បរទេស៖ ក្នុងស្ថានការណ៍កាន់តែតានតឹង នៅមជ្ឈិមបូព៌ា ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា ទំនាក់ទំនងជាមួយអ៊ីរ៉ង់ គឺជារឿងអាទិភាពសម្រាប់ទីក្រុងមូស្គូ ជាការលើកឡើងក្នុងពេលជួបពិភាក្សាការងារ ជាមួយប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃសុក្រ។

លោក ពូទីន បាននិយាយថា ប្រទេសទាំងពីរតែងចែករំលែកទស្សនៈយ៉ាងជិតស្និទ្ធ លើព្រឹត្តិការណ៍ពិភពលោក។ លោកពូទីនបាននិយាយទៀតថា «ទំនាក់ទំនងជាមួយអ៊ីរ៉ង់ គឺជាអាទិភាពសម្រាប់យើង ហើយពួកគេកំពុងអភិវឌ្ឍ យ៉ាងជោគជ័យ»។

ជាការឆ្លើយតប មេដឹកនាំអ៊ីរ៉ង់ បាននិយាយថា ទំនាក់ទំនងរវាងប្រទេសទាំងពីរគឺ «ស្មោះត្រង់» ។ លោកបាននិយាយទៀតថា ស្ថានភាពនៅមជ្ឈិមបូព៌ាគឺ «ពិបាក» ដោយអះអាងបន្ថែមថា «សហរដ្ឋអាមេរិក និងអឺរ៉ុបមិនចង់ឱ្យស្ថានការណ៍ស្ងប់ស្ងាត់ទេ»។

មេដឹកនាំទាំងពីរបានជួបគ្នា ក្នុងប្រទេសប្រទេសតួកម៉េនីស្ថាន ដែលជារដ្ឋសម្ងាត់បំផុតមួយ របស់ពិភពលោក ចំពេលមានភាពតានតឹងកាន់តែខ្លាំងឡើង នៅមជ្ឈិមបូព៌ា ជាមួយនឹងការវាយប្រហារតាមអាកាសរបស់អ៊ីស្រាអែល ទៅលើរដ្ឋធានី Beirut របស់ប្រទេសលីបង់ ដែលខ្លួននិយាយថា សំដៅទៅលើក្រុមសកម្មប្រយុទ្ធ Hezbollah ដែលគាំទ្រដោយអ៊ីរ៉ង់៕

ប្រភពពី AFP ប្រែសម្រួល៖ សារ៉ាត