(ភ្នំពេញ)៖ រសៀលថ្ងៃចន្ទ ទី១៤ ខែតុលា ឆ្នាំ២០២៤ នៅទីស្តីការក្រសួង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោក Liu Minglin ប្រធានក្រុមហ៊ុន Yunnan Provincial Investment Holding Group (YIG) ដែលជាក្រុមហ៊ុនមេរបស់ព្រលានយន្តហោះអន្តរជាតិអង្គរ និងសហការី ចូលជួបសម្តែងការគួរសម និងពិភាក្សាការងារ ដើម្បីស្តាប់នូវស្ថានភាពអាជីវកម្ម បញ្ហាប្រឈម និងការចូលរួមចំណែករបស់វិស័យឯកជន ក្នុងការអភិវឌ្ឍវិស័យទេសចរណ៍ ដើម្បីទាក់ទាញភ្ញៀវទេសចរបរទេសមកទស្សនាប្រទេសកម្ពុជាឱ្យបានច្រើន និងមានសន្ទុះឡើងវិញ សម្រាប់ជំរុញកំណើនសេដ្ឋកិច្ចតាមរយៈវិស័យទេសចរណ៍ នៅក្រោយវិបត្តិជំងឺកូវីដ-១៩ ជាពិសេសគំរោងរបស់ក្រុមហ៊ុនក្នុងការបណ្តាក់ទុនបន្ថែមដើម្បីអភិវឌ្ឍតំបន់ជុំវិញព្រលានយន្តហោះអន្តរជាតិអង្គរឱ្យក្លាយ ជាតំបន់វប្បធម៌ ទេសចរណ៍ និងពាណិជ្ជកម្មចម្រុះ ក៏ដូចជាការអភិវឌ្ឍន៍ផលិតផលទេសចរណ៍បន្ថែមថ្មីទៀត។

ឯកឧត្តមរដ្ឋមន្ត្រី បានជម្រាបជូនលោកប្រធានក្រុមហ៊ុនថា ក្នុងឆ្នាំ២០២៤នេះ កម្ពុជា-ចិន បានកំពុងបន្តរឹតចំណងមិត្តភាពនិងទំនាក់ទំនងការទូតជាយូរលង់ ដោយស្របតាមស្មារតី “មិត្តដែកថែប និងសហគមន៍វាសនារួមកម្ពុជា-ចិន ប្រកបដោយភាពស៊ីជម្រៅ និងភាពជាក់ស្ដែង ក្នុងយុគសម័យថ្មី” ក៏ដូចជាក្របខ័ណ្ឌកិច្ចសហប្រតិបត្តិការត្បូងពេជ្ររវាងកម្ពុជា-ចិន ដែលផ្ដោតលើវិស័យអាទិភាពអាទិភាពចំនួន ៦ ក្នុងនោះគឺ “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន”។

ឯកឧត្តមរដ្ឋមន្ត្រី មានប្រសាសន៍ថ្លែងអំណរគុណដល់ប្រជាជនចិនដែលជានិច្ចកាលគំាទ្រ ស្រលាញ់ ចូលចិត្ត និងបានអញ្ជើញមកបណ្តាក់ទុន ក៏ដូចជាទស្សនាប្រទេសកម្ពុជាយ៉ាងច្រើន និងបានថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់នៃប្រទេសចិនដែលតែងតែគាំទ្រនិងលើកទឹកចិត្តដល់វិស័យទេសចរណ៍នៅកម្ពុជា ហើយ ឯកឧត្តមរដ្ឋមន្ត្រី បញ្ជាក់ថា ចិន គឺជាទីផ្សារទេសចរណ៍ដ៍ធំរបស់កម្ពុជា ប្រទេសកម្ពុជា ពិតជាត្រូវការអាជ្ញាធរពាក់ព័ន្ធចិន ជួយផ្សព្វផ្សាយ និងជំរុញឱ្យប្រជាជនចិនមកទស្សនាកម្ពុជា ស្របតាមស្មារតីឆ្នាំនៃការផ្លាស់ប្ដូរប្រជាជនកម្ពុជា-ចិន។

ក្នុងឱកាសនៃជំនួប លោកនាយកក្រុមហ៊ុន ក៏បានសំណូមពរដល់ក្រសួងទេសចរណ៍ ជាពិសេស ឯកឧត្តមរដ្ឋមន្រ្តី ឱ្យជួយជំរុញ និងគាំទ្រ លើផែនការវិនិយោគ និងផែនការបណ្តាក់ទុករបស់ក្រុមហ៊ុនលើវិស័យទេសចរណ៍មួយចំនួន ដែលគ្រោងនឹងរៀបចំក្នុងពេលឆាប់ៗខាងមុខនេះ ដើម្បីជំរុញភ្ញៀវទេសចរមកទស្សនាប្រទេសកម្ពុជាឱ្យបានច្រើន ។

ឯកឧត្តមរដ្ឋមន្រ្តី បានថែ្លងអំណរគុណចំពោះការជឿជាក់លើរាជរដ្ឋាភិបាល និងបណ្តាក់ទុនវិនិយោគនៅកម្ពុជា ព្រមទាំងគាំទ្រពេញទំហឹងចំពោះផែនការវិនិយោគ និងបណ្តាក់ទុកខាងលើ និងបានស្នើឱ្យក្រុមហ៊ុនបន្តជួយផ្សព្វផ្សាយវិស័យទេសចរណ៍ តំបន់សក្តានុពលទេសចរណ៍កម្ពុជានៅប្រទេសចិនឱ្យកាន់តែទូលំទូលាយ និងជួយទាក់ទាញក្រុមហ៊ុនអាកាសចរណ៍អន្តរជាតិធំៗ បង្កើត និងបង្កើនជើងហោះហើរត្រង់ឱ្យបានច្រើន និងទៀងទាត់មកព្រលានយន្តហោះអន្តរជាតិ Angkor International Airport ជាពិសេសដើម្បីចូលរួមក្នុងយុទ្ធនាការ “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” ក្រសួងទេសចរណ៍ បានរៀបចំសកម្មភាពសំខាន់ៗ នាដំណាច់ឆ្នាំ២០២៤ នេះ និងស្នើសុំការចូលរួមគាំទ្រ និងជួយផ្សព្វផ្សាយទូលំទូលាយដល់ប្រជាពលរដ្ឋចិននូវកម្មវិធីចំនួន ៤ រួមមាន៖ ពិព័រណ៍ម្ហូបអាហារកម្ពុជា-ចិន (Cambodia-China Gastronomy Week), កម្មវិធី “Buddhist Culture and Tourism Forum 2024”, ព្រឹត្តិការណ៍ពិព័រណ៍ទេសចរណ៍កម្ពុជា-ចិន (Cambodia-China Travel Fair) និងបុណ្យសមុទ្រនៅខេត្តកំពត ៕

ដោយ ៖ ហេង សម្បត្តិ