រដ្ឋមន្ត្រីក្រសួងការពារជាតិកម្ពុជា ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសរសេរនៅលើបណ្តាញសង្គមនារសៀលថ្ងៃទី១៦ ខែមិថុនា ឆ្នាំ២០២៥ នេះថា ៖ យោធាថៃចោទថា «កម្ពុជាបង្វែរកាណុង​កាំភ្លើង​ទៅភូមិដ្ឋាន និងបន្ទាយរបស់យោធាថៃ»។ នេះជាយុទ្ធវិធី​ការពារជាតិ​បស់កម្ពុជា ពេលយើង​បំពាក់​សព្វាវុធ គឺដើម្បីការពារបូរណភាពទឹកដី ច្បាស់ណាស់គោល​ដៅ គឺតម្រង់ទៅខ្មាំងសត្រូវ មិនដែលមានក្បួនទ័ព​ណាដែលបង្វែរកាណុង មកផ្ទះខ្លួនឯងនោះទេ។ ឬមួយកងទ័ពថៃ​រៀន​យុទ្ធវិធី ខុសពីកម្ពុជា???។

ឯកឧត្តម នាយឧត្តម សេនីយ៍ ទៀ សីហា បានបញ្ជាក់ថា ជម្រើស​សន្តិវិធី គឺការចរចារវាងរដ្ឋាភិបាលទាំងពីរ ទាំងផ្នែកនយោបាយ ផ្នែកសេដ្ឋកិច្ច និងផ្នែកផ្សេងៗ ចំពោះផ្នែកយោធា គឺជម្រើសចុងក្រោយ។ យើងត្រៀមរួចជាស្រេចក្នុងការការពារទឹកដីកម្ពុជា ដោយគ្មានមហិច្ឆតា​ឈ្លានពានទៅប្រទេសជិតខាងឡើយ៕
ដោយ៖ពលជ័យ