(កំពង់ធំ)៖ លោក ស្រុង វ៉ាន់ណូ ប្រធានសហព័ន្ធសហជីពកម្ពុជាការពារកូនខ្មែរ (FUCPCK) និងជាសមាជិកសហភាពសហជីពមរតកជាតិកម្ពុជា (CCTUH)  ដែលមាន លោក តុល ផាន់មឿង ជាប្រធាន បានដឹកនាំក្រុមការងារ សមាជិក សមាជិការ រួមទាំងផ្នែករដ្ឋបាលរោងចក្រឌីឡាក់ស៍  ចែកសម្ភារសិក្សា ជូនសិស្សសាលាបឋមសិក្សាដូនល្អ មានទីតាំងនៅ ភូមិដូនល្អ ឃុំសំព្រោជ ស្រុកស្ទោង ខេត្តកំពង់ធំ នៅថ្ងៃទី២៤ ខែសីហា ឆ្នាំ២០២៥ ដែលមានលោកគ្រូ អ្នកគ្រូបង្រៀនសរុប ៧នាក់ ស្រី៥នាក់ និងមានសិស្សសរុប ២៦៤នាក់ ស្រី ១៣៤នាក់ ក្នុងនោះមានសិស្សផ្នែកមត្តេយ្យសហគមន៍ចំនួន ៥០នាក់ ស្រី ២៥នាក់ ។

សម្ភារដែលប្រគល់ជូនរួមមាន ៖ តុសម្រាប់សិស្សានុសិស្សអង្គុយសិក្សា ចំនួន ៩០, សៀវភៅសរសេរចំនួន ៨១០ក្បាល, ប៊ិចចំនួន ៥៤០ដើម, ខ្មៅដៃចំនួន ៥៤០ដើម, ជ័រលុបចំនួន ២៧០ដុំ, បន្ទាត់ចំនួន ២៧០ដើម និង សឺមីដាក់សម្ភារចំនួន ២៧០ ដោយក្នុងនោះសិស្សម្នាក់ៗទទួលបានសៀវភៅសរសេរ ៣ក្បាល, ប៊ិច ២ដើម, ខ្មៅដៃ ២ដើម,ជ័រលុប ១ដុំ, បន្ទាត់ ១ដើម និងសឺមីដាក់សម្ភារចំនួន ១ និងបានផ្តល់ជូនថវិកាមួយចំនួនសម្រាប់ផ្គត់ផ្គង់សាលាប្រើប្រាស់ រួមទាំងអាហារសាមគ្គីរួមគ្នា ជាមួយអនុប្រធានការិយាល័យស្រុក មេឃុំ មេភូមិ មេប៉ុស្តិ៍ គណកម្មការ អាជ្ញាធរភូមិ និងមាតាបិតាសិស្សផងដែរ ។

នៅក្នុងថ្ងៃនោះដែរ លោក ស្រុង វ៉ាន់ណូ និងក្រុមការងារ ប្រគល់ជូនសម្ភារឧបត្ថម្ភជូនដល់វីរៈកងទ័ពឈរជើងនៅតំបន់ភ្នំទ្រព្យរួមមាន ៖ តង់ទំហំ ៣មx៤ម ចំនួន២០, ថ្មអាយកូម DR2000 ចំនួន ៨ដើម និង DR1000 ចំនួន ៨ដើម ៕

ដោយ ៖ វណ្ណលុក