ការ៉ាកាស ៖ មេដឹកនាំគណបក្សប្រឆាំងដ៏មានឥទ្ធិពល នៅវេណេស៊ុយអេឡា បានប្រកាសស្វាគមន៍ការវាយប្រហារ របស់សហរដ្ឋអាមេរិក មកលើប្រទេសរបស់ខ្លួន។

អំឡុងចូលរួមកម្មវិធី “Hannity” របស់អង្គភាពសារព័ត៌មាន Fox News កាលពីថ្ងៃអង្គារ លោកស្រី Maria Corina Machado ដែលក៏ជាម្ចាស់ពានរង្វាន់ណូបែលសន្តិភាព ផងនោះ បានបង្ហាញពីការគាំទ្រចំពោះសកម្មភាពយោធារបស់អាមេរិក នៅកណ្តាលរដ្ឋធានីការ៉ាកាស ដោយលោកស្រីបានថ្លែងចាត់ទុកថា ជាជំហានដ៏ធំសម្រាប់មនុស្សជាតិ ដើម្បីសេរីភាព និង សេចក្តីថ្លៃថ្នូរ។

បើតាមសារព័ត៌មាន រយធឺ, លោកស្រីបានបញ្ជាក់ជំហរបែបនេះ ក្នុងពេលមានវត្តមាន នៅប្រទេស
ន័រវេស អំឡុងពេលទៅទទួលពានរង្វាន់សន្តិភាព ហើយ មិនទាន់បានត្រលប់ចូលប្រទេសវិញនោះទេ។ ប៉ុន្តែ
លោកស្រី Maria Corina Machado បានប្រាប់ថា មានគម្រោងត្រឡប់ ចូលវ៉េណេស៊ុយអេឡា វិញ ឲ្យបានឆាប់ តាមដែលអាចធ្វើទៅបាន។

ជុំវិញប្រតិបត្តិការយោធាអាមេរិក ចូលទៅចាប់ខ្លួន លោកប្រធានាធិបតី នីកូឡាស់ ម៉ាឌូរ៉ូ ដែលជាគូប្រជែងនយោបាយដ៏ស្វិតស្វាញរបស់ខ្លួន, លោកស្រីហាក់បានច្រានចោលពីការជាប់ពាក់ព័ន្ធ ដោយបានអះអាងថា លោកស្រីពុំបានជជែកជាមួយលោក ដូណាល់ ត្រាំ តាំងពីខែតុលា ឆ្នាំ២០២៥ មកម្ល៉េះ។ ជាមួយគ្នានេះ កាលពីថ្ងៃសៅរ៍ លោកប្រធានាធិបតីអាមេរិក បានច្រានចោលគំនិត ដែលថា លោកបានធ្វើការ ជាមួយលោកស្រី Machado ដោយលោក ត្រាំ គ្រាន់តែនិយាយថា លោកស្រីមិនមានការគាំទ្រ ឬ ការគោរព នៅក្នុងប្រទេសនេះទេ។

ការផ្តល់កិច្ចសម្ភាសន៍ជាលើកដំបូង របស់លោកស្រី តាំងពីមានព្រឹត្តិការណ៍វាយឆ្មក់របស់អាមេរិក នាពេលនេះ ត្រូវបានធ្វើឡើង ចំពេលដែលមនុស្សជាច្រើន មានការងឿងឆ្ងល់អំពីអនាគត ភាពជាអ្នកដឹកនាំរបស់ប្រទេស នៅអាមេរិកខាងត្បូង មួយនេះ។

យ៉ាងណា កាលពីថ្ងៃចន្ទ អនុប្រធានាធិបតី និងជារដ្ឋមន្ត្រីប្រេង របស់ប្រទេសវ៉េណេស៊ុយអេឡា លោកស្រី Delcy Rodriguez បានស្បថចូលកាន់តំណែង ជាប្រធានាធិបតីបណ្តោះអាសន្ន៕

ប្រភពពី រយធឺ, ប្រែសម្រួល ៖ សារ៉ាត