ២០គីឡូក្រាម ឆៃពៅផ្អែម ៥០គីឡូក្រាម ពងទាប្រៃ ២០០គ្រាប់ សាប៊ូម្សៅ ២៨គីឡូក្រាម, ម្សៅស៊ុប ៥គីឡូក្រាម និងថវិកា ១០.០០០.០០០រៀល។ ជូនកុមារប្រមាណ ៣០០នាក់ ក្នុងម្នាក់ៗទទួលបាន៖ បាយ១ឈុត មី ៥កញ្ចប់ ក្រូច១ផ្លែ ត្រីខ១កំប៉ុង សណ្តែកខៀវ១កំប៉ុង ស្ករសរ ១កំប៉ុង ទឹកក្រូច១កំប៉ុង ទឹកបរិសុទ្ធ១ដប សៀវភៅប៊ិក ១ឈុត និងអង្ករ ១០គីឡូក្រាម ដែលជាអំណោយរបស់អង្គការផ្ទះបាយកុមារ និងសប្បុរសជននានា ៕

ដោយ / គ្រី សម្បត្តិ