(ភ្នំពេញ)៖ អង្គការ ផ្កាយសមុទ្រ ហៅកាត់ថា ISF បានរៀបចំ​ព្រឹត្តិការណ៍ប្រកួតបាល់ទាត់កុមារា Ian Thompson Memorial – ISF ប្រចាំឆ្នាំរបស់ខ្លួន ។ ព្រឹត្តិការណ៍បាល់​ទាត់ប្រចាំឆ្នាំដ៏ធំមួយនេះបានប្រព្រឹត្តទៅនៅរាជធានីភ្នំពេញ ដោយប្រមូល ផ្តុំក្រុមបាល់ទាត់សរុប៥៣ក្រុមទូទាំងប្រទេស មកចូលរួមប្រកួតប្រជែងរយៈពេលមួយថ្ងៃពេញ ។ កម្មវិធីប្រកួត នេះទៀតសោតបែងចែកទៅតាមប្រភេទអាយុខុសៗគ្នាដូចជា៖ កុមារាអាយុក្រោម ១០ឆ្នាំ, កុមារាអាយុក្រោម ១៤ឆ្នាំ និងកុមារា​អាយុក្រោម ១៦ឆ្នាំជាដើម ។

លោក ស្រី ជួប វិច្ឆិកា នាយិកា អង្គការផ្កាយសមុទ្រកម្ពុជា បានគូសបញ្ជាក់ថា ឆ្នាំ២០២៥នេះ គឺជាឆ្នាំទីដប់មួយហើយ ដែលអង្គការផ្កាយសមុទ្រសហការជាមួយនឹងមូលនិធិ Ian Thompson Memorial ដែលមាន លោក Alistair ជាកូ​នប្រុស ដើម្បីរំ​លឹកដល់ឌួងវិញ្ញាណខក្ខណ្ឌ និងរក្សានូវកេរ្តិ៍​ដំណែលរបស់ Ian Thompson ដែលជាអ្នកគាំទ្រវិស័យ​កីឡាដ៏មោះមុតម្នាក់ និងតែងតែគាំទ្រដល់ការងាររបស់​អង្គការ​ផ្កាយសមុទ្រក្នុងការកាត់ បន្ថយភាពក្រីក្រ តាមរយៈការផ្តល់​ឱកាសស្មើរគ្នា ដើម្បីទទួលបានការអប់រំ សេវាថែទាំសុខភាព និងកីឡា ។

លោក ស្រីថា ព្រឹត្តិការណ៍ប្រកួតបាល់ទាត់កុមារា​ប្រចាំឆ្នាំដ៏ធំ​មួយនេះ ដើរតួយ៉ាងសំខាន់ក្នុងការផ្តល់ឱកាសដល់កីឡាករវ័យ ក្មេងឲ្យបញ្ចេញសមត្ថភាព ក៏ដូចជាទឹកចិត្តស្រឡាញ់កីឡា និង​ស្មារតីសាមគ្គីជាក្រុមផងដែរ ។ ឆ្នាំនេះ កុមារាជា កីឡាករដល់​ទៅ​ជាង ៦០០នាក់ បានចូលរួមប្រកួត ដោយពួកគេម្នាក់ៗធ្វើ​ដំណើរមកពីខេត្តក្រុងផ្សេងៗចំនួន ៩ នៅទូទាំងប្រទេសកម្ពុជា ដូចជា៖ ខេត្តរតនៈគិរី បន្ទាយមានជ័យ កំពង់ធំ កំពង់ស្ពឺ បាត់ដំបង កំពត ក្រុងសៀមរាប និងក្រុងព្រះសីហនុ និងខ្លះ​ទៀត​មកពីសាលាដៃគូរបស់អង្គការផ្កាយសមុទ្រជុំវិញរាជធានីភ្នំពេញ ។

ពីមួយឆ្នាំទៅមួយឆ្នាំ ព្រឹត្តិការណ៍ប្រកួតបាល់ទាត់កុមារា នេះកាន់តែជោគជ័យ និងធំឡើងៗ ក៏ដោយសារតែមាន ការឧបត្ថម្ភគាំទ្រយ៉ាងសំខាន់ពីអ្នកឧបត្ថម្ភ ក្រុមប្រឹក្សាភិបាល និងអ្នកគាំទ្រធំៗជាច្រើនទៀត ដែលធ្វើដំណើរមក រាជធានីភ្នំពេញ ដើម្បីចូលរួមក្នុងព្រឹត្តិការណ៍ប្រកួតនេះ ។

ការរួមចំណែករបស់ពួកគេដើរតួយ៉ាងសំខាន់ក្នុងការ ធានាបានថាកីឡាករវ័យក្មេងទាំងនេះទទួលបានឱកាសចូលរួមប្រកួតក្នុងការប្រកួតដ៏មានគុណភាព និងអភិវឌ្ឍ ខ្លួន ។
ដោយឡែក លោក Greg Preston ជាប្រធានគ្រប់គ្រង​កម្មវិធីបាល់​ទាត់អង្គការផ្កាយសមុទ្របានមានប្រសាសន៍ថា៖ “ព្រឹត្តិការណ៍ប្រកួតបាល់ទាត់កុមារានេះគឺមានន័យលើសពីការប្រកួត ព្រោះតែវាបាននាំមកនូវឱកាសជាច្រើន ដល់កីឡាករ​វ័យ​ក្មេងក្នុងការរៀនសូត្រ អភិវឌ្ឍជំនាញ និងផ្សារភ្ជាប់ទំនាក់ទំនង​ជា​មួយនឹងមនុស្សថ្មីៗ ដែលមក ពីបណ្តាខេត្តផ្សេងៗ​ទូទាំង​ប្រទេស ។ ពួកយើងពិតជាមានមោទនភាពក្រៃលែង ដែល​បានរៀបចំ​កម្មវិធី​នេះ​ឡើង និងជាពិសេសបានឃើញ​ពីភាព​វិជ្ជមាន​ក្នុ​ង​ជីវិតរបស់កីឡាករក្មេងៗទាំងនេះ ដែលបានចូល​រួមប្រកួត ។

ព្រឹត្តិការណ៍ប្រកួតនេះមិនត្រឹមតែអភិវឌ្ឍទេពកោសល្យប៉ុណ្ណោះទេ តែថែមទាំងជួយលើកកម្ពស់ការរៀនសូត្រ ជំនាញបំណិន​ជីវិតសំខាន់ៗដូចជា ការមានវិន័យ ការធ្វើការងារជាក្រុម និង​ភាពតស៊ូធន់ទ្រាំផងដែរ ។ សម្រាប់ការប្រកួតប្រជែងកីឡា និង​ផ្តល់ការគាំទ្រសំខាន់ៗដល់ពួកគេ ពួកយើងសង្ឃឹម ថានឹងជួយ​ជុំរុញស្មារតីកីឡាករបាល់ទាត់ កម្ពុជាជំនាន់ក្រោយទាំងនេះឲ្យ​បន្តដើរឆ្ពោះទៅរកក្តីស្រមៃរបស់ខ្លួនទាំងនៅក្នុង និងក្រៅទីលាន ៕

ថត ៖ ជីម ភារ៉ា
អត្ថបទ៖ជាវ ចន្ធូ