បរទេស ៖ អ៊ីរ៉ង់ រំពឹងថា នឹងមានកិច្ចពិភាក្សា ជាមួយអាមេរិក បន្ថែមទៀត បន្ទាប់ពីមានបរិយាកាសវិជ្ជមានល្អ អំឡុងការចរចា ដំបូង នៅក្នុងប្រទេសអូម៉ង់ កាលពីថ្ងៃសុក្រ។

រដ្ឋមន្ត្រីការបរទេសអ៊ីរ៉ង់ លោក Abbas Araghchi ដែលដឹកនាំគណៈប្រតិភូ ទៅចូលរួមប្រជុំ នៅទីក្រុង Muscat បានអះអាងថា កិច្ចពិភាក្សា ផ្តោតទាំងស្រុង លើកម្មវិធីនុយក្លេអ៊ែរអ៊ីរ៉ង់ ដែលលោកខាងលិច ជឿជាក់ថា មានគោលបំណង បង្កើតគ្រាប់បែកបរមាណូ ប៉ុន្តែ ទីក្រុង តេហេរ៉ង់ អះអាងថា ទទូចធ្វើ ក្នុងគោលដៅសន្តិភាព តែប៉ុណ្ណោះ។

យ៉ាងណា លោក Abbas Araghchi រំពឹងថា នឹងរៀបចំការចរចា បន្ថែមទៀត ជាមួយសហរដ្ឋអាមេរិក ដោយលោកសាទរ ចំពោះបរិយាកាសត្រូវរូវគ្នា ក្នុងអំឡុងពេល មួយថ្ងៃ នៃ កិច្ចចរចា។ ប៉ុន្តែ លោកព្រមានប្រឆាំងនឹងការគំរាមកំហែង បន្ទាប់ពីទីក្រុងវ៉ាស៊ីនតោន បានលើកឡើងពីទិដ្ឋភាព នៃ សកម្មភាពយោធា ជាថ្មី។

នេះគឺជា កិច្ចពិភាក្សា លើកទីមួយ រវាងសត្រូវទាំងពីរ ចាប់តាំងពីសហរដ្ឋអាមេរិក បានចូលរួមជាមួយអ៊ីស្រាអែល សហការ វាយប្រហារលើទីតាំងនុយក្លេអ៊ែរ អ៊ីរ៉ង់ កាលពីខែមិថុនា ឆ្នាំមុន។

មិនមានការអត្ថាធិប្បាយភ្លាមៗ ពីគណៈប្រតិភូអាមេរិក នោះទេ។ មន្ត្រីទីក្រុងវ៉ាស៊ីនតោន ទាំងនេះ ដឹកនាំដោយ បេសកជនប្រចាំតំបន់មជ្ឈិមបូព៌ា លោក Steve Witkoff និងកូនប្រសារដ៏មានឥទ្ធិពល របស់ប្រធានាធិបតី Donald Trump គឺ លោក Jared Kushner ។

មុនពេលឈានដល់ការចរចា នៅពេលនេះ មានភាពតានតឹងខ្លាំង រវាងប្រទេសទាំងពីរ ពោលគឺចាប់តាំងពី នាវាខ្នាតយក្ស USS Abraham Lincoln អមដោយនាវាពិឃាតចំនួន ៣ គ្រឿង ប្រដាប់ដោយមីស៊ីល Tomahawk របស់អាមេរិក បានទៅដល់តំបន់មជ្ឈិមបូព៌ា កាលពីចុងខែមុន៕

ប្រភពពី AFP ប្រែសម្រួល ៖ សារ៉ាត