អភិបាលខេត្តបាត់ដំបង ប្រាប់ប្រជាពលរដ្ឋម្ចាស់អចលនវត្ថុត្រូវថែរក្សាដីធ្លីដែលជាទ្រព្យ
បាត់ដំបង៖ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋក្នុងភូមិស្ពានទំនាប និង ភូមិអន្លង់ស្ដី ឃុំបួរ ស្រុកភ្នំព្រឹក ខេត្តបាត់ដំបង ឯកឧត្តម សុខ លូ អភិបាល ខេត្តបាត់ដំបងបានបញ្ជាក់អំបីសារសំខាន់នៃបណ្ណកម្មសិទ្ធដីធ្លីនិងបានរំលឹកដល់ប្រជាពលរដ្ឋដែលទទួលបានវិញ្ញាបនបត្រសម្គាល់ម្ចាស់អចលនវត្ថុត្រូវថែរក្សាដីធ្លីដែលជាទ្រព្យរបស់ខ្លួនដើម្បីរក្សាទុកចែកតកូនតចៅទៅមុខទៀត។
ឯកឧត្តមអភិបាលខេត្តបាត់ដំបងបានលើកឡើងដូច្នេះ ក្នុងឱកាសឯកឧត្តមនិងឯកឧត្តម គិត ច័ន្ទគ្រឹះស្នា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់អញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ ផ្តល់ជូនប្រជាពលរដ្ឋក្នុងភូមិស្ពានទំនាប និងភូមិអន្លង់ស្ដី ឃុំបួរ ស្រុកភ្នំព្រឹក នាចុងសប្ដាហ៍នេះ។
ក្នុងឱកាសដដែលឯកឧត្តម សុខ លូ ក៏បានណែនាំដល់អាជ្ញាធរ ស្រុក ឃុំ ត្រូវទប់ស្កាត់ការសាងសង់សំណង់មិនរៀបរយ។ ត្រូវថែរក្សាដីចំណីផ្លូវកុំឱ្យមានការរំលោភបំពាន និងត្រូវបើកផ្លូវឱ្យបានធំទូលាយ ដើម្បីសម្រួលដល់ការធ្វើដំណើរ។
ឯកឧត្តមក៏បានរំលឹកដល់ប្រជាពលរដ្ឋ ត្រូវយកចិត្តទុកដាក់លើបញ្ហាអនាម័យបរិស្ថាន។ ចៀសឱ្យឆ្ងាយ ពីគ្រឿងញៀន។ ត្រូវខិតខំការពារខ្លួនពីជំងឺកូវីដ១៩ និងចូលរួមក្នុងយុទ្ធនាការ”ផ្ទះមួយខ្នង ដើមឈើមួយដើម” ដោយបន្តដាំដើមឈើ នៅមុខផ្ទះ តាមដងផ្លូវ តាមទីសាធារណៈ ដើម្បីលើកកម្ពស់សោភណភាពទីប្រជុំជន ក្នុងមូលដ្ឋានខ្លួន។
ដោយឡែកឯកឧត្តម គិត ច័ន្ទគ្រឹះស្នា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានគូសរំលេចថាខេត្តបាត់ដំបង គឺជាខេត្តមួយ ដែលមានសក្ដានុពលធំធេង លើវិស័យកសិកម្ម ទេសចរណ៍ និងជាប៉ូលសេដ្ឋកិច្ចទី៤ នៅកម្ពុជា។ឯកឧត្តម បានរំលឹកដល់ដល់ប្រជាពលរដ្ឋដែលទទួលបានវិញ្ញាបនបត្រសម្គាល់ម្ចាស់អចលនវត្ថុ ត្រូវយកចិត្តទុកដាក់ ក្នុងការរៀបចំភូមិឋានឱ្យបានស្អាតល្អ ត្រូវបន្តខិតខំប្រកបមុខរបររកស៊ី និងដាំដំណាំផ្សេងៗ ដើម្បីផ្គត់ផ្គង់នូវជីវភាពរស់នៅប្រចាំថ្ងៃរបស់ខ្លួនឱ្យបានកាន់តែប្រសើរ៕
ដោយ៖អ៊ុក សំអាន ប.ប
