ប្រទេសកម្ពុជា និងសហរដ្ឋអាមេរិក គ្រោងនឹងរួមគ្នាធ្វើលំហាត់សមយុទ្ធ «ឆ្មាំអង្គរ» ឡើងវិញនៅដើមឆ្នាំ២០២៧បន្ទាប់ពីបានផ្អាកតាំងពីឆ្នាំ២០១៧។ សមយុទ្ធនេះនឹងផ្តោតលើប្រធានបទ «រួមគ្នាសម្រាប់ការជួយសង្គ្រោះ សន្តិភាព និងការស្តារឡើងវិញ» ដែលរួមមានទាំងលំហាត់ផ្នែកបញ្ជាការ និងលំហាត់នៅទីលាន។

ផែនការរៀបចំនេះត្រូវបានលើកមកពិភាក្សាកាលពីថ្ងៃទី៣១ ខែមីនា ឆ្នាំ២០២៦ នៅបញ្ជាការដ្ឋានកងទ័ពជើងគោក រវាងឧត្តមសេនីយ៍ទោ ហេង មករា មេបញ្ជាការរងកងទ័ពជើងគោកកម្ពុជា និងឧត្តមសេនីយ៍ទោ GILES J.S. CORNELIA មេបញ្ជាការរងកងទ័ពជើងគោកអាមេរិក ប្រចាំតំបន់ប៉ាស៊ីហ្វិក។

ភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការ និងការហ្វឹកហ្វឺន តាមរយៈការផ្លាស់ប្ដូរបទពិសោធន៍ និងការបណ្ដុះបណ្ដាលគ្រូបង្គោលលើជំនាញផ្សេងៗដូចជា ការជួយសង្គ្រោះពេលមានគ្រោះមហន្តរាយ ការបោសសម្អាតយុទ្ធភណ្ឌមិនទាន់ផ្ទុះ និងយុទ្ធវិធីប្រតិបត្តិការនៅតំបន់ព្រៃភ្នំ៕