ប៊ែរឡាំង៖ ក្រុមហ៊ុន Volkswagen បានប្រកាសថ្មីៗនេះថា ប្រាក់ចំណេញរបស់ខ្លួននៅក្នុងត្រីមាសទី១ ឆ្នាំ២០២៤ មានចំនួនជាង ៤ពាន់លានដុល្លារ ធ្លាក់ចុះជាង ២០ភាគរយ ខណៈដែលការលក់ក៏បានធ្លាក់ចុះផងដែរ ប៉ុន្តែរំពឹងថា រថយន្តម៉ូដែលថ្មីនឹងជួយជំរុញសន្ទុះលក់ឡើងវិញ។

ក្រុមហ៊ុនរថយន្តកំពូលរបស់អាល្លឺម៉ង់នេះ ទទួលបានប្រាក់ចំណេញសុទ្ធជាង ៤ពាន់លានដុល្លារ ដោយគិតចាប់ពីខែមករា ដល់ខែមីនា ការលក់មានទឹកប្រាក់ជាង ៨០ពាន់លានដុល្លារ។ ការលក់រថយន្តរបស់ក្រុមហ៊ុន Volkswagen បានធ្លាក់ចុះចំនួន ២ភាគរយនៅក្នុងត្រីមាសទីមួយឆ្នាំនេះ ទោះបីការលក់កើនឡើងនៅក្នុងតំបន់អាស៊ីប៉ាស៊ីហ្វិក និងអាមេរិកខាងត្បូង ដែលជួយស្រោចស្រង់ការធ្លាក់ចុះនៅអឺរ៉ុប និងអាមេរិកខាងជើង។

ក្រុមហ៊ុន Volkswagen ក៏បានរាយការណ៍ពីការធ្លាក់ចុះការចែកចាយរថយន្តអគ្គិសនីនៅក្នុងត្រីមាសទី១ចំនួន ៣.៣ភាគរយផងដែរ។ ប៉ុន្តែ Volkswagen ជឿជាក់ថា ការធ្លាក់ចុះនេះ គឺគ្រាន់តែបណ្តោះអាសន្នប៉ុណ្ណោះ ហើយថា ការបញ្ជាទិញឡានអគ្គិសនីកំពុងកើនឡើងទ្វេដងនៅក្នុងត្រីមាសខាងមុខ។

ក្រុមហ៊ុន Volkswagen ក៏បានបញ្ជាក់អំពីទស្សនវិស័យដែលបានប្រកាសពីមុនរបស់ខ្លួនសម្រាប់ឆ្នាំ២០២៤ផងដែរ ដោយប្រាក់ចំណូលពីការលក់រថយន្ត ត្រូវបានរំពឹងថា នឹងកើនឡើងរហូតដល់ ៥ភាគរយ។

ទន្ទឹមគ្នា Volkswagen ក៏សង្ឃឹមដែរថា ផែនការកាត់បន្ថយការចំណាយ និងជំរុញប្រាក់ចំណេញដែលធ្លាក់ចុះរបស់ខ្លួន នឹងទទួលបានផ្លែផ្កាក្នុងឆ្នាំ២០២៤ ខណៈក្រុមហ៊ុននេះមានផែនការកាត់បន្ថយកម្លាំងពលកម្មក្នុងរយៈពេលប៉ុន្មានឆ្នាំខាងមុខនេះ៕ ប្រភព៖ AFP ប្រែសម្រួលដោយ៖ ឈឹម ទីណា