ភ្នំពេញ៖ឆ្នាំ២០២៥កន្លងទៅទំហំពាណិជ្ជកម្មកម្ពុជាសម្រេច​បាន៦៥,២០ ពាន់លានដុល្លារអាម៉េរិក គឺកើនឡើង​ក្នុងរង្វង់​១៨ភាគរយ ក្នុ្ងងនោះការនាំ​ចេញក៏មានកំណើន១៧ភាគរយ ។ក្រសួងក៏កំពុងអនុវត្តតាម​ចក្ខុវិស័យ​ពង្រឹងទីផ្សារចាស់ ពង្រីកទីផ្សារថ្មីផងដែរ។នេះជាការបញ្ជាក់របស់ លោក​ជំទាវ ចម និម្មល រដ្ឋមន្រ្តី​ក្រសួងពាណិជ្ជកម្ម។

ក្រសួងពាណិជ្ជកម្មបានប្រារព្ធសន្និបាតបូកសរុបលទ្ធផលប្រចាំ ឆ្នាំកាលពី​ព្រឹកថ្ងៃទី៨ ខែមករា ឆ្នាំ២០២៦ ។ក្នុងឱកាស​នេះលោក​ជំទាវរដ្ឋមន្រ្តី ចម និម្មល បានប្រាប់សមាជិកអង្គសន្និបាតថា ឆ្នាំ២០២៥​កន្លងទៅ ការនាំ​ចេញ​ផលិតផល​កម្ពុជាបានកើនឡើងដល់១៦៩ប្រទេស ខណៈនៅ​ឆ្នាំ២០២៤​មានប្រមាណ ១៦៤ប្រទេស។លោកជំទាវបន្ថែមថា កំណើននេះ​​ស្របតាមផែនការដែលបានកំណត់។

ទំនិញសំខាន់ៗរបស់កម្ពុជាសម្រាប់ការនាំចេញរួមមាន សម្លៀកបំពាក់ ផលិតផល​ធ្វើដំណើរ កាបូប ស្បែកជើង គ្រឿងអេឡិច​ត្រូនិក សំបកកង់​រថយន្ត ទៅចក្រយាន ដំឡូងមី ស្វាយចន្ទីរ អង្ករ ម្រេច ស្ករតោ្នត និងជ័រកៅស៊ូ​ជាដើម។

លោកជំទាវរដ្ឋមន្រ្តីនៅបានអះអាងទៀតថា ក្រសួងបានសម្រប​សម្រួល​ដោះ​ស្រាយទីផ្សារសំរាប់ដំណាំល្ពៅ និង​ល្ហុង ដោយបានតភ្ជាប់បណ្តាញ​ជាមួយនឹងបណ្តាផ្សារទំនើបធំៗ ដើម្បីប្រមូលទិញល្ពៅចំនួន ២១.៦០០​តោននៅខេត្ត​ព្រះវិហារ និងល្ហុងចំនួន១៥៧តោននៅខេត្តកណ្តាល ។ក្រសួងបានជំរុញការចុះ​អនុស្សរណៈយោគយល់គ្នាជាមួយ​ក្រុមហ៊ុន​ផលិត​ចំណីសត្វក្នុងស្រុកចំនួន ១០ ប្រមូលទិញពោតក្រហម ដំឡូងមី និងចុង​អង្ករ កន្ទក់សរុប ៨៨ម៉ឺនតោន​ក្នុងមួយឆ្នាំ​សម្រាប់ផលិតចំណីសត្វ។ក្រសួងពាណិជ្ជកម្មក៏បានរក្សានូវសេ្ថរភាពទំនិញនៅលើទីផ្សារ ទៅលើ​តម្លៃទំនិញ​សម្រាប់​ជីវភាព ,ការសម្របសម្រួលថ្លៃលក់រាយប្រេងឥន្ទនៈ​តាមស្ថានីយ ដោយផ្អែកទៅតាមតម្លៃស្ថិតនៅលើទីផ្សារ​អន្តរជាតិ ផងដែរ។

លោកជំទាវ ចម និម្មល បានហៅសមិទ្ធផលប្រចាំ២០២៥ ជាលទ្ធផល​នៃការដាក់ចេញនូវផែនការដ៏មុតស្រួច​ជាបន្តបន្ទាប់​របស់រាជរដ្ឋាភិបាល ក្នុងការជំរុញការធ្វើពិពិធកម្មពាណិជ្ជកម្មក្នុងស្រុក និងការនាំចេញ តាមរយៈ​វិធានការបង្កើនតម្លៃ​បន្ថែមនៅក្នុងខ្សែច្រវាក់តម្លៃ ពង្រឹងខ្សែច្រវាក់​ផ្គត់ផ្គង់ក្នុងស្រុក តំបន់ និងសកល ។លើកស្ទូយធុរកិច្ចថ្មី សហគ្រិនភាព និងបន្តធ្វើឱ្យប្រសើរឡើង នូវកិច្ចសម្រួលពាណិជ្ជកម្ម ដើម្បីអាចសម្រប​សម្រួលនូវភាពប្រកួតប្រជែង និងប្រសិទ្ធភាព​ខ្ពស់នៅក្នុងបរិបទ​ពាណិជ្ជ​កម្មឌីជីថលជាដើម។

ទន្ទឹមនេះ ក្រសួងពាណិជ្ជកម្មបានទទួលស្គាល់ថា វិស័យពាណិជ្ជកម្ម​របស់កម្ពុជា​ក៏ទទួលរងឥទ្ធិពលនៃ​បរិបទមិនប្រាកដ​ប្រជាខ្ពស់​នៃសេដ្ឋកិច្ច​ពាណិជ្ជកម្មសកលផងដែរ ក្នុងនោះក៏មានជម្លោះ​ព្រំដែនកម្ពុជា-ថៃ ផងដែរ​។ប៉ុន្តែរដ្ឋមន្រ្តីក្រសួង​ពាណិជ្ជ​កម្ម​បានបង្ហាញពីមាគ៌ានៃការបន្តដំណើរ គឺក្រសួងបោះជំហានយ៉ាងស្វាហាប់​ដោយបានធ្វើសមាហរណកម្មទៅក្នុង​សេដ្ឋកិច្ច​តំបន់និងពិភពលោក ស្របតាមចក្ខុវិស័យ និងអភិក្រម ពង្រឹង​ទីផ្សារ​ចាស់ និងពង្រីកទីផ្សារថ្មី និងបន្តអនុវត្ត​នូវអនុសាសន៍​កែទម្រង់រស់,​មិនកែទម្រង់ស្លាប់ សំដៅលើកកម្ពុស់អភិបាលកិច្ចស្ថាប័ន ពង្រឹងប្រសិទ្ធ​ភាព​នៃការផ្តល់សេវា​សារធារណៈ ដើម្បីអភិវឌ្ឍន៍វិស័យពាណិជ្ជកម្ម​ប្រកប​ដោយចីរភាព៕
អត្ថបទ៖ង៉ាន់ ទិត្យ
រូបភាព៖រិន រចនា