ឯកឧត្តម វង្សី វិស្សុត អញ្ជើញប្រគល់គ្រឿងចក្រជូនក្រុម អន្តរាគមន៍ ពិសេសចុះមូលដ្ឋានខេត្តកំពង់ធំ
កំពង់ធំ៖នៅស្នាក់ការគណៈកម្មាធិការគណបក្សខេត្តកំពង់ធំ កាលពី ថ្ងៃទី១៣ ខែតុលា ឯកឧត្តម វង្សី វិស្សុតសមាជិកគណៈ កម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តកំពង់ធំបានអញ្ជើញប្រគល់គ្រឿង ចក្រចំនួន ៩ គ្រឿង រួមមាន៖ ប៊ុលដូហ្សឺរ ១ គ្រឿង, អិចស្កាវ៉ាទ័រ ២ គ្រឿង, រ៉ូឡូ ១ គ្រឿង ,នីវឺឡឺ ១ គ្រឿង, ឡានបែន ២ គ្រឿង ឡានស្រោចទឹក ១ គ្រឿងនិងឡានដឹកគ្រឿងចក្រ១គ្រឿងជូនដល់ក្រុមអន្តរាគមន៍ពិសេសរបស់ក្រុមការងារ
គណបក្សចុះមូលដ្ឋានខេត្តកំពង់ធំ។
ឯកឧត្តម វង្សី វិស្សុត មានប្រសាសន៍ថា ដោយឃើញពីតម្រូវការចាំបាច់របស់ប្រជាពលរដ្ឋ នៅក្នុងខេត្តកំពង់ធំក្រុមការងារ គណបក្សចុះមូលដ្ឋានខេត្តកំពង់ធំបានសម្រេចបង្កើតក្រុមអន្តរាគមន៍ពិសេសដើម្បីអាចធ្វើការជួសជុលនិងសាងសង់ហេដ្ឋារចនា សម្ព័ន្ធសាធារណៈខ្នាតតូច ដែលជាតម្រូវការចាំបាច់ប្រចាំថ្ងៃរបស់ប្រជាជន។ ក្រុមនេះអាចចេញដំណើរការបានភ្លាមៗ ពេលមានសំណើរទៅលើការជួសជុលផ្លូវ ប្រឡាយទឹក ទំនប់ទឹក និងស្រះសហគមន៍ ដើម្បីសម្រួលដល់ការរស់នៅប្រចាំថ្ងៃ និងលើកកម្ពស់ជីវភាពរស់នៅប្រជាជន។ ក្រុមអន្តរាគមន៍នេះ ក៏អាចចល័តដោយប្រើគ្រឿងចក្របានភ្លាមៗ នៅពេលដែលមានការដាច់ផ្លូវ ឬត្រូវជីកប្រឡាយដើម្បីកាត់បន្ថយគ្រោះថ្នាក់នៃទឹកជំនន់ ឬជួយស្រោចស្រូវដោយសារគ្រោះរាំងស្ងួត។ ការងារទាំងនេះ អាចធ្វើបានដោយមិនចាំបាច់អន្តរាគមន៍ពីរដ្ឋ។
បើតាមឯកឧត្តម វង្សី វិស្សុត ក្រុមអន្តរាគមន៍ពិសេសនេះ ត្រូវបានចែកចេញជាពីរក្រុមគឺ៖ ក្រុមទី១ ទទួលខុសត្រូវលើ ៤ ស្រុកនៅភាគខាងកើត រួមមាន៖ស្រុកតាំងគោក ស្រុកបារាយណ៍ ស្រុកសន្ទុក និងស្រុកសណ្តាន់។ ចំណែកក្រុមទី២ ទទួលបន្ទុកលើ ៥ ក្រុង និងស្រុកនៅភាគខាងលិច រួមមាន៖ក្រុងស្ទឹងសែន ស្រុកស្ទោង ស្រុកកំពង់ស្វាយ ស្រុកប្រាសាទសំបូរ និងស្រុកប្រាសាទបល្ល័ង្ក៕
ដោយ៖ប៊ុនរដ្ឋា
