ភ្នំពេញ៖ក្នុងសន្និសីទសារព័ត៌មាននៅថ្ងៃទី២៩ ខែធ្នូ ឆ្នាំ២០២៥ ឯកឧត្តមឧបនាយករដ្ឋមន្ដ្រី ប្រាក់ សុខុន រដ្ឋមន្ដ្រី​ក្រសួង​ការបរទេស និងសហប្រតិ​បត្តិ​ការ​អន្ដរជាតិកម្ពុជា​បានមានប្រសាសន៍ថា បើមិនមានអ្វីប្រែប្រួលទេនៅវេលាម៉ោង ១២ថ្ងៃ​ត្រង់ ថ្ងៃទី៣០ ខែធ្នូ ឆ្នាំ២០២៥​ស្អែកនេះ កម្ពុជានឹងទទួលស្វាគមន៍វីរកងទ័ពទាំង ១៨រូប ដែលថៃចាប់ខ្លួន​កាលពី​ពេលកន្លង​ទៅឱ្យត្រឡប់មកកម្ពុជាវិញ ។

ឯកឧត្តម ប្រាក់ សុខុន បាននិយាយបន្តដោយសុទិដ្ឋិនិយមថា យើងក៏​ត្រៀមលក្ខណៈ ហើយសង្ឃឹមថា នឹងមិនមាន​បញ្ហា​អ្វីកើតឡើង​ពីនេះទៅដល់ម៉ោង១២ថ្ងៃត្រង់ថ្ងៃស្អែក (ថ្ងៃទី៣០ ខែធ្នូ ឆ្នាំ២០២៥) នឹងបានទទួលស្វាគមន៍ ទាហាន​យើងទាំង១៨នាក់ ដើម្បីគាត់បានវិលត្រឡប់មកផ្ទះសម្បែងជួបជុំគ្រួសារ ប្រពន្ធ កូន ឪពុកម្ដាយ របស់គាត់វិញ​ដោយ​សុវត្ថិភាព។

ឯកឧត្តម ប្រាក់ សុខុន បានមានវត្តមាននៅខេត្តយូណាន ប្រទេសចិនរយៈពេលពីរថ្ងៃ ពីថ្ងៃទី២៨ និងទី២៩ ធ្នូ ដើម្បី​ចូលរួមកិច្ចប្រជុំត្រីភាគី កម្ពុជា ថៃ និងចិន ក្រោមការអញ្ជើញ​ពីឯកឧត្តម វ៉ាង យី រដ្ឋមន្រ្តីក្រសួងការបរទេសចិន។

ក្នុងសន្និសីទកាសែតដដែលនេះ ឯកឧត្តមរដ្ឋមន្រ្តីការបរទេសកម្ពុជា​បានគូសបញ្ជាក់ថា នេះជាលទ្ធផលដែលយើង​សម្រេច​បាន​នៅក្នុង​កិច្ចប្រជុំពីរថ្ងៃកន្លងទៅនេះ។

គប្បីជម្រាបជូនថា តាមរយៈកិច្ចប្រជុំពិសេសលើកទី៣ នៃគណៈកម្មា​ធិការព្រំដែនទូទៅ (GBC) នៅច្រកទ្វារព្រំដែន អន្តរជាតិព្រំ(ខេត្ត​ប៉ៃលិន ប្រទេសកម្ពុជា)-បានប៉ាក់កាដ (ខេត្តច័ន្ទបុរី ប្រទេសថៃ) កាលពីព្រឹកថ្ងៃទី២៧ ខែធ្នូ ឆ្នាំ២០២៥​នេះ កម្ពុជា-ថៃបានឯកភាព​ឈប់បាញ់ជាបន្ទាន់នៅវេលាម៉ោង១២ថ្ងៃត្រង់ថ្ងៃទី២៧ ខែធ្នូ និងត្រូវ​អនុវត្តរួម​គ្នារយៈពេល៧២​ម៉ោងមិនត្រូវឱ្យមានការ​ផ្ទុះអាវុធឡើយ។

ក្នុងការព្រមព្រៀងនេះដោយស្របតាមស្មារតីនៃសេចក្តីប្រកាសរួមទីក្រុងគូឡាឡាំពួ ចុះថ្ងៃទី២៦ ខែតុលា ឆ្នាំ២០២៥ យោធិនកម្ពុជា​ចំនួន១៨ រូប នឹងត្រូវបញ្ជូនត្រឡប់មកកម្ពុជាវិញ បន្ទាប់ពីបទឈប់​បាញ់ ត្រូវបានគោរពយ៉ាង​ពេញលេញ​ក្នុងរយៈពេល ៧២ ម៉ោង។

សូមបញ្ជាក់ថា ថ្ងៃទី២៩ធ្នូ ឆ្នាំ២០២៥នេះជាថ្ងៃទី១៥៣ ដែលវីរកង​ទ័ពកម្ពុជាចំនួន១៨រូប ត្រូវបានចាប់ខ្លួននិងដាក់ឱ្យស្ថិត​ក្រោមការឃុំ​គ្រង​របស់យោធាថៃ៕

ដោយ៖ វណ្ណលុក