ឯកឧត្តមរដ្ឋមន្ត្រី សុខ សូកេន ៖ អភិវឌ្ឍសមត្ថភាពមន្រ្តី អធិការកិច្ច ភាពជាអ្នកដឹកនាំ មានសារៈសំខាន់ណាស់
(ភ្នំពេញ)៖ ការអភិវឌ្ឍសមត្ថភាពមន្រ្តីក្នុងវិស័យអធិការកិច្ចលើ ភាពជាអ្នកដឹកនាំ ជាពិសេសតាមរយៈវគ្គបណ្ដុះបណ្ដាលនេះ ដែលផ្ដោតលើភាពជាអ្នកដឹកនាំផ្អែកលើទំនុកចិត្ត ការបង្កើនប្រសិទ្ធភាពរបស់ក្រុមការងារអធិការកិច្ចនិងការបណ្ដុះបណ្ដាលធនធានយុវជន និងការទំនាក់ទំនងនិងការគ្រប់គ្រងជម្លោះប្រកបដោយប្រសិទ្ធភាព គឺពិតជាមានសារៈសំខាន់ណាស់សម្រាប់ការដឹកនាំ និងការសម្រេចចិត្តក្នុងការងារអធិការកិច្ច ដូចកំណត់ក្នុងយុទ្ធសាស្រ្ត «ព៤ជ៤» របស់ក្រសួងអធិការកិច្ច ក្នុងការជំរុញនិងបង្កើនសមត្ថភាពស្ថាប័ន ស្របជាមួយនឹងយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។
នេះជាប្រសាសន៍លើកឡើងរបស់ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច ក្នុងឱកាសបានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលស្ដីពី “ភាពជាអ្នកដឹកនាំ” ដែលរៀបចំដោយវិទ្យាស្ថានជាតិអធិការកិច្ច សម្រាប់សិក្ខាកាមចំនួន៥០នាក់ ជាមន្រ្តីរាជការក្រសួង និងមន្ទីរអធិការកិច្ច នារសៀលថ្ងៃទី២៨ ខែវិច្ឆិកា ឆ្នាំ២០២៥ នៅទីស្ដីការក្រសួង។
លោកស្រី ហៀក គឹមស៊ឹង នាយិការងវិទ្យាស្ថានជាតិអធិការកិច្ចបានឱ្យដឹងថា វិទ្យាស្ថានជាតិអធិការកិច្ច បានរួមចំណែកលើកកម្ពស់ សមត្ថភាពជំនាញវិជ្ជាជីវៈអធិការកិច្ច តាមរយៈការផ្តល់ការបណ្តុះបណ្តាលដល់មន្រ្តីរាជការរបស់ក្រសួងអធិការកិច្ច និងក្រសួងស្ថាប័ននានា ព្រមទាំងរដ្ឋបាលថ្នាក់ក្រោមជាតិបានជាង ១០០០នាក់ ។
វគ្គបណ្តុះបណ្តាលភាពជាអ្នកដឹកនាំនាពេលនេះ បង្កើតឡើងដោយផ្អែកលើសមិទ្ធផលទាំងនោះ និងឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់យើងក្នុងការអភិវឌ្ឍអ្នកដឹកនាំឱ្យមានសមត្ថភាព មានក្រមសីលធម៌ ឆ្លើយតបទៅនឹងតម្រូវការនៃអភិបាលកិច្ចល្អ និងភាពស្អាតស្អំក្នុងរដ្ឋបាលសាធារណៈ។
ឯកឧត្តម សុខ សូកេន រដ្ឋមន្រ្តីក្រសួងអធិការកិច្ច បានកោតសរសើរ និងវាយតម្លៃខ្ពស់ចំពោះគ្រូឧទ្ទេស ថ្នាក់ដឹកនាំនិងមន្ត្រីនៃវិទ្យាស្ថានជាតិអធិការកិច្ច ដែលបានខិតខំរៀបចំ និងធ្វើឱ្យវគ្គបណ្ដុះបណ្ដាលនេះបញ្ចប់ប្រកបដោយភាពជោគជ័យខ្ពស់។
ឯកឧត្តម រដ្ឋមន្ត្រីក្រសួងអធិការកិច្ច លើកទឹកចិត្តឱ្យមានការចូលរួមយ៉ាងផុលផុសក្នុងការសិក្សា បង្ហាញពីការប្តេជ្ញាចិត្តរបស់លោក លោកស្រីចំពោះការអភិវឌ្ឍខ្លួន និងវិជ្ជាជីវៈ ហើយសំខាន់ជាងនេះទៅទៀត ការលះបង់ ក្នុងការបម្រើផលប្រយោជន៍សាធារណៈដោយភាពស្មោះត្រង់ និងការទទួលខុសត្រូវ។ ភាពជាអ្នកដឹកនាំមិនមែនគ្រាន់តែជាតំណែង ឬ មុខងារនោះទេ។ វាគឺជាការអនុវត្តដែលតម្រូវឱ្យមានភាពក្លាហាន ភាពយុត្តិធម៌ តម្លាភាព និងការខិតខំប្រឹងប្រែងឥតឈប់ឈរដើម្បីកែលម្អ។
ឯកឧត្តមរដ្ឋមន្ត្រី សូមឱ្យសិក្ខាកាមទាំងអស់ទទួលស្គាល់ថា ភាពជាអ្នកដឹកនាំក្នុងវិស័យអធិការកិច្ចសំខាន់គឺសេវាកម្ម ភាពសុចរិត និងគណនេយ្យភាព។ ដូច្នេះសូមឱ្យសិក្ខាកាមទាំងអស់ ប្រែក្លាយចំណេះដឹងដែលទទួលបានពីការបណ្តុះបណ្តាលនេះទៅជាការអនុវត្តជាក់ស្តែងដើម្បីលើកកម្ពស់ប្រសិទ្ធភាពការងារឱ្យកាន់តែប្រសើរ៕
រូបភាព ៖ ថេត វិចិត្រ
អត្ថបទ ៖ ហេង សម្បត្តិ
