សម្ដេចធិបតី បានអរគុណដល់ប្រជាពលរដ្ឋខ្មែរ ដែលបានចូលរួមគាំទ្រ ដល់ផលិតផល កសិផលខ្មែរ ក្នុងកាលៈទេសៈនេះ ខណៈសម្ដេចបញ្ជាក់ថា ទោះបីព្រំដែនកម្ពុជា-ថៃមិនបើក រាជដ្ឋាភិបាលបានត្រៀមរួចហើយ ដើម្បីនាំផលិតផលខ្មែរ ទៅកាន់ប្រទេសផ្សេងៗទៀត ។

សម្ដេច បានបញ្ជាក់ថា សម្ដេចបានបញ្ជារួចហើយឱ្យក្រសួងពាក់ព័ន្ធ ពិនិត្យមើលជំរុញការកែច្នៃ ផលិតផលខ្មែរ ផ្គត់ផ្គង់តម្រូវការក្នុងស្រុក ទាំងផលិតផលកសិផលបន្លែ និងសាច់ និងបន្តជំរុញ លើវិស័យកសិឧស្សាហកម្មនៅនឹងកន្លែង ដើម្បីផ្គត់ផ្គង់ក្នុងស្រុកផង និងនាំចេញទៅកាន់ ពិភពលោកផងដែរ ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ថ្លែងដូច្នេះ ក្នុងឱកាសអបអរសាទរ ទិវាមច្ឆជាតិ ១ កក្កដា នៅបឹងទន្លេបាទី ភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ នាព្រឹកថ្ងៃទី០១ ខែកក្កដា ឆ្នាំ២០២៥ ។

ដោយ ៖ វណ្ណលុក