ស្ទឹងត្រែង៖ខណៈដែលប្រជាពលរដ្ឋ និងពុទ្ធបរិស័ទប្រារព្ធនូវពិធីកាន់បិណ្ឌ​និងភ្ជុំបិណ្ឌ រដ្ឋមន្ត្រីក្រសួងបរិស្ថាន​ឯកឧត្ដមបណ្ឌិត អ៊ាង សុផល្លែត បានដឹកនាំប្រតិភូក្រសួងបរិស្ថាន រួមជាមួយ​ក្រុមហ៊ុន អាន ម៉ាឌី ហ្គ្រុប ចំការកៅស៊ូ​ពាមជាំង រដ្ឋបាលខេត្តស្ទឹងត្រែង អញ្ជើញសួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ទៅ​ជូនដល់​កងទ័ពនៃបញ្ជាការដ្ឋានយោធ​ភូមិភាគទី១ ។

បញ្ជាការដ្ឋានយោធ​ភូមិភាគទី១ជាអង្គភាពចងសម្ព័ន្ធមេត្រីជាមួយក្រសួង​បរិស្ថាន​នៅក្នុងភូមិសាស្ត្រខេត្តស្ទឹងត្រែង។ ពិធីសាកសួរសុខទុក្ខនិងប្រគល់​អំណោយបានប្រព្រឹត្តទៅនៅក្នុងបរិវេណនៃបញ្ជាការដ្ឋានយោធភូមិភាគទី១ ខេត្តស្ទឹងត្រែងនាថ្ងៃទី៩ ខែកញ្ញា ឆ្នាំ២០២៥។

ក្នុងពិធីនេះឯកឧត្ដមបណ្ឌិត អ៊ាង សុផល្លែត បានបញ្ជាក់ថា ក្នុងនាមសម្ព័ន្ធ​មេត្រី​ជាមួយកងទ័ព ក្រសួងបរិស្ថាន រួមជាមួយក្រុមការងាររាជរដ្ឋាភិបាល​ចុះមូលដ្ឋានខេត្តត្បូងឃ្មុំ បានយកចិត្តទុកដាក់ដល់សុខទុក្ខកងទ័ពជួរមុខ ការពារព្រំដែនជានិច្ច ទោះក្នុងកាលៈទេសណាក៏ដោយ ។ក្រសួងក៏បាន​នាំយកជាស្បៀង គ្រឿងឧបភោគ បរិភោគ និងសម្ភារៈប្រើប្រាស់យក​ទៅ​ជូនវីរកងទ័ព ដែលកំពុងឈរជើងប្រយុទ្ធប្រឆាំងជាមួយសត្រូវឈ្លានពានទឹកដី ប្រកប​ដោយភាពអង់អាចក្លាហាន និងការលះបង់កម្លាំងកាយ ចិត្ត អាយុជីវិត ក្នុងបុព្វហេតុការពារជាតិ បូរណភាព​ទឹកដី និងប្រជាជនកម្ពុជា។

ក្នុងកម្មវិធីដដែលនេះដែរឯកឧត្ដមរដ្ឋមន្រ្តីបានពាំនាំយកប្រសាសន៍ផ្តាំផ្ញើសួរសុខទុក្ខ របស់សម្តេចអគ្គមហា​សេនា​បតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុន្នី ព្រមទាំងថ្នាក់ដឹកនាំគ្រប់ថ្នាក់ នៃរាជរដ្ឋា​ភិបាលកម្ពុជា និងជាពិសេសរបស់​ក្រសួងបរិស្ថាន ជូនចំពោះកងទ័ពទាំងអស់ នៃយោធភូមិភាគទី១។

ឯកឧត្ដមបណ្ឌិត អ៊ាង សុផល្លែត បានប្រកាសផ្តល់អំណោយដ្រូនចំនួន ៥គ្រឿង ដល់បញ្ជាការដ្ឋានយោធភូមិភាគ១ ដើម្បីចូលរួមពង្រឹងខឿន​ការពារជាតិ ជាពិសេសក្នុងការឆ្លើយតបនឹងកិច្ចសហប្រតិបត្តិការល្អ ក្នុងការទប់ស្កាត់​បទល្មើស​​ធនធានធម្មជាតិ នៅតាមតំបន់ការពារធម្មជាតិ នៅក្នុងភូមិខេត្តស្ទឹងត្រែង។

ដោយឡែកអំណោយដ៏ថ្លៃថ្លារបស់សម្តេចធិបតី និងលោកជំទាវបណ្ឌិត ក្នុងឱកាសនោះរួមមាន៖ អង្ករ ត្រីខ គ្រឿងឧបភោគ បរិភោគជាច្រើន កុំព្យុទ័រយួរដៃ ម៉ាស៊ីនព្រីនធ័រ និងសម្ភារប្រើប្រាស់ជាច្រើនផ្សេងទៀត រួមជាមួយថវិកាមួយចំនួនផងដែរ។

ជម្រាបជូនគណៈប្រតិភូក្រសួងបរិស្ថាន ឧត្តមសេនីយ៍ទោ លី សូរ៉ារិទ្ធ មេបញ្ជាការយោធភូមិភាគទី១ បានថ្លែង​អំណរគុណចំពោះការបង្កើតឱ្យ​មានការចងសម្ព័ន្ធមេត្រីភាពរវាងកងទ័ពជាមួយក្រសួង ស្ថាប័ន និង​វិស័យឯកជន។ ឧត្តមសេនីយ៍ទោបញ្ជាក់ថា សម្ព័ន្ធមេត្រីភាពនេះ បានធ្វើឱ្យទំនាក់ទំនងរវាងអង្គភាពកងទ័ព ជាពិសេសទ័ពជួរ​មុខ​នៃយោធភូមិភាគទី១ក្នុងខេត្តស្ទឹងត្រែង កាន់តែមានភាពមោះមុត ក្នុងការការពារជាតិមាតុភូមិ ការពារបូរណ​ភាព​ទឹកដីកម្ពុជា ឱ្យបានដាច់ខាត។កងកម្លាំងទាំងអស់បប្តេជ្ញាប្រឆាំងដាច់ខាតរាល់ការឈ្លានពានពីសត្រូវ និងគាំទ្រការ​ដឹកនាំរបស់រាជរដ្ឋាភិបាលដែលដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា៕
ដោយ៖ឡុង សំបូរ + ដេង ម៉ាវិន