ភ្នំពេញ៖ទីប្រឹក្សាច្បាប់របស់រដ្ឋាភិបាលថៃ បានឱ្យយោបល់ថា ដើម្បីលុបអនុស្សរណៈស្តីពីការយោគយល់ (MoU) ឆ្នាំ ២០០១ ជាមួយប្រទេសកម្ពុជា ប្រទេសថៃត្រូវការកិច្ចព្រមព្រៀងច្បាប់ថ្មីមួយ ហើយមិនអាចធ្វើដោយប្រញាប់ប្រញា​ល់នោះទេ។

លោក ផាកន និលប្រាពូន អគ្គលេខាធិការក្រុមប្រឹក្សារដ្ឋថៃ ដែលជាស្ថាប័ន​ផ្តល់យោបល់ផ្នែកច្បាប់ បាននិយាយ​ក្នុងកាសែត The Nation នៅថ្ងៃអង្គារ៍នេះថា លទ្ធភាពនៃការលុបចោល អនុស្សរណៈ ២០០១ ជាមួយកម្ពុជា អាចធ្វើ​ទៅបាន ប៉ុន្តែ ទាមទារមានកិច្ច​ព្រមព្រៀងថ្មី និងការវាយតម្លៃក្រោមច្បាប់អន្តរជាតិ ជាមុនសិន។

លោកបន្តថាក្រសួងការបរទេសថៃកំពុងសិក្សាលើបញ្ហានេះ ដ្បិតការលុបចោល MoU ២០០១ ជាមួយកម្ពុជា មិនអាច ធ្វើបានភ្លាមៗ នោះទេ ពោលវាពាក់ព័ន្ធនឹងដំណើរការផ្លូវការ,លក្ខខណ្ឌនានា ដែលភាគីទាំងពីរបានព្រមព្រៀងគ្នា។
ឆ្លើយតបនឹងបញ្ហានេះ លោក ស៊ីហាសាក់ ភួងកេតកែវ រដ្ឋមន្ត្រី​ក្រសួងការបរទេសថៃ បាននិយាយនៅថ្ងៃអង្គារនេះថា ក្រសួងកំពុង​សិក្សាជម្រើសក្នុងការលុបចោល MoU ២០០១ ជាមួយកម្ពុជា ប៉ុន្តែ ត្រូវមានការយល់ព្រមពីគណៈរដ្ឋមន្ត្រីថ្មី ដោយមានការពិភាក្សាបន្ថែម ដែលមានការចូលរួមពីនាយករដ្ឋមន្ត្រី និងក្រុមប្រឹក្សាសន្តិសុខជាតិ។

បើតាមលោក ស៊ីហាសាក់ អាជ្ញាធរកំពុងចងក្រងជម្រើសផ្លូវច្បាប់ រួមទាំងការពឹងផ្អែកលើក្របខ័ណ្ឌច្បាប់អន្តរជាតិ ដែល ស្រដៀងគ្នា​ទៅនឹងការចរចារបស់ប្រទេសថៃ ជាមួយម៉ាឡេស៊ី គឺគ្មានការប្រើប្រាស់ MoU នោះទេ។
MoU ៤៤ ឬ MoU ២០០១ ជាឯកសារផ្តោតលើការដោះស្រាយតំបន់​មានជម្លោះតាមព្រំដែនសមុទ្ររវាងប្រទេសកម្ពុជា និងថៃ។ ឯកសារ​ដែលមានអាយុកាល ២៥ឆ្នាំនេះ ត្រូវបានចុះហត្ថលេខាដោយ​អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ និងសម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា។ MoU ៤៤ ធ្វើឡើងមួយឆ្នាំ​ក្រោយកម្ពុជា និងថៃ សម្រេចបាន MOU ៤៣ ដែលត្រូវបានប្រើក្នុងការ​ដោះស្រាយបញ្ហាព្រំដែនគោកដែលមានការខ្វែងគំនិតគ្នារវាងភាគីកម្ពុជា និងថៃ។
គម្រោងការលុបចោល MoU ៤៤ ឬ MoU ២០០១ ជាមួយប្រទេស​កម្ពុជានេះ ធ្វើឡើងតាមសំណើររបស់លោក អានុទីន ឆាន់វីរៈគុល ដែលទើបក្លាយជាក្បាលម៉ាស៊ីនថ្មីរបស់រដ្ឋាភិបាលថៃ។ នេះបើយោង​តាមការចុះផ្សាយរបស់កាសែត The Nation។

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជ​បណ្ឌិត្យសភាកម្ពុជា បានលើកឡើងថា ការសម្រេច លុប ចោល MoU ៤៤ ពីសំណាក់ភាគីថៃ អាចនឹងក្លាយជាដើមចមបង្កឱ្យមានជម្លោះកា​ន់តែ​រីករាលដាលធំជាងមុន ប្រសិនបើប្រទេសទាំងពីរមិនមានភាពអត់ធ្មត់ និងខ្វះការយោគយល់គ្នាខាងការទូត។
លោកបណ្ឌិតបានសង្កត់ធ្ងន់ថា យន្តការនៃអនុស្សរណៈនេះ គឺជាស្ពានតែមួយគត់ដែលរក្សាស្ថិរភាព និងការចរចា ដោយ​សន្តិវិធីលើតំបន់ជម្លោះ៕

ដោយ៖ខន ណារី AMS