ប្រធានាធិបតី ប្រទេសបេឡារុស លោក Alexander Lukashenko បានជូនអំណោយកាំភ្លើងវែង ដល់លោក គីម ជុងអ៊ុន មេដឹកនាំកូរ៉េខាងជើង។

ការផ្តល់ជូនកាដូបែបនេះ បានធ្វើឡើង កាលពីថ្ងៃព្រហស្បតិ៍ ពោលគឺចំពេលដែល មេដឹកនាំប្រទេស នៅភាគខាងកើត ទ្វីបអឺរ៉ុប រូបនេះ បំពេញដំណើរទស្សនកិច្ច នៅទីក្រុងព្យុងយ៉ាង។

លោក Alexander Lukashenko បានបង្ហាញកាំភ្លើង វាយប្រហារ និងផលិតផលប្រពៃណី របស់ប្រទេសបេឡារុស ខណៈពេលដែលលោក Kim Jong Un ផ្តល់អំណោយ ជាថូផ្កាដ៏ស្រស់ស្អាត និងកាក់មាស ជូនទៅមេដឹកនាំបេឡារុសវិញ។ ថ្នាក់ដឹកនាំ ទាំងពីរ ក៏បានជួបពិភាក្សាទ្វេភាគី និងចូលរួមព្រឹត្តិការណ៍រំលឹកខួបរួមគ្នា ផងដែរ។

ប្រទេសកូរ៉េខាងជើង និងបេឡារុស បានចុះហត្ថលេខាលើសន្ធិសញ្ញាមិត្តភាព ក្នុងអំឡុងពេលដំណើរទស្សនកិច្ច របស់លោក ប្រធានាធិបតី Alexander Lukashenko នៅកូរ៉េខាងជើង។

បើតាម AFP, លោក Lukashenko អាយុ ៧១ ឆ្នាំ បានគ្រប់គ្រងប្រទេសបេឡារុស តាំងពីឆ្នាំ ១៩៩៤។ បេឡារុស និង កូរ៉េខាងជើង ស្ថិតក្នុងចំណោមប្រទេសមួយចំនួន រួមទាំង រុស្ស៊ី ដែលចង់បង្កើត ពិភពលោកពហុប៉ូល ដើម្បីប្រកួតប្រជែងជាមួយអនុត្តរភាព លោកខាងលិច៕

ប្រភពពី AFP ប្រែសម្រួល ៖ សារ៉ាត