(សៀមរាប)៖ សម្តេចនាយករដ្ឋមន្ត្រី ហ៊ុន ម៉ាណែត បានអះអាងថា កម្ពុជា មិនខ្លាច​ការគំរាមកំហែងពីភាគីថៃ ដែលបានប្រើប្រាស់សេដ្ឋកិច្ចជាអាវុធ ដើម្បីគំរាមមកលើ​កម្ពុជានោះទេ ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជា​ណាចក្រកម្ពុជា និងជាប្រធានកិត្តិយសសហភាពសហព័ន្ធយុវជនកម្ពុជា ក្នុងឱកាស​អញ្ជើញជាអធិបតីបតីបិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជានៅសាលសណ្ឋាគារសុខាសៀមរាប នៅព្រឹកថ្ងៃទី២៣ ខែមិថុនា ឆ្នាំ២០២៥ ។

សម្តេចធិបតី បានគូសបញ្ជាក់ថា កម្ពុជា មិនខ្លាចការគំរាមកំហែងពីភាគីថៃ ដែល​បាន​ប្រើប្រាស់ សេដ្ឋកិច្ចជាអាវុធ គំរាមមកលើកម្ពុជានោះឡើយ គឺកម្ពុជា គ្រាន់តែធ្វើ តាម​ក្រោយតែប៉ុណ្ណោះ ដើម្បីឆ្លើយតបការគំរាមកំហែងពីថៃ ។

សម្តេចធិបតី បានថ្លែងថា ភាគីថៃ បានគំរាមកាត់ភ្លើង កាត់អ៊ីនធើណេត និង​លាប​ពណ៌មកលើកម្ពុជា ដោយអាងថា ខ្លួនមានសេដ្ឋកិច្ចខ្លាំង ហើយរហូតដល់ហ៊ាន ចូល​មកបាញ់សម្លាប់ទាហ៊ានខ្មែរ កាលពីថ្ងៃទី២៨ ខែឧសភា ឆ្នាំ២០២៥ ទៀតផង ។

សម្តេចធិបតី ហ៊ុន ម៉ាណែត បានគូសបញ្ជាក់ថា ដើម្បីកុំឱ្យថៃ ចេះតែបន្តគំរាម កម្ពុជា បានសម្រេចចិត្តឈប់ទិញ ភ្លើង និងប្រើអ៊ីនធើណេតពីថៃតែម្តង ហើយថ្មីៗនេះ សម្រេ​ច​បិទ ការនាំចូលប្រេង និងឧស្ម័នគ្រប់ប្រភេទពីថៃថែមទៀតផង ដែលទាំង​អស់នេះ កើតឡើងដោយសារភាគីថៃ ជាអ្នកបង្កមុន ។

សម្តេចក៏បានផ្តាំទៅភាគីថៃម្តងទៀតពាក់ព័ន្ធនឹងការបិទច្រកព្រំដែនថា ដរាបណា​ភាគី​ថៃ បើកច្រកជាឯកតោភាគីវិញ ទើបកម្ពុជា សម្រេចបើកវិញដែរ ហើយការ​បើក​នេះ គឺមិនមែនតែមួយច្រកទេ គឺគ្រប់ច្រកទាំងអស់ ទើបកម្ពុជាបើក ។

កម្ពុជា មិនចង់បិទច្រកព្រំដែនទេ ដោយសារកងទ័ពថៃ បិទព្រំដែនមិនបានពិភាក្សា​ជា​មួយ​កម្ពុជា។ បើកងទ័ពថៃ បើកដោយឯកោភាគី កម្ពុជា និងអនុវត្តតាមក្នុងរយៈពេល ៥ម៉ោងក្រោយ ។

សម្តេចធិបតី ហ៊ុន ម៉ាណែត បន្ថែមថា ការបិទដោយឯកតោភាគី គួរគិតគូរពីអត្ថ​ប្រ​យោជន៍​របស់ ប្រជាពលរដ្ឋនៅតាមព្រំដែន។ ការបិទព្រំដែននេះ កុំចោទដាក់មក​កម្ពុជា សំខាន់កងទ័ពថៃ ឬក៏រាជរដ្ឋាភិបាលថៃ បើកដោយឯកតោភាគី កម្ពុជា នឹងបើកច្រកតាមក្រោយ។

សម្តេចធិបតី បានគូសបញ្ជាក់ថា កម្ពុជា មានសិទ្ធិគ្រប់គ្រាន់ក្នុងការបិទព្រំដែន​ជា​មួយថៃ ជាអចិន្រ្តៃយ៍ ប៉ុន្តែកម្ពុជា មិនធ្វើដូច្នោះទេ គឺកម្ពុជា ធ្វើសម្បទានឱ្យថៃបើ​សិនជាថៃបើកវិញមុន កម្ពុជា ក៏បើកព្រំដែនវិញដែរ ព្រោះភាគីថៃ ជាអ្នកបិទជា​ឯកតោភាគីមុន។ ពាក់ព័ន្ធនឹងការបិទ-បើក ច្រកព្រំដែននេះ ដែរ សម្តេចបានគូស​បញ្ជាក់ដែរថា បើសិនភាគីថៃ មិនព្រមបើកច្រកមុនទេ កុំនិយាយរឿងកិច្ច​ប្រជុំចរ​ចាឱ្យសោះរួមមាន កិច្ចប្រជុំគណៈកម្មាធិការព្រំដែន​ថ្នាក់ភូមិភាគកម្ពុជា-ថៃ (RBC) ថ្នាក់តំបន់ជាដើម គឺកម្ពុជា មិនចរចាជាដាច់ខាត ។

សម្តេចនាយករដ្ឋមន្រ្តី បានអះអាងថា ការដោះស្រាយបញ្ហាព្រំដែនជាមួយថៃ គឺ​កម្ពុជា មិនធ្វើខ្លួនឱ្យពុះកញ្ជ្រោលនោះទេ ពោល នឹងធ្វើខ្លួនដូចជាពស់អីចឹង ដោយ​មិនស្រែកឡូឡា មិនរញ៉េរញ៉ៃ ប៉ុន្តែចឹកឱ្យស្លាប់តែម្តង ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ