រដ្ឋបាលខេត្តកំពង់ចាមប្រារព្ធទិវាជាតិនៃការចងចាំថ្ងៃ ២០ ឧសភា នៅមណ្ឌលឧក្រិដ្ឋកម្មភ្នំប្រុស
កំពង់ចាម៖ រដ្ឋបាលខេត្តកំពង់ចាម កាលពីព្រឹកថ្ងៃទី២០ ខែឧសភា ឆ្នាំ២០២៥ បានប្រារព្ធទិវាជាតិនៃការចងចាំថ្ងៃទី២០ ខែឧសភា ដោយមានការរាប់បាត្រប្រគេនព្រះសង្ឃចំនួន៧៩អង្គ ស្ថិតនៅមណ្ឌលឧក្រិដ្ឋកម្មភ្នំប្រុស និងដើម្បីឧទ្ទិសកុសលជូនដល់វិញ្ញាណក្ខន្ធជូនជនរងគ្រោះក្នុងរបបខ្មែរក្រហម ក្រោមអធិបតីភាព ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្ដម អ៊ុន ចាន់ដា អភិបាលខេត្តកំពង់ចាម ។
ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងថា ការប្រារព្ធពិធី ទិវាជាតិនៃការចងចាំនៅពេលនេះចំពេលដែលប្រទេសជាតិកំពុងមានសុខសន្តិភាព ស្ថេរភាពយ៉ាងរឹងមាំ និងរក្សាបាននូវប្រក្រតីភាព នៃជីវភាពរស់នៅរបស់ប្រជាជន ខណៈសភាពការណ៍អន្តរជាតិ កំពុងវិវត្តន៍យ៉ាងស្មុគស្មាញ។
ឯកឧត្តមបានអំពាវនាវដល់ប្រជាពលរដ្ឋ យុវជន សូមចូលរួមថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមតាមរយៈការចូលរួមអនុវត្តគោលនយោបាយ«ភូមិ-ឃុំ-សង្កាត់មានសុវត្ថិភាព» ឱ្យបានរឹងមាំទប់ស្កាត់ និងកម្ចាត់រាល់ទម្រង់នៃនយោបាយ និងសកម្មភាពរបស់ពួកជ្រុលនិយម និងមជ្ឈដ្ឋានអគតិនានា ដែលប៉ុនប៉ងនាំកម្ពុជាឱ្យឃ្លាតពីមាគ៌ាប្រជាធិបតេយ្យ នីតិរដ្ឋ។បង្កការបាក់បែកជាតិ បំផ្លាញសន្តិភាព ស្ថិរភាពនយោបាយ និងដំណើរការប្រជាធិបតេយ្យនៅកម្ពុជា ៕
ដោយ៖លី ពៅ
